1 John 3

Ika 2018 Bible

← Chapter 2 Jump to: Chapter 4 →

1Lee ni kẹ Chuku-Nẹdi nwọnhan ihiẹn-ọsụsụọ ẹnyi — nke wụ nị ọ kpọ ẹnyi ụmụ Osolobuẹ! Ịya kẹ ẹnyi wụ ezioku-ezioku! Ihiẹn ụwa gilẹni marịn ẹnyi wụ nị ụwa amarịnn'a.

2Ndị nke m, ẹnyi wụ nwan ụmụ Osolobuẹ, bụ ihiẹn ẹnyi jẹnkọ d'a wụ eke pụha ifọn; kanị ẹnyi a marịnghọ nị ọ bịa, ẹnyi k'a nọ kẹ ịya makẹni ẹnyi sikọ d'a hụnchanrịn a k'ọ nọ.

3Ndị ile nwọn olilẹnyanị imẹ obi wẹ e dọnmẹ enwẹn wẹ ọchan kẹ ya lẹ enwẹn ẹ dọn rị ọchan.

4Onyẹ ọwụlẹ hụn e mẹ njọ rị a dan iwu makẹni njọ wụ ịdan-iwu.

5Ụnụ a marịnghọ nị Kraịstị bịa d'e wepụ njọ; ụnụ a marịnzịghọ nị njọ arị imẹ ẹ.

6Onwọnni onyẹ rị imẹ ẹ a tọ njọ e mẹ; onyẹ tọ njọ e mẹ eke hụntu ẹ mọbụ marịn a.

7Ụmụẹka, anịlẹ ni onyẹ ọwụlẹ dufie ụnụ! Onyẹ e bi obibi rị ọchan rị ọchan kẹ Kraịstị dọn rị ọchan.

8Onyẹ e mẹ njọ wụ nke Ekwensụ, makẹni Ekwensụ gha alị mẹla njọ. Ịya haịn Nwa Osolobuẹ gi bịa — kẹni o tikpọ ọrụn Ekwensụ.

9Onwọnni onyẹ Osolobuẹ mụ e mẹ njọ. Makẹni, mkpụrụ Osolobuẹ rị imẹ hụnyẹ. Ọ sakọ ẹka mẹ njọ, makẹni Osolobuẹ mụ a.

10Ọnwan kẹ wẹ gi a marịn ndị wụ ụmụ Osolobuẹ lẹ ndị wụ ụmụ Ekwensụ: onyẹ ọwụlẹ ghalẹni e mẹ ihiẹn rị mma mọbụ onyẹ ihiẹn ibe ẹ ghalẹni a sụọ ẹlẹ nwa Osolobuẹ.

11Ẹghẹẹ, ozi hụ ụnụ nụ isi-ibuzọ wụ nị ẹnyi k'a gha e nwọn ihiẹn-ọsụsụọ ibe ẹnyi.

12Ẹnyi anọkọkwọ kẹ Keni hụn rị azụụn nke Eje-onyẹ hụ, o gbu nwẹnẹ ẹ. K'o gbuni nwan nwẹnẹ ẹ? Makẹni ya nwẹn mẹ eje-ihiẹn, nwẹnẹ ẹ mẹ ihiẹn rị mma.

13Umunẹ m, y'a tụlẹ ụnụ ẹnya nị ize ụnụ rị e ze ụwa.

14Ihiẹn ẹnyi gi marịn nị ẹnyi a ghagụọ ọnwụn pụha, banye ndụn, wụ nị ẹnyi nwọn ihiẹn-ọsụsụọ ibe ẹnyi. Onyẹ nwọnlẹni ihiẹn-ọsụsụọ ibe ẹ a nwụnhụngụọ.

15Onyẹ ọwụlẹ ize ibe ẹ e ze wụ izighẹ, bụ ụnụ a marịnghọ n'o nwọnni izighẹ ndụn itẹbitẹ rị imẹ ẹ.

16Ihiẹn ẹnyi gi a marịn ihiẹn-ọsụsụọ wụ ọnwan: nị Kraịstị gi ufiri ẹnyi we ndụn a ye. O furu nwan nị ẹnyi nwẹn ye ndụn ẹnyi makẹ ufiri ibe ẹnyi.

17Nanị ẹnyi e dọn kweri ni ihiẹn-ọsụsụọ Osolobuẹ dọn rị imẹ ịhịan omẹni hụnyẹ e nwọnghọ ihiẹn ụwanị kanị ọ hụn ibe ẹ ihiẹn rị a kọ, ọ jụ n'o yekọn'a ẹka?

18Ụmụẹka, nị ẹnyi e nwọn ni ihiẹn-ọsụsụọ nke-esi — ẹlẹ hụn wẹ gi ọnụ e ku, kanị, hụn wẹ gi ẹka e mẹ.

19Ọhụn kẹ ẹnyi e gi marịn nị ẹnyi rị azụụn nke ezioku, ịya kẹ ẹnyi gi e mẹ obi e ru ẹnyi alị ebe Osolobuẹ rị —

20omẹni obi e gbumẹ ẹnyi mgbu, Osolobuẹ ka obi ẹnyi, ọ marịnzịghọ ihiẹn ile.

21Ndị nke m, omẹni obi arị e gbu ẹnyi mgbu, egun ara tụ ẹnyi ebe Osolobuẹ rị,

22ẹnyi e nwọnhẹnzi ihiẹn ẹnyi rịọ a, makẹni ẹnyi hụ e dọnmẹ iwu ẹ, e mẹ ihiẹn a sụọn'a.

23Ọnwan wụ iwu ẹ: nị ẹnyi k'e kweri ni ẹfan Nwa a wụ Jesu Kristi lẹ ni ẹnyi k'e nwọn ihiẹn-ọsụsụọ ibe ẹnyi — nọkẹ k'o dọn gwa ẹnyi.

24Ndị ile e dọnmẹ iwu ẹ rị imẹ ẹ, ya nwẹn rịzịkwọ imẹ ndụn wẹ. Ihiẹn ẹnyi gi a marịn n'ọ hụ imẹ ẹnyi wụ ọnwan: n'o yeọlẹ ẹnyi Mmọn-nsọ.

← Chapter 2 Jump to: Chapter 4 →