1 Thessalonians 4

ibibio

← Chapter 3 Jump to: Chapter 5 →

1Ke akpatre nditọete, ñnyịn imikpeeb ndufo naña esaña edu uwem ma anem Abasi esịd, kpa naña ndufo edu idahami. Idahami ñnyịn ibịp ndufo inyʌñ ikpak ndufo idem ke Abọọñ Yisọs ite ekaka iso enam ntom.

2Sia ndufo emediọọñọ se ukpeebñkpọ ñnyịn inọ ndufo ato ke adudu Abọọñ ñnyịn Yisọs.

3Ado uduak Abasi nọ ndufo edoñño ndisana, nọ ndufo efeghe ekpọñ use ye efịbe;

4nọ awo keed-e-keed akpeeb nfadidem ke usʌñ adooho adisana mme ke edu ukpono.

5Idooho ke akpọsọñ idiọọk itọñ nte mme andikpono ndem, a-mmiidiọọñọke Abasi;

6ndin ke ntak mme ñkpọ ami awo ndomokeed akuudue ayịnete amọ, me adisịn anye ke ndek. Abọọñ ayaanọ mme awo ufen ke utọ ndiọiñkpọ ami, naña ñnyịn imaikibo ndufo inyʌñ idʌt ndufo utọñ.

7Sia Abasi ikikoodo ñnyịn ate idido se mmiisanake, ado idu adisana uwem.

8Ke ntodo, awo a-asịnne ewʌhọ ami isịnne awo ado asịn Abasi a-anọọhọ Adisana Sịbidịd amọ.

9Idahami, ke abaña ima nditọete, ñnyịn inieeghe adiwet inọ ndufo, sia ndufo ke idem ndufo emaekpeeb eto Abasi adima keed aken.

10Ndin ke akpanikọ, ndufo emema afịd ubon Abasi ke Masidonia. Ado ñnyịn isʌk ikpak ndufo idem, nditọete, adika iso nnam ntodo ñkakan.

11Nam ado udọñ ndufo adidu usʌk-usʌk uwem, ikiisịn anyen ke ñkpọ awo, inyʌñ idat ubọk ndufo inam ñkpọ, kpa naña ñnyịn imaikibo ndufo,

12nọ ato do uwem ndufo ke usen ke usen anam mme awo ke esion inọ ndufo ukpono, ñko mbaak ndufo idibet edem ke awo ndomokeed.

13Nditọete, ñnyịn iyemme ndufo edoñño akọi ke abaña mbon e-emaekedaiya, mbaak ndufo idituañña nte mbio mfen e-mmiinieeghe idodanyen.

14Ñnyịn iminịm ke Yisọs amaakpa, amaaset ke ñkpa ndin ñnyịn iminịm ite ke Abasi ayaadat Yisọs ye mbon e-ekpaññake ke anye adi.

15Ato ke ikọ Abọọñ ke idem amọ ñnyịn itañ inọ ndufo ke akpanikọ ite ke ñnyịn isʌkkọ idodu uwem, idiisʌhọ tutu adidi Abọọñ, idiikpeehe iso ikpọñ mbon e-ekpaññake.

16Sia Abọọñ ke idem amọ ayaasọiyọ ke abio ubọọñ amọ adi, ye akpọsọñ uyo ewʌhọ, ye uyo ekamba enyere ye adukpəñ ake Abasi adatta akood awo ndin mme akpañkpa ke Krais eyaedaaña eda akpa.

17Ke ado amaakekweeñe, ñnyịn i-isʌkkọ idu uwem inyʌñ isʌhọ, eyaenam ñnyịn isoobo ye ammọ ke ntọñanyọñ nọ ato do ñnyịn idiisoobo ye Abọọñ ke afịm. Ke ntodo, ñnyịn iyaiba ye Abọọñ ke nsi-nsi.

18Ndin isọọñọ keed aken ukod ke mme ikọ ami.

← Chapter 3 Jump to: Chapter 5 →