2 Thessalonians 1

ibibio

Jump to: Chapter 2 →

1Bọọd, Saidas ye Timoti, Enọ esọk ufọkabasi mbon Tesadonika ke Abasi Ete ñnyịn ye Abọọñ Yisọs Krais:

2Mfọn ye emem a-atooho Abasi Ete ye Abọọñ Yisọs Krais isịm ndufo.

3Akpena ñnyịn isikọọm Abasi afịd ini ke ntak ndufo, nditọete, anyʌñ anen, sia mbuọdidem ndufo asʌk akọt akaakan, ndin ima a-ndufo enieeghe enọ keed aken asʌk atọt.

4Ke ntodo, ke atu mme ufọkabasi ñnyịn iminam inua ibaña nsịnifịk ye idodanyen ke afịd ndutʌkkọ ye idomo a-ndufo eyọọhọ.

5Afịd ami ado ntiense ke ubiire ikpe Abasi ado adinen, ndin nte ibọọrọ eyaibat ndufo ke emedot ke abio ubọọñ Abasi a-ndufo e-bọọhọ ufen ebaña.

6Abasi ado adinen: anye ayaakpe utịb mfịna anọ mbon i-inọọhọ ndufo mfịna,

7ndin ibiommo ndufo ufen e-ebọọhọ, ye ñnyịn ñko. Ami aditịppe ke emaeyaara Abọọñ Yisọs ito ke abio ubọọñ Abasi ke ekamba edeme ikañ ye mme enyere e-enieeghe akpọsọñ adudu.

8Anye ayaamia mbon a-mmiidiọọñọke Abasi ufen a-mmiinyʌññọ isuuk iwuod inọ Abọọñ ñnyịn Yisọs.

9Eyaenọ ammọ ufen ye nsi-nsi nsobo enyʌñ ekʌk usʌñ esio ammọ ke iso Abọọñ ye ke ubọọñ adudu amọ

10ke usen anye adidi idiyaara ubọọñ ke mme ndisana awo, ñko adido utịbe ñkpọ ñkpaidem ke atu mbon e-enịmme ke akpanikọ. Ndufo ñko esịne ke atu ami, sia ndufo emaenịm ikọ ntiense i-ikitaña inọ ndufo.

11Sia iminie ami ke esịd, afịd ini ñnyịn ibọñ akam inọ ndufo, ite Abasi ñnyịn akpebat ndufo nte emedot ke ikood amọ, ndin ato ke adudu amọ anye anam afịd nti uduak ndufo ye afịd adinam ke mbuọdidem ndufo asu.

12Ñnyịn ibọñ akam ami ite akpedo ntodo nọ anyịñ Abọọñ ñnyịn Yisọs akpebọ ubọọñ ke idem ndufo, ndin ndufo ñko ke anye, nọ asaña akekem ke mfọn Abasi ñnyịn ye Abọọñ Yisọs Krais.

Jump to: Chapter 2 →