1 John 4

Ika 2018 Bible

← Chapter 3 Jump to: Chapter 5 →

1Ndị nke m, ẹlẹ mmọn ile gi ịhịan ku oku kẹ ụnụ k'e kweyeni, ka e lelegụ nị kẹ wẹ gha ẹka Osolobuẹ bịa nke-esi, makẹni, ndị amụma-ntụ bu ọda a pụhagụọ imẹ ụwa.

2Ọnwan kẹ ụnụ e gi marịn hụn wụ nke Osolobuẹ: hụn ọwụlẹ sị nị Jizọsị Kraịstị gi ẹhụ ịhịan bịa, ọhụn wụ nke Osolobuẹ,

3kanị mmọn ọwụlẹ sị nị Jizọsị Kraịstị egini ẹhụ ịhịan bịa, ọhụn ẹlẹ nke Osolobuẹ. Ọhụn wụ mmọn Eṅẹnrẹn-Kraịstị hụn ụnụ nụ n'ọ lala alala: ọ rịgụọlẹ nwan imẹ ụwa.

4Ụmụẹka, ụnụ wụ nke Osolobuẹ; ụnụ e mẹrigụọ wẹ, makẹni onyẹ rị imẹ ụnụ ka onyẹ rị imẹ ụwa.

5Wẹ wụ nke ụwa. Makẹni wẹ wụ nke ụwa, w'e ku kẹ ndị ụwa, ụwa hụ e gọn wẹ ntịn.

6Ẹnyi nwẹn wụ nke Osolobuẹ. Onyẹ marịn Osolobuẹ e gọn ẹnyi ntịn. Onyẹ wụlẹni nke Osolobuẹ ara gọn ẹnyi ntịn. Ọnwan kẹ ẹnyi gi a marịn mmọn hụn wụ ezigbo ẹ lẹ mmọn e dufieni.

7Ezigbo umunẹ, nị ẹnyi e nwọn ni ihiẹn-ọsụsụọ ibe ẹnyi, makẹni ihiẹn-ọsụsụọ wụ nke Osolobuẹ. Onyẹ nwọn ihiẹn-ọsụsụọ, Osolobuẹ mụ a, ọ marịnghọ Osolobuẹ.

8Onyẹ nwọnlẹni ihiẹn-ọsụsụọ amarịn Osolobuẹ, makẹni Osolobuẹ wụ ihiẹn-ọsụsụọ.

9Osolobuẹ a ghọsịgụọ n'o nwọn ihiẹn-ọsụsụọ ẹnyi — ebe ọ nọ zihẹ akpụ Nwa a ohu imẹ ụwa, kẹni ẹnyi hụn ụzọ rị ndụn ghahan'a.

10Ọnwan wụ ihiẹn-ọsụsụọ: ẹlẹni ẹnyi e nwọn ihiẹn-ọsụsụọ Osolobuẹ, kanị Osolobuẹ nọ nwọn ihiẹn-ọsụsụọ ẹnyi, gi ẹ zihẹ Nwa a n'ọ wụrụ ẹjan wẹ gi wepụ njọ ẹnyi.

11Ndị nke m, ebe o mẹ eziẹ nị Osolobuẹ nwọn ihiẹn-ọsụsụọ ẹnyi ẹnịna, ẹnyi nwẹn gi ibe ẹnyi ụgwọ ihiẹn-ọsụsụọ.

12Onwọntuni onyẹ gi ẹnya a hụn Osolobuẹ, kanị omẹni ẹnyi nwọn ihiẹn-ọsụsụọ ibe ẹnyi, ya wụ nị Osolobuẹ bi imẹ ẹnyi, ihiẹn-ọsụsụọ a zuzikwọ oke imẹ ẹnyi.

13Ihiẹn ẹnyi gi marịn nị ẹnyi rị imẹ ẹ, ya nwẹn hụ imẹ ẹnyi, wụ n'o yegụọ ẹnyi Mmọn-nsọ a.

14Ẹnyi a hụngụọ a, ku ẹ, nị Chuku-Nẹdi e zihẹgụọ Nwa a d'a wụ Onyẹ-nzụọpụha ụwa.

15Ndị ile sị nị Jesu wụ Nwa Osolobuẹ kẹ Osolobuẹ bi imẹ wẹ, wẹ nwẹn bizikwọ imẹ Osolobuẹ.

16Ẹnyi a marịnọlẹ nwan nị Osolobuẹ nwọn ihiẹn-ọsụsụọ ẹnyi, ẹnyi e giọl'a dọn. Osolobuẹ wụ ihiẹn-ọsụsụọ. Onyẹ hụn gi ihiẹn-ọsụsụọ e bi rị imẹ Osolobuẹ, Osolobuẹ lẹ enwẹn ẹ rị imẹ onyẹ hụ.

17Ibi ẹrịra kẹ ihiẹn-ọsụsụọ e gi zu oke imẹ ndụn ẹnyi, kẹni obi ru ẹnyi alị Ụhụọhịn Okinkin-ikpe, makẹni ẹnyi hụ e bi kẹ ịya imẹ ụwanị.

18Egun ara tụ onyẹ gi ihiẹn-ọsụsụọ e bi — ihiẹn-ọsụsụọ zu oke a chụpụ egun. Onyẹ rị a tụ egun gbakọnị afụnfụn; onyẹ rị a tụ egun enwọn ihiẹn-ọsụsụọ zu oke.

19Ẹnyi rị nwan e nwọn ihiẹn-ọsụsụọ makẹni o buọlẹ ụzọ nwọn ihiẹn-ọsụsụọ ẹnyi.

20Omẹni ịhịan sị, “M nwọn ihiẹn-ọsụsụọ Osolobuẹ,” bụ ọ hụ e ze ize ibe ẹ, onyẹ-ntụ k'ọ wụ. Makẹni, omẹni ịhịan enwọnni ihiẹn-ọsụsụọ ibe ẹ hụn ọ rị e legha, ọ sakọ ẹka nwọn ihiẹn-ọsụsụọ Osolobuẹ o leghatulẹni.

21Iwu o ye ẹnyi wụ ọnwan: onyẹ nwọn ihiẹn-ọsụsụọ Osolobuẹ, ya nwọnzikwọ ihiẹn-ọsụsụọ ibe ẹ.

← Chapter 3 Jump to: Chapter 5 →