Ephesians 3

ibibio

← Chapter 2 Jump to: Chapter 4 →

1Ke ntak ami, ami Bọọd, awo ñkpakọb Krais Yisọs ke ntak ndufo mme Yentaid.

2Ke akpanikọ ndufo emekop ebaña ukama mfọn Abasi e-ekennọọhọ miin inọ ndufo,

3ami ado, ndedịbe ñkpọ e-ekenamma ndiọọñọ ke adiyaara, nte mmaakewewet, ibio-ibio.

4Ke adikood ami ndin, ifiọk ake ami nnieeghe mbaña ndedịbe ñkpọ Krais ayainwaña ndufo,

5e-ediikiyarake inọ mme awo ke mme emana mfen, nte ami Sịbidịd Abasi ayaarake idahami ke ndisana mme abọsịd ye mme brọfed.

6Ndedịbe ñkpọ a-abaaha ado, ke ntak ikọ Abasi mme Yentaid edoñño mme adia akpa mme ubon Isred, e-ebatta edian keed ke ubon Abasi e-enyʌññọ ewuaana keed ke enwọñọ ke Krais Yisọs.

7Ami mmaakappa ndo afʌn ikọabasi, ami ato ke mfọn a-Abasi annọọhọ miin ato ke mme utom adudu amọ.

8Akpesʌk ado nte ami nsuuhọke ñkan andisịp ñkan ke atu nditọ Abasi, ekennọ miin mfọn ami adikwọrọ nnọ mme Yentaid mme inie ke Krais a-awo mmiikemeke adidiọọñọ,

9ye adinyʌñ nnam ndedịbe enọ ami anwaña afịd awo, a-adooho ke mme ayo a-akeboiyoke ekedeedịp ke Abasi, anye a-akebotto afịd ñkpọ.

10Udọñ amọ akedo yak idahami, ato ke ufọkabasi, mme ukara ye mme adudu ke mme ikpeghe ebekpo ubọọñ ediọọñọ ebaña akwa anana mbied ekike Abasi,

11nọ asaña akekem ke nsi-nsi uduak amọ a-anye akenamma asu ke Krais Yisọs Abọọñ ñnyịn.

12Ke anye, anyʌñ ato ke mbuọdidem ke anye, ñnyịn imikeme adisaña ñkpere Abasi ke ñkpọkñyak ye uko.

13Ke ntodo, ami idọkkọ ndufo mbo ikiiyak idem imem ndufo ke ntak ukuud a-ami mbọọhọ ke ntak ndufo, a-adooho ubọọñ ndufo.

14Ke ntak ami mmetọọñọ edọñ ke iso Abasi,

15a-afịd ubon ke abio Abasi mme ke ederimbod enieeghe anyịñ eto.

16Ami mbọñ akam mbo ke ntak mfọn ye ubọọñ amọ, anye inọ ndufo nsọọñọnda ye adudu a-atooho ke Sịbidịd amọ ke esịd ndufo,

17nọ Krais adʌñ ke esịd ndufo ato ke mbuọdidem. Ñnyʌñ mbọñ akam ñko mbo ndufo e-emaekesọọñọ eda ke ima,

18ekan enie adudu, ediana ye ukeed ndisana awo, nọ se ido ubom ye uniọñ ye ukoñ ye unịme ima Krais atʌm inwaña ndufo,

19nọ ediọọñọ ima a-akanna ifiọk ma ato do ndufo ekan eyọhọ ke udomo afịd adiyọhọ ake Abasi.

20Idahami yak anye a-akemeke adinam ñkan se ekpedodomo adibịp me adikere, nte asañake akekem ke adudu a-anamma utom ke esịd ñnyịn,

21abọ ubọọñ ke ufọkabasi ye ke Krais Yisọs ke afịd mme emana, ke nsi-nsi nsi-nsi! Amen.

← Chapter 2 Jump to: Chapter 4 →