2 Thessalonians 3

Ika 2018 Bible

← Chapter 2 Jump to:

1Umunẹ, nke ikpanzụụn rịn'a wụ ọnwan: e mẹni ni ẹnyi ekpere, nị oku Di-nwọnni-ẹnyi hụn ụzọ ghagbarị ẹgwa; ni w'a gbaye ẹ ebe ile kẹ ụnụ dọn mẹ imẹ igunrun ụnụ.

2E mẹzikwọ nị nị ẹnyi ekpere ni Osolobuẹ gbapụha ẹnyi ẹka ndị eje-obi lẹ ndị-ejẹ, makẹni ẹlẹ ịhịan ile gi nke Osolobuẹ e dọn.

3Kanị, Di-nwọnni-ẹnyi furu onyẹ wẹ gi e dọn ẹnya; o k'e mẹ ụnụ zekẹnmẹ, dọnmẹ ụnụ makẹ Eje-onyẹ hụ gha e mẹ ụnụ ihiẹn ọwụlẹ.

4Obi ru ẹnyi alị makẹ Di-nwọnni-ẹnyi nị ụnụ hụ e mẹ ihiẹn ẹnyi sị ụnụ mẹ, nị ụnụ k'e mẹsọnmẹzi wẹ.

5Di-nwọnni-ẹnyi ya dodo du obi ụnụ ile ye ihiẹn-ọsụsụọ Osolobuẹ lẹ okẹn-ndidin Kraịstị.

6Umunẹ, ẹnyi gi nwan ẹfan Di-nwọnni-ẹnyi Jizọs Kraịstị e ye ụnụ iwuni: esọnlẹ ni onyẹ Itu-Kraịstị ọwụlẹ ẹka kụtọpụ — ghalẹni e gi ihiẹn ẹnyi gwa ụnụ e bi.

7Makẹni ụnụ a marịnghọ n'o furu nị ụnụ leri ẹnyi. Ẹka akụtọpụnị ẹnyi kẹ ẹnyi lẹ ụnụ rị;

8onwọnni onyẹ ẹnyi narịn ihiẹn-oriri ọfẹ. Ẹnyi a rụngbu enwẹn ẹnyi uhinhin lẹ efinnaị, amamgbe ẹnyi a wụrụnị ịhịan ibu imẹ igunrun ụnụ.

9Ẹlẹkwọ nị o runi ẹnyi. Mba, ihiẹn runi ẹnyi rọ. Kanị, ẹnyi mẹ ẹrịra kẹni ẹnyi ghọsị ụnụ ihiẹn ụnụ e leri e bi.

10Kẹ ogẹn ẹnyi gidẹ rị imẹ igunrun ụnụ, ọnwan wụ iwu ẹnyi ye ụnụ: “Onyẹ jụ n'ọ rụnkọ, y'e rilẹ.”

11Kanị, ẹnyi a nụgụọ nị ẹka kụtọpụ ụfọdụ imẹ ụnụ: onwọnni ihiẹn w'a rụn, wẹ rị a ghahunmẹ a rụn ọrụn wẹ zilẹni wẹ.

12Ẹnyi gi ẹfan Di-nwọnni-ẹnyi wụ Jesu e ye ndị nọ ẹrịra iwu, a dụn wẹ ọdụn: wẹ nwọn ihiẹn ẹka kụma wẹ; wẹ gi ẹka wẹ a lụrụ ihiẹn wẹ e gi bi.

13Nke ụnụ, umunẹ, ndụn imẹ ihiẹn rị mma agụkwọlẹ ụnụ.

14Onyẹ gbayelẹni ihiẹnni ẹnyi rị nwan e deni ụnụ, ụnụ a kọma a ẹnya, gban'a ọsọ kẹni ifẹnrẹn mẹ ẹ.

15Ewerikwọlẹ n'a kẹ eṅẹnrẹn, ka a gba n'a mkpịnsịn-ẹka kẹ nwẹnẹ.

16Di-nwọnni-ẹnyi lẹ enwẹn ẹ, Onyẹ hụn udọn gha ẹka a a bịa, ya ye ụnụ udọn ogẹn ile lẹ ụzọ ile. Di-nwọnni-ẹnyi ya nọyeni ụnụ ile.

17Mmẹ wụ Pọlụ gi ẹka m de ekeleni. Ẹnịna kẹ m'e biye ẹkụkwọ-ozi m ile ẹka. Ẹka m rọ.

18Ẹfọma Di-nwọnni-ẹnyi Jesu ya rịnị ụnụ ile.

← Chapter 2 Jump to: