Ephesians 6

ibibio

← Chapter 5 Jump to:

1Nditọ, ikop item mme ete ye mme eka ndufo ke Abọọñ, sia ami ado nnen-nnen.

2“Kpono usọ ye uka,” ami ado akpa ibed a-asañake ye enwọñọ,

3“ma afọn ye afo, ma afo anyʌñ adu anyan uwem ke isọñ.”

4Mme ete, ikiinam nditọ ndufo ebịmme esịd, ado ikama ammọ ke ukpeeb ye item ke Abọọñ.

5Mme ifʌn, ikop item inọ mme eteufọk ndufo ke ederimbod, ke ukpono ye mbaak esịd akpanikọ kpa naña ekpekop item enọ Krais.

6Ikop item inọ ammọ idooho ke adibọ itooro ke adinam utom anyen awo ikpọọñ ke iso ammọ, ado nte akpedooho ifʌn Krais, inam uduak Abasi ke awọñ esịd ndufo.

7Inam ke afịd esịd, nte enam enọ Abọọñ idooho mme awo,

8sia ndufo emediọọñọ ke Abọọñ ayaanọ afịd awo utịb ke se idodo nti ñkpọ a-anye anamma, ado anye ado ifʌn me amanaisọñ.

9Ndin mme eteufọk, ikama mme ifʌn ndufo ke ukem usʌñ ado. Ikiinyeeñe ammọ, sia ndufo emediọọñọ ke anye a-adooho kpa eteufọk anọ ammọ ye ndufo aba ke abio Abasi, ndin adusad ibaaha ke anye.

10Ke akpatre, isọọñọ ida ke Abọọñ ye ke akwa adudu amọ.

11Isịne afịd ñkpọekọñ Abasi nọ ekan eda ke idaha adinwana afịd ñkara andidiọọk.

12Sia anwan ñnyịn idooho ye abʌk ye iyiib, ado ye mme andikara, ye mme adudu, ye mme adudu akịm ke ederimbod, ye mme adudu ndiọi sịbidịd ke mme ikpeghe ebekpo ubọọñ.

13Ndin, iben afịd ñkpọekọñ Abasi isịne ke idem, mbaak idiọọk usen amaadi, maekan esọọñọ eda ke iwuuk ndufo, ndin emaenam afịd ñkpọ ema, esọọñọ eda.

14Isọọñọ ida ndin, ikịne ñkpaha akpanikọ ke isịn, idian ukwak ikpanesid ke itie amọ,

15inam ukod ndufo aba ke mbeeñeidem a-atooho eti mbʌk emem.

16Ke edianna ke afịd ami, iben ñkpọekọñ mbuọdidem ikama, e-ediidat inịme akpọsọñ idañ ikañ andidiọọk.

17Ibenne itam adinyaaña iyara, ye akañkañ sịbidịd, a-adooho ikọ Abasi.

18Inyʌñ idat mme nsio-nsio ukod akam ye mme ebeeñe ibọñ akam ke Sịbidịd afịd ini. Ye akikere ami ke esịd, itịñ anyen inyʌñ ibọñ akam afịd ini inọ afịd mme ndisana awo.

19Ibọñ akam innọ miin ñko, ite yak ini ake adodo ake ñkʌppọke inua, ennọ ikọ nọ ñtañ uko-uko, nọ nnam nọ ediọọñọ mme ndedịbbe ñkpọ eti mbʌk,

20a-ami ndoho isʌñutom amọ ke ñkpakọb. Ibọñ akam nọ ami ñkan ñkwọrọ anye uko-uko naña akpena nte nnam.

21Taikikọs, adima ayịneka awodeen ye ata eti isʌñutom ke Abọọñ, ayaidọkkọ ndufo afịd ñkpọ, nọ ndufo ñko ediọọñọ naña ñnyịn iba,

22Ami ndọñ anye inọ ndufo ke ntak ami, ma ndufo ediọọñọ naña ñnyịn iba, ma anye anyʌñ isọọñọ ndufo idem.

23Emem aba ye mme nditọete ideen ye ibaan, ye ima a-asañake ye mbuọdidem ato Abasi Ete ye Abọọñ Yisọs Krais.

24Mfọn aba ye afịd awo e-emaaha Abọọñ ñnyịn Yisọs Krais ye ima a-amiidiikpaaha.

← Chapter 5 Jump to: