2 Timothy 3

ibibio

← Chapter 2 Jump to: Chapter 4 →

1Nekke diọọñọ ami ñko: Idiọọk ini ayaadi ke ini utịd eyo.

2Mme awo eyaedoñño mme amaidem, ye mme ama akʌk, enyʌñ enam inua, ebuudo mbuudo, enyʌñ etaña abʌd-abʌd ikọ. Ammọ eyaesuuñọ mme awo, Esọñ iwuod ye mme ete ye mme eka, enana esịd ekọọm ye uteeñe Abasi,

3enana ima uduudawo, inyʌññọ iyem emem ye awo ake adodo, abiad awo anyịn, esua mbon se inam nti ñkpọ,

4ammọ eyaetap mme awo enọ mme asua, mme afai, enyʌñ ekop inem ederimbod ekan ima Abasi,

5mme awo ami enie ido ukpono Abasi ado ekañ adudu amọ. Kuudian idem mfo ye utọ ibon ami.

6Sia ammọ ekama ñkara edʌk ufọk awo; ebiaaña ibaan i-mmiinieeghe nsọọñọnda, idiọọk akara uwem ammọ; enyʌñ ekpeep ammọ nsu-nsu ukpeep ñkpọ, enie nsio-nsio ndiọi udọñ

7utọ ibaan ami etak ke ukpeebñkpọ ukeed ini, ado ikanna inie ifiọk akpanikọ.

8Ukem-ukem naña Yannes ye Yambresi ekenwana ye Moses, ukem ado ke mme utọ ibon ami enwana ye akpanikọ. Esịd ammọ amaabiaaña; kebaña mbuọdidem, emaesịn ammọ.

9Ado ammọ idiikaaha usʌñ aniọñ, kpa nte akemme ibon ado ndisịme ammọ ayaayaara anaa inwañ-inwañ ke iso afịd awo nte ake mbon ado.

10Ado afo amediọọñọ afịd se ami ñkpeeb, edu uwem mmi, ye uduak mmi, mbuọdidem mmi, anyan ime mmi, ima mmi, ye ñwaidem mmi,

11ndubịnne, ufen, mme ñkpọ se ikitịppe innọ miin ke Antiọk, ye Aikonium, ye Distra, mmaayọ mme ukọbọ. Ado Abọọñ amannyaaña miin asio ke ukeed amọ.

12Ke akpanikọ, eyaedutʌkkọ ukeed awo e-yemme edidu eti uwem ke Krais Yisọs.

13Ado ndiọi awo ye mme anam abiaaña, eyaekaka iso ediọi ekan, enyʌñ eka iso ebiaaña awo, mme awo enyʌñ ebiaaña ammọ.

14Amaado afo yiire ke se akekpeeb anyʌñ adiọọñọ ke ado akpanikọ; sia amediọọñọ mbon a-afo akekpeebe ato,

15afo amediọọñọ tọọñọ ke etək-etək abaña Adisana ikọ Abasi, akemeke adinam afo ado awo aniọñ, anyʌñ anie adinyaaña ato ke mbuọdidem ye Krais Yisọs.

16Ekewet afịd-afịd ikọ Abasi ke adudu Sịbidịd Abasi, ndin afọn se ekama ekpeep awo ñkpọ, esua enọ awo, enyʌñ etemme awo usʌñ a-anenne ye ukpeep ñkpọ ke edinem ido,

17nọ atodo awo Abasi akeme edinie ayọhọ ifiọk, anyʌñ atʌm abeeñe idem ke ukeed-u-ukeed usʌñ, adinam afịd nti utom.

← Chapter 2 Jump to: Chapter 4 →