2 Timothy 4

ibibio

← Chapter 3 Jump to:

1Mmenekke unọ fiin ewʌhọ ami ke iso Abasi, ye ke iso Krais Yisọs, a-adiikpe ikpe mme adu uwem ye mme akpañkpa ke ini anye adiwuọ iwọt idem inyʌñ iyaara abio ubọọñ amọ:

2Kwọọrọ ikọ Abasi, nyʌñ sịn ifịk nam ami, ye adooho ke akem ini, ye ke ini mmiikemme, ke ifed abaaha, ye ke ufañ afahakefaha. Wọt mme awo ndudue ammọ; sua nọ ammọ; kpek ammọ, nyʌñ nie anyan ime ke edinekke ñkpeeb.

3Ini asʌk adi a-mme awo mmiidiinyịmmeke adikop eti ukpeeb ñkpọ. Ndin sia utọñ adeebe ammọ adikop ukpəhọ ikọ, ammọ eyaekịppe ekeene nsio-nsio mme andikpeeb e-ediikpeeb se esịd ammọ ayem.

4Ammọ eyaewuọ ekpọñ akpanikọ ekappa ekeene mme mbʌk esed.

5Amaado afo, faara idem ke afịd usʌñ, yọ nsọñọñkpọ, nam utom ifanyere, nam ukeed ubiọñ utom mfo ma.

6Sia endọduọk miin nte uwa uduọk ukọd, ndin ini akem ami adikpọñ ndufo.

7Mmenwana eti anwan, mmekweeñe nduba mmi, mmemʌm mbuọdidem mmi ñkama.

8Ndin idaha ami, ebeeñe anyanya etiido enịm ennọ miin, a-Abọọñ, unen Abiireikpe, adinnọ miin ke usen ado, ndin idooho ami ikpọọñ ke ediinọ, eyaanọ afịd mbon e-enieghe udọñ anye editịmme ndi.

9Nwana afịd ukeme mfo adisọp edimbịne miin,

10sia Demas, ato ke uwʌrọ ñkpọ isọñ ami, amaafeeghe añkpọñ miin aka Tesadonika. Kresens a-aka Kadesia; Taitọs aka Dadmasia.

11Duk ikpọọñ asʌhọ ye ami. Saña ye Maak di, sia anye ado unwam annọ miin ke utom ami.

12Mmaadọñ Taikikọs nte aka Efisọs.

13Amaabo udi, ben ekamba afọñidem mmi a-ñkenịmme ye Kaapus ke ini ñkebaaha ke Troas, di; ñko ye mme ñwed mmi, akpan-akpan mme ñwed ikpa mmi.

14Adeksanda, adomutịm, amaannam ibak eti-eti. Abasi ayaasio usieene akekem ye se anye anam.

15Kpeme idem mfo ye anye, sia anye amaanwaña eti-eti ye etob ikọ Abasi ñnyịn.

16Ke akpa ikpe a-ñkedaaha adinyaaña idem, ami ñkenieeghe unwam nto ndomo awo keed. Abasi akpekap afeen anọ ammọ.

17Ado Abasi amaada ye ami, anyʌñ annọ adudu adikwọrọ ikọ ayọhọ-ayọhọ, adinyʌñ nnam mme Yentaid ekop. Ke ntak ami ke ekensio miin ke inua ekpe.

18Abọọñ ayaañnyaaña miin asio ke afịd idiọọk ubịne; ayaanyʌñ añkpeme miin tutu akesịm mme ndagha ebekpo ubọọñ Abasi amọ. Ubọọñ anie anye ke nsi-nsi. Amen.

19Kọọm Brisida ye Akwida, ye mbon ufọk Onesifọdus.

20Edastus amaasʌhọ ke Kọrint, ndin mmaanyʌñ ñkpọñ Trofimus ke Midetus ke ntak udọñọ.

21Domo ukeme adidi mbemiso ini ekarika. Yiubudus, ye Kudens, ye Dainus, ye Kradius, ye afịd nditọete eenọ ekọm.

22Abọọñ aba ye sịbidịd mfo. Mfọn aba ye afo.

← Chapter 3 Jump to: