2 Thessalonians 2

Ika 2018 Bible

← Chapter 1 Jump to: Chapter 3 →

1O mẹ nke ọbịbịa Di-nwọnni-ẹnyi Jesu Kristi lẹ owegbama wẹ jẹnkọ d'e wegbama ẹnyi ile d'e kunrun ẹ, dodo ni umunẹ,

2anịlẹ ni obi gbayịyakẹnrin ụnụ mọbụ nahịn ụnụ nị wẹ sị nị mmọn sị mọbụ nị ịhịan sị mọbụ nị ẹnyi de imẹ ẹkụkwọ-ozi nị Ụhụọhịn Di-nwọnni-ẹnyi a bịagụọlẹ.

3Anịkwọlẹ ni onyẹ ọwụlẹ gi ụzọ ọwụlẹ dufie ụnụ: Ụhụọhịn hụ abịakọ mmanị okẹn nnupụ-isi hụ lalanị bịagụ, e wepụhagụ wẹ Eje-ịhịan hụ, Onyẹ ahụn ntikpọ rị e che.

4O k'e bunụmanị mmọn lẹ iyi ọwụlẹ lẹ ihiẹn ile w'e fe; o sikọ d'e weri enwẹn ẹ nị ịya ka wẹ ile; o sikọ d'e weridẹ ocho imẹ Ụlọ-nsọ Osolobuẹ kpọma enwẹn ẹ Osolobuẹ.

5Ụnụ anyanhanzịnị nị m gwatọ ụnụ ihiẹn ndịnị kẹ mmẹ lẹ ụnụ rị?

6Ụnụ a marịnghọ ihiẹn gin'ẹ nwan o gilẹni ke pụha ifọn, kẹni ogẹn ẹ rugụ ọ pụha.

7Makẹni eje-ihiẹn a rịgụọlẹ nwan ọrụn imẹ nzuzue, kanị, onyẹ hụ rị nwan e gbọndọnn'ẹ k'a rịkwọ e gbọndọn ẹ d'e ru ni e wepụ wẹ hụnyẹ.

8Ogẹn hụ, Eje-ịhịan hụ a pụha. Di-nwọnni-ẹnyi wụ Jizọsị k'e gi uzun k'a gha a ọnụ pụha lẹ ọghọ Di-nwọnni-ẹnyi k'e gi bịa, gbu Eje-ịhịan hụ la iwi.

9Ọbịbịa Eje-ịhịan hụ k'a wụ ẹka-ọrụn Ekwensụ. O k'e gi ikẹn ile rị ichẹn-ichẹn lẹ ihiẹn-nghọsị lẹ ọrụn-atụmẹnya ichẹn-ichẹn wẹ gi e dufie ịhịan bịa,

10ya lẹ ụdị eje-ndufie ile rị ichẹn-ichẹn o k'e dufie ndị lakọ ntikpọ, makẹni anịnị wẹ ezioku weri ọnọdị imẹ obi wẹ, gi ẹ nwọnrin nzụọpụha.

11Makẹni a jụgụọ wẹ ezioku, Osolobuẹ k'e gi ufiri ẹ zihẹni wẹ okẹn ndufie ahụn wẹ jẹnkọ d'e dufie wẹ, hụn k'e mẹ wẹ gi ntụ dọn.

12Osolobuẹ k'e mẹ ẹ kẹn'o gi ẹ ma wẹ ikpe, uwẹ ile gilẹni ezioku dọn, eje-ihiẹn ka a sụọ.

13Kanị, nke ụnụ, umunẹ ẹnyi, ndị rị Di-nwọnni-ẹnyi obi, ẹnyi k'a gha e yerịrị Osolobuẹ ekele makẹ ufiri ụnụ. Makẹni, Osolobuẹ họtọ ụnụ isi mbidọn nọkẹ ihiẹn-ugbo ibuzọ, kẹni ụnụ nwọn nzụọpụha, ghahanị odidọn-nsọ Mmọn-nsọ lẹ ikwerini ezioku.

14Ịya kẹ Osolobuẹ kpọnị nwan ụnụ ghahanị oziọma ẹnyi zi ụnụ, kẹni ụnụ sọn Di-nwọnni-ẹnyi wụ Jesu Kristi nwọnrin ọghọ a.

15Wuzokẹnmẹ ni nwan, umunẹ, e kwọnkẹnmẹni ihiẹn ile ẹnyi kuzi ụnụ — kẹ hụn ẹnyi gi ọnụ kuzi kẹ hụn ẹnyi gi ẹkụkwọ-ozi kuzi.

16Di-nwọnni-ẹnyi Jesu Kristi lẹ enwẹn ẹ lẹ Chuku Nẹdi ẹnyi hụn gi ihiẹn-ọsụsụọ o nwọn ebe ẹnyi rị mẹni ẹnyi ọhụnma ye ẹnyi nkasị-obi itẹbitẹ lẹ olilẹnya rị mma,

17dodo kasị nwan onyẹ-onyẹ imẹ ụnụ obi, mẹ obi ụnụ zekẹnmẹ, ebe oku-ọnụ lẹ ọrụn ọwụlẹ rị mma rị.

← Chapter 1 Jump to: Chapter 3 →