2 Timothy 2

ibibio

← Chapter 1 Jump to: Chapter 3 →

1Yịn mmi, sọọñọ idem mfo ndin ke adudu mfọn a-atooho Krais Yisọs.

2Nyʌñ ben mme ikọ se akekop ke inua mmi ke iso uwak ntiense, yak nọ mme anam akpanikọ e-ediikan ikpeeb mbon ñfen.

3Keene ñnyịn biom ukuud nte eti awo ekọñ Krais Yisọs.

4Ndomo awo keed a-akaaha ekọñ ibenne idem amọ ikikọp ke ndubeghe uwem ñkaña awo, anye ayem inam se inem etubom ekọñ esịd.

5Ñko, awo ake adodo a-akaaha nduba ikemeke edibọ anyanya ke enye mmiisañake ke item ye ibed.

6Awo a-akpaaha utom atọ inwañ anie adiito ndia mfịd inwañ ado.

7Yak se ñtañ ami unwaña, ndin Abọọñ ayaunọ ifiọk ke ukeed ñkpọ ami.

8Toiyo Yisọs Krais a-akesette ke ñkpa, aketo ubon Defid a-anyʌññọ. Ami ado eti etob a-ami ñkwọrọke

9ndin ami ke mbọ esuenne tutu enyʌñ ensịn ke ñkpakọb nte anam idiọọk ñkpọ. Ado awo ikọppọ ikọ Abasi.

10Ke ntak ami ñko ke ami ñyọ ke ntak ufọn mbon a-Abasi amekke nọ ammọ ñko enie adinyaaña eto Krais Yisọs, enyʌñ ebọ nsi-nsi ubọọñ.

11Ikọ ami ado akpanikọ ete: adieke ñnyịn ikikpaaha ye anye, ñnyịn iyaidu uwem ye anye.

12Adieke ñnyịn inieeghe ime, ñnyịn iyaida ubọọñ ye anye. Adieke ñnyịn ikañña anye, anye ayaikan ñnyịn.

13Adieke ñnyịn mminamma akpanikọ, anye asʌk ado anam akpanikọ, sia anye mmiikemeke adikpəghọ ñkpọñ uduod amọ.

14Kaiso toiyo ammọ mme ñkpọ ami. Nyʌñ nyịk ammọ ke iso Abasi ate ammọ ekuudʌk anwan ke ikọ inua. Utọk inamma ndomo eti ufọn keed utu ke ado ababiad mme andikop.

15Domo afịd ukeme mfo ediwọt Abasi idem ke afo ado awo e-emaekedomo enyʌñ ediọọñọ nte anam utom a-mmiinieeghe edikop abuud, awo atʌmmọ akama ikọ akpanikọ.

16Sio idem mfo fep ke ikpu-ikpu ndutaña ikọ a-akemeke inam mme awo ewuọ ekpọñ uteeñe Abasi.

17Ukpeebñkpọ ammọ ayaatara nte inia. Ke atu mme utọ awo ami edoñño Haimenius ye Fidetus,

18mme awo ami emaeduọ ekpọñ akpanikọ. Ammọ enyʌñ ebo ke mme akpañkpa emaeseset enyʌñ ekappa ebiad mbuọdidem ubaak awo.

19Kpa ye ado, itiad idakisọñ Abasi asọọñọ ada ye mme ikọ ami: “Abọọñ adiọọñọ mbon se ido ake Amọ,” amaana adian: “Afịd awo se itommo anyịñ Abasi ana asioño idem akpọñ ukwañ ido.”

20Ke esịd ekamba ufọk, idooho ñkpọ adooho kood ye sidifa ikpọñ asisịne. Mme ñkpọ se edat eto ye aduañ enam esisịne do ñkọ; enọ usʌk itie ukpono, enyʌñ enọ usʌk usʌhọde itie.

21Adieke awo asioho idem amọ akpọñ idiọọk ñkpọ, anye ayaodo ñkpọutom a-anieeghe ukpono, enam ado adisana, ado se edat enam utom enọ Eteufọk e-enyʌññọ ebeeñe enịm enọ nti utom ake adodo.

22Feghe kpọñ idiọọk itọñ uyịn, bịne edinenido, mbuọdidem, ima ye emem ke atu mme akpono Abasi ke edisana esịd.

23Kpọñ idiọọk ye ndisịme eniin sia amediọọñọ ke aben utọk adi.

24Asañautom Abasi inaaha atọhọ utọk; ado ana anye afọn ido ye afịd awo, ado eti andikpeeb a-anieeghe ime, inieghe udu.

25Ana enye asụụk idem ke ini anye ayemme edinekke mbon ebiọọñọke anye, ke idodanyen ke Abasi ayaanam utọ ibon ado ekappa esịd, ndin edinie ifiọk atooho akpanikọ,

26ndin ammọ ediidiọọñọ idem, enyʌñ efeghe ekpọñ afia setan, a-anamma ammọ edʌk ufʌn enam uduak amọ.

← Chapter 1 Jump to: Chapter 3 →