1 Thessalonians 1

Ika 2018 Bible

Jump to: Chapter 2 →

1Pọlụ lẹ Sivanọsụ lẹ Timoti de ẹkụkwọ-ozini. Ụka Osolobuẹ Nẹdi ẹnyi lẹ Di-nwọnni-ẹnyi Jesu Kristi rị imẹ Tẹsalonika kẹ ẹnyi rị e dejẹnni ẹ. Ẹfọma lẹ udọn ya rịnị ụnụ.

2Ogẹn ile kẹ ẹnyi gi a kpanmịn Osolobuẹ makẹ ụnụ ile, a kpọ ẹfan ụnụ ogẹn ile ẹnyi gha e mẹ ekpere.

3Ẹnyi hụ a nyanhan ụnụ ihun Osolobuẹ ẹnyi wụ Nẹdi ẹnyi: ihiẹn ile ụnụ rị e gi okukwe ụnụ a rụn, kẹ ụnụ dọn rị a lịlịma makẹni ụnụ nwọn ihiẹn-ọsụsụọ lẹzi kẹ ụnụ dọn rị e gi olilẹnya ụnụ nwọn imẹ Di-nwọnni-ẹnyi wụ Jesu Kristi e dingbu ihiẹn ile.

4Umunẹ ẹnyi rị Osolobuẹ obi, ẹnyi a marịnghọ nị Osolobuẹ a họrịgụọ ụnụ nke-esi.

5Makẹni, oziọma ẹnyi zi ụnụ ẹlẹ oku-ọnụ sụọ, kama, o gizi ikẹn lẹ ihiẹn Mmọn-nsọ e mẹ bịanị ụnụ; ọ nọ ruchanrịn ụnụ akpakalị obi, wechanrịn ụnụ ẹnya nị ezioku k'ọ wụ; ụnụ a marịnzịghọ kẹ ẹnyi dọn bi imẹ igunrun ụnụ kẹni ọ rịnị ụnụ mma.

6Ya kẹ ụnụ ile nọ leri ẹnyi lẹ Onyẹ-nwọnni-ẹnyi, gi ịghọghọ Mmọn-nsọ nabanhan oku-Chuku, ọ sụọn'a n'o wẹhẹni ụnụ afụnfụn ọda-ọda,

7ya kẹ ụnụ nọ wụrụ ndị hụn ndị kwerini rị Masẹdonia lẹ Akaya e leri.

8Oku Onyẹ-nwọnni-ẹnyi a ghagụọ nwan ẹka ụnụ ghagbarị, ẹlẹdẹ imẹ Masẹdonia lẹ Akaya sụọ, kanị ndị rị ebe ile a nụgbarịgụọ kẹ ụnụ dọn nwọn okukwe imẹ Osolobuẹ, nke wụ nị ọrịzịnị mkpa nị ẹnyi kumẹ ẹ.

9Makẹni, wẹ hụ e ku oku ẹnyi — kẹ ụnụ dọn nabanhan ẹnyi ọhụnma-ọhụnma lẹzi kẹ ụnụ dọn febehi mmọn, femẹ ezigbo Osolobuẹ rị ndụn,

10chemẹ Nwa a k'a gha elu-igwee bịa, hụn ọ gha ọnwụn weli, hụn wụ Jesu, onyẹ hụn zụọpụha ẹnyi iwe-lẹ-ọnụma Osolobuẹ lalanị.

Jump to: Chapter 2 →