Daniel 1

Ika 2018 Bible

Jump to: Chapter 2 →

1Imẹ ahụa nke ẹtọ Jehoyakim wụ eze Juda kịma, Nebukadineza wụ eze Babilọnụ nọ bịa Jerusalẹm, gi ndị-agha a kehunmẹ ẹ.

2Osolobuẹ nọ bu Jehoyakim eze Juda che ẹ ẹka, nịzị a kịrị arịa ndị ọ kịrị imẹ Ụlọ-nsọ Chuku, ọ nọ buru ihiẹn ndịnị shi ụnọ-mmọn a rị Babilọnụ, bu wẹ che ebe w'e dọnmẹ ihiẹn rị mkpa imẹ ụlọ-mmọn a.

3Ya Nebukadineza nọ sị Ashịpẹnazị hụn wụ onyẹ-isi ndị-ọrụn eze ya họrị ịhịan imẹ ndị Izrẹlụ hụ wẹ kpụnlụa — ya nọ imẹ ndị ikpụlọ eze rịn'a lẹ ndị-isi họrị wẹ —

4ikorọbịa ndị ẹhụ zu oke, ma mma ẹhụ, ndị ghọsị nị wẹ k'a saẹka mụ ụdị ihiẹn ọwụlẹ wẹ kuzi wẹ, ndị marịn ihiẹn rị e mẹni, ndị a ghọtakẹnrinni, ndị furu hụn a rụn ọrụn imẹ obi-eze. Nebukadineza sị a kuzi wẹ ẹkụkwọ lẹ asụsụ ndị Kal'di, ndị Babilọnụ.

5Eze wụ Nebukadineza nọ sị wẹ a nọ ezigbo ihiẹn-oriri lẹ manya wẹ e butọn'a e weri e ye wẹ e ri ụhụọhịn-ụhụọhịn. Ahụa ẹtọ kẹ wẹ k'a kuzi wẹ; ahụa ẹtọ hụ zugụ, a rụnmanị wẹ eze ọrụn.

6Ndịnị wụ ndị Juda rị imẹ wẹ: Daniẹlụ, Hanania, Mishẹlụ lẹ Azaria.

7Onyẹ-isi ndị ọrụn Nebukadineza hụ nọ gụn onyẹ-onyẹ imẹ wẹ ẹfan ọzọ: ẹfan ọ gụn Daniẹlụ wụ “Bẹlụtẹshaza”, gụn Hanania “Shẹdrakị”, gụn Mishẹlụ “Mishakị”, gụn Azaria “Abẹdnego”.

8Kanị, Daniẹlụ nọ jụ n'o rikọ ihiẹn-oriri lẹ manya eze hụ, mẹrụ enwẹn ẹ; ya ọ nọ sị onyẹ-isi hụ ya dodo gụnpụ a, n'ọ chọnị n'o mẹrụ enwẹn ẹ.

9Ogẹnni, Chuku e mẹtụgụọ onyẹ-isi hụ ẹka obi n'ọ hụn ụzọ mẹni Daniẹlụ omikẹn —

10ya onyẹ-isi hụ nọ sị Daniẹlụ, “Egun eze nwọnni m rị a tu m, makẹni o gigụọ ọnụ a ku ihiẹn ụnụ jẹnkọ d'a gha e ri, a ra. Ọ hụn a nwan nị ẹhụ ụnụ e duni kẹ nke ibe ụnụ, o gikọ ufiri ụnụ bepụ m isi?”

11Ya Daniẹlụ nọ nwan sị onyẹ-nche hụn onyẹ-isi wụ Ashịpẹnazị buche Daniẹlụ lẹ Hanania lẹ Mishẹlụ lẹ Azaria okpuru ẹ,

12“Dodo, gi akpọhịn iri lele ẹnyi ndị idibo i: e yehụ ẹnyi ihiẹn-ugbo e ri, e ye ẹnyi mirin mmaka a ra,

13omẹgụ y'e lele ẹhụ ẹnyi lẹ ẹhụ ikorọbịa ndị hụ rị e ri ihiẹn-oriri eze, y'e gi ihiẹn ị hụn sọn ẹnyi.”

14Ọ nọ kweyeni Daniẹlụ, gi akpọhịn iri hụ lele wẹ.

15Nke akpọhịn iri hụ, uwẹ kẹ ẹhụ ka ikẹn a rị, uwẹ ka e tutu, karị ikorọbịa ile gbegbegbe rị e ri ihiẹn-oriri eze.

16Ya onyẹ-nche hụ nọlẹni ye wẹ ezigbo ihiẹn-oriri hụ lẹ manya wẹ te k'a gha a ra, ọ nọ yemẹ wẹ ihiẹn-ugbo sụọ.

17Chuku ye ikorọbịa ẹnọnị ikẹn wẹ gi a mụ ihiẹn lẹ hụn wẹ gi a ghọta ẹkụkwọ ile lẹ ihiẹn ile w'a mụ a mụ. Daniẹlụ nkẹ a ghọta ọhụn ile lẹ nrọ ile.

18Ogẹn eze ye nị wẹ gi zụn wẹ wẹhẹ e zu, onyẹ-isi ndị-ọrụn eze hụ nọ we wẹ jẹnni eze wụ Nebukadineza.

19Eze nọ du wẹ ku, ọ nọ hụn a nị onwọnni onyẹ wẹ e gi jeni Daniẹlụ, Hanania, Mishẹlụ lẹ Azaria; ya wẹ nọ rụnmanị eze ọrụn.

20Imẹ ihiẹn ile w'a mụ amụ lẹ hụn chọ nghọta, ọ hụn a nị wẹ gi mgbe iri ka ndị-ihẹnrẹn lẹ ndị ile a gwọ ọgụn rị alị-eze ẹ ihiẹn a marịn.

21Daniẹlụ nọdị ebẹhụ fe eze Babilọnụ ndị kịnị d'e ru ahụa ibuzọ eze wụ Saịrọsị kịma.

Jump to: Chapter 2 →