1 Thessalonians 4

Ika 2018 Bible

← Chapter 3 Jump to: Chapter 5 →

1Umunẹ ẹnyi, igi mẹkin, ẹnyi gi ẹfan Di-nwọnni-ẹnyi wụ Jizọsị a rịọ ụnụ: bisọnmẹ ni obibi hụ ụnụ mụnarịn ẹnyi nị ya a sụọ Osolobuẹ ụsụọ, obibi ahụn ụnụ rị nwan e bi; bikẹnmẹ ni ẹrịra.

2Ụnụ a marịngụọ iwu ndị ẹnyi gi ẹfan Di-nwọnni-ẹnyi wụ Jesu ye ụnụ.

3Makẹni, uche Osolobuẹ wụ nị ụnụ rị nsọ; nị ụnụ jụ ughẹrẹ jụchanrịn;

4nị onyẹ-onyẹ imẹ ụnụ marịn k'o dọn kwọndọn ẹhụ a, dọnmẹ ẹ nsọ, ye ẹ ọghọ,

5ẹlẹ hụn ẹgụn imẹ-mgba e gi e nuhunmẹ ẹ kẹ ndị marịnlẹni Osolobuẹ;

6ịhịan ewerikọ ihiẹn nwẹnẹ ẹ mọbụ mẹgbu nwẹnẹ ẹ imẹ ihiẹnni. Ẹnyi a gwagụọ ụnụ ya mbụ, gba ụnụ mkpịnsịn-ẹka, nị Di-nwọnni-ẹnyi e mẹgwarịkwọ ụdị ihiẹn ndịnị ile e mẹgwarị.

7Makẹni, ẹlẹ obibi ru unyin kẹ Osolobuẹ kpọ ẹnyi d'e bi, kanị obibi rị ọchan.

8Onyẹ jụ nwan n'o gikọ iwu ndịnị bi, ẹlẹ ịhịan k'ọ rị e legberi kanị Osolobuẹ hụn ye ụnụ Mmọn-nsọ a.

9O mẹ nke inwọn ihiẹn-ọsụsụọ ibe ụnụ nọkẹ umunẹ imẹ Kraịstị, ọ rịnị mkpa nị wẹ deni ụnụ ihiẹn ọwụlẹ. Makẹni, Osolobuẹ e gigụọ ẹka a kuzi ụnụ inwọn ihiẹn-ọsụsụọ ibe ụnụ.

10Ezioku-ezioku, ụnụ hụ e nwọn ihiẹn-ọsụsụọ ndị ile kwerini rị Ẹgbẹrẹ Masẹdonia, kanị, ẹnyi rị a rịọ ụnụ, umunẹ, nị ụnụ e mẹkẹnmẹ ẹ,

11nị ụnụ a lịlịma nị ụnụ e bi obibi mẹ jụụ, e bu ẹnya e zinmẹ ọrụn ụnụ, e gi ẹka ụnụ a lụrụ, rịkẹ kẹ ẹnyi dọn gwa ụnụ mbụ,

12kẹni obibi ụnụ e nwọn mgbaye ẹnya ndị rị ogbe, kẹni ụnụ e gizi ẹ a hụn nị onwọnni ihiẹn a kọnị ụnụ.

13Umunẹ, ẹnyi chọ nị ụnụ marịn ihiẹn k'e mẹ ndị rị ụran, ndị nwụnnị, amamgbe ụnụ gha a kwan kẹ ndị-ụwa nwọnlẹni olilẹnya dọn a kwan.

14Makẹni, kẹ ẹnyi dọn kweri nị Jesu nwụnhụn, lihizi, ẹrịra kẹ ẹnyi dọnzi kweri nị Osolobuẹ k'e gi Jesu wekinhẹn ndị hụn kwerinin'ẹ hụn rị ụran.

15Nị ẹnyi gwa ụnụ ọnwan makẹni ya kẹ Di-nwọnni-ẹnyi ku: ẹnyi ndị k'a rị ndụn, ndị kelẹni nwụnhụn, ogẹn Di-nwọnni-ẹnyi k'e gi bịa, ebukọnị ndị ahụn rị ụran ụzọ d'e kunrun Di-nwọnni-ẹnyi.

16Makẹni, o ru ogẹn hụ, Di-nwọnni-ẹnyi k'e gi okẹn olu ku oku, olu onyẹ-isi ndị mmọn-ozi a han, opi Osolobuẹ a han, Di-nwọnni-ẹnyi a gha elu-igwee hidan; ndị nke Kraịstị ranhịngụnị e bu ụzọ gha ọnwụn lihi;

17ogẹn hụ a jụrụ wẹ ẹnyi ndị họdụnị rịkwọ ndụn cheni wẹ, ẹnyi ile e shi imẹ orukpu d'e kunrun Di-nwọnni-ẹnyi imẹ elu, ẹrịra kẹ ẹnyi a dọn buru Di-nwọnni-ẹnyi d'e sọn ẹ nọdị jẹnrin ejẹn.

18E gi ni nwan oku ndịnị a kasị ibe ụnụ obi.

← Chapter 3 Jump to: Chapter 5 →