1 Thessalonians 5

Ika 2018 Bible

← Chapter 4 Jump to:

1O mẹ nke ogẹn lẹ mgbe Di-nwọnni-ẹnyi e gi bịa, umunẹ, ọ rịnị mkpa nị wẹ deni ụnụ ihiẹn ọwụlẹ.

2Makẹni, ụnụ lẹ enwẹn ụnụ a marịngụọ ọhụnma-ọhụnma nị Ụhụọhịn hụ Di-nwọnni-ẹnyi k'e gi bịa, o k'a bịa idẹnmizi kẹ ohin dọn a bịa imẹ abalị.

3Ogẹn ahụn wẹ k'e gi rị a sị, “Udọn a rịgụọ! Nsọngbu arịzị a!” ya kẹ ntikpọ k'e gi kunrun wẹ idẹnmizi, nọkẹ ebe imẹ nọ mẹmẹhụ okpoho! Awanahịnkọ wẹ!

4Kanị umunẹ, ụnụ nwẹn arị imẹ ishi, hụn Ụhụọhịn hụ e gi kunrun ụnụ idẹnmizi nọkẹ ohin.

5Makẹni, ụmụ ukpẹ lẹ ndị e bi ebe eki rị elu kẹ ụnụ wụ; ẹnyi ẹlẹ ụmụ ukinkin mọbụ ụmụ ishi.

6Ya wụ, ẹnyi aranhịnkọ kẹ ndị ọzọ; kama, nị ẹnyi kpachanpụ nị ẹnya, nị ẹnyi dọnrin ẹnya.

7Makẹni uhinhin kẹ ndị a ranhịnnị gi a ranhịn; uhinhin kẹ ndị a ra manya a tụ gizi a ra a tụ.

8Kanị, ebe o mẹni ẹnyi wụ ndị e bi ebe eki rị elu, nị ẹnyi dọnrin ni nwan ẹnya; nị ẹnyi yiri okukwe lẹ ihiẹn-ọsụsụọ kẹ ẹwuru igwe onyẹ-agha gi e gbọndọn obi ẹ, ẹnyi e yiri olilẹnya nzụọpụha nọkẹ okpu onyẹ-agha gi e gbọndọn isi ẹ.

9Makẹni, ẹlẹ afụnfụn kẹ Osolobuẹ tumẹ ẹnyi d'a narịn; ọ kpọ ẹnyi d'e nwọnrin nzụọpụha ghahanị Di-nwọnni-ẹnyi wụ Jesu Kristi.

10Di-nwọnni-ẹnyi wụ Jesu Kristi nwụnnị ẹnyi ọnwụn kẹni ẹnyi hụn ụzọ sọn ẹ bi: ọsụọn'a nị ẹnyi rị ndụn ọsụọn'a nị ẹnyi a nwụnhụngụọ.

11A gba nị nwan ibe ụnụ umẹ, e mẹ ihiẹn ibe ụnụ e gi sue, kẹ ụnụ dọn nwan rị e mẹ.

12Kanị, umunẹ, ẹnyi rị a rịọ ụnụ nị ụnụ gbaye ndị rị a rụnshi ọrụn ikẹn imẹ ụnụ, ndị e lepụ ụnụ ẹnya imẹ Di-nwọnni-ẹnyi, a dụn ụnụ ọdụn.

13E nwọn ni ihiẹn-ọsụsụọ wẹ, e gi ufiri ẹ e ye wẹ mgbaye kachanrịnnị, makẹ ọrụn wẹ rị a rụn. Udọn ya rịsọnmẹ ẹgbata ụnụ lẹ ibe ụnụ.

14Umunẹ, ẹnyi rị a dụn ụnụ ọdụn: a gba nị ndị nọdị mmaka mkpịnsịn-ẹka; a kasị nị ndị-ụjọ obi; e yeni ni ndị zelẹni ẹka; e gi ni ndidin e sọn onyẹ ọwụlẹ.

15Hụn n'a n'o nwọnni onyẹ ọwụlẹ imẹ ụnụ e gi njọ a kụ njọ, kama, a chọ nị nị ụnụ e mẹni ibe ụnụ lẹ ndị ọzọ ile ihiẹn rị mma.

16A ghọghọ nị ogẹn ile.

17E mẹ ni ekpere ogẹn ile.

18E ye ni ekele imẹ ọnọdị ọwụlẹ, makẹni ọnwan kẹ Osolobuẹ chọ ẹka ụnụ imẹ Kraịstị wụ Jesu.

19Etinyụnlẹ ni ihiẹn Mmọn-nsọ rị e mẹ.

20Elelịalẹ ni ibu-amụma lẹ ozi ịhịan gi ẹfan Osolobuẹ zi —

21kama, e lele ni ihiẹn ile, ụnụ e kwọnkẹnmẹ hụn rị mma.

22Gba nị nị ụdị eje-ihiẹn ile ọsọ.

23Osolobuẹ lẹ enwẹn ẹ, onyẹ hụn udọn gha ẹka a bịa, ya dodo dọn ụnụ nsọ ụzọ ile: ya anịlẹ ụnụ nwọn nkọrịanị ọwụlẹ imẹ mmọn ụnụ mọbụ umẹ-ndụn ụnụ mọbụ ẹhụ ụnụ ogẹn Di-nwọnni-ẹnyi wụ Jesu Kristi k'e gi bịa.

24Onyẹ hụn kpọ ụnụ furu wẹ gi e dọn ẹnya, o jẹnkọ d'e mẹ ẹ!

25Umunẹ, e mẹ ni ni ẹnyi ekpere!

26Dide ni umunẹ ẹnyi ile odide rị nsọ.

27M rị e gi ẹfan Di-nwọnni-ẹnyi wụ Jesu a sị ụnụ gụnnị ndị ile kwerini ẹhụhụọ-ozini.

28Ẹfọma Onyẹ-nwọnni-ẹnyi wụ Jesu ya rịnị ụnụ.

← Chapter 4 Jump to: