bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Ika
/
Ika 2018 Bible
/
Daniel 5
Daniel 5
Ika 2018 Bible
← Chapter 4
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 6 →
1
Ogẹn Bẹlụshaza gi wụ eze Babilọnụ, ọ nọ kpọnị ndị-isi ọgụn-iri kwasị nnụnaị (1,000) e sọn ẹ a kị oriri hi ogbe; ọ hụ e du wẹ a ra manya.
2
Ogẹn manya gi tụma a ẹkẹrẹ-ẹkẹrẹ, ọ nọ sị wẹ wẹhẹ mkpu goru lẹ siliva ndị hụn nẹdi ẹ wụ Nebukadineza weri imẹ Ụlọ-nsọ rị Jerusalẹm. Bẹlụshaza sị wẹ kịha wẹ kẹni ya nwẹn wụ eze lẹ ndị-isi ẹ lẹ inyẹnmẹ ẹ lẹ ndị mgba a hụn ụzọ gi wẹ ra manya.
3
Ya wẹ nọ kịha mkpu goru ndị hụ wẹ weri imẹ Ụlọ-nsọ Chuku imẹ Jerusalẹm, eze lẹ ndị-isi lẹ inyẹnmẹ eze lẹ ndị mgba a nọ gi wẹ ra manya.
4
Wẹ hụ a ra manya hụ, wẹ hụ a ja mmọn rị ichẹn-ichẹn mma — kẹ nke goru kẹ nke siliva kẹ nke igwe-bronzu kẹ nke igwe-mmaka kẹ nke osisi kẹ nke ọmụma.
5
Idẹnmizi ẹka ịhịan nọ pụha, demẹ ihiẹn ye ụsụọ ẹjan wẹ te hụn nọkunmẹ ukpẹ rị imẹ obi-eze hụ. Eze hụ e lee ẹka hụ k'ọ rị e de ihiẹn ahụn.
6
Ezigbo egun nọ tụma a — o tirapụ ẹnya, obi a nahịn a, ọ sazịnị ẹka turu, mkpụkụ hụ a kụgbama.
7
Eze nọ yi wẹ kpọha ndị a gwọ ọgụn lẹ ndị ile a hụn ụzọ ozigbo, wẹ lẹ ndị a gba-ẹfa. Ọ nọ sị ndị ahụn ile a hụn ụzọ imẹ Babilọnụ, “Onyẹ ọwụlẹ hụn k'a sa ẹka gụn ihiẹnni wẹ de, kọwanị m ihiẹn ọ wụ, wẹ k'e yimẹ ẹ okẹn ẹwuru pọpụ, yimẹ ẹ ihiẹn-olu goru, ọ wụrụ ube-ẹtọ imẹ alị-ezeni.”
8
Ya ndị ile a hụnnị eze ụzọ nọ banhan, kanị asanị wẹ ẹka gụn ihiẹn hụ wẹ de, asanị wẹ ẹka gwa eze ihiẹn ọ wụ.
9
Obi nọ nahịn eze wụ Bẹlụshaza, o tirapụ ẹnya. Ndụn nọ gụ ndị-isi hụ ya lẹ wẹ rị.
10
Ogẹn nnẹ eze gi nụ ụzụn eze lẹ ndị-isi rị a zụn, ọ nọ banhan imẹ ebẹhụ wẹ nọ e ri oriri hụ. Ya ọ nọ sị, “Eze-Agụ, isi i chei! Atụlẹ egun! Kwọndọn obi i!
11
O nwọnghọ okẹnnyẹ rị alị-eze i hụn nwọn mmọn rị nsọ imẹ ẹ. Ogẹn nẹdi i gi a kị, wẹ hụn a n'o nwọn nghọta, nwọn uche, nwọn amamihiẹn — nọkẹ mmọn. Eze wụ Nebukadineza hụn wụ nẹdi i, nẹdi i ebe oche-eze rị — tumẹ ẹ onyẹ-isi ndị-ihẹnrẹn lẹ ndị a gwọ ọgụn lẹ ndị ile a hụn ụzọ lẹ ndị a gba ẹfa; ẹghẹẹ nẹdi i tumẹ ẹ.
12
Wẹ hụn a nị okẹnnyẹni wụ Daniẹlụ, hụn eze kpọ Bẹlụtẹshaza, e nwọnkẹ uche, amamihiẹn lẹ nghọta; ọ sazị ẹka a kọwa nrọ lẹ ilu, a marịn ihiẹn a fụ ọrụn ọmarịn. Kpọ a nwan, o k'a kọwan'ị ihiẹn ahụn wẹ de.”
13
Ya wẹ nọ wẹhẹ Daniẹlụ ihun eze. Eze nọ sị a, “Ịyụ wụ Daniẹlụ, onyẹ ohu imẹ ndị hụ eze nẹdi m gha Juda kpụnhan?
14
A nụọlẹ m nị mmọn Osolobuẹ rị imẹ i, lẹni i nwọn nghọta, nwọn uche, nwọnzikwọ amamihiẹn pụ-ichẹn.
15
E wẹhẹgụọnị wẹ m ndị a hụn ụzọ lẹ ndị a gwọ ọgụn nị wẹ gụn ihiẹnni wẹ de ẹhụ-ẹjan, kọwanị m ihiẹn ọ wụ, asanị wẹ ẹka.
16
Kanị, a nụgụọ m nwan nị ya s'ẹka a kọwa ihiẹn lẹni ya s'ẹka a marịn ihiẹn a fụ ọrụn ọmarịn. Omẹni i y'a saghọ ẹka gụn ihiẹnni kọwanị m ihiẹn ọ wụ, wẹ k'e yimẹ i okẹn ẹwuru pọpụ, yimẹ i ihiẹn olu goru, bu i che ọbẹ ẹtọ imẹ ndị a kị alị-ezeni.”
17
Ya Daniẹlụ nọ sị eze, “Dọnmẹrin ihiẹn ị chọ n'i ye m; we ihiẹn ị chọ n'i gi kụ m ụgwọ ye onyẹ ọzọ. K'osilẹrị, m k'a gụnnị eze ihiẹn hụ, kọwan'a ya.
18
“Eze-Agụ, Chuku Hụn Kachanrịnnị ye nẹdi i wụ Nebukadineza ọkịkị, mẹ ẹ wụrụ okẹn ịhịan, ye ẹ ọghọ lẹ ikpẹn.
19
Ufiri okẹn ọnọdị hụ o ye ẹ haịn ndị ile rị ichẹn-ichẹn lẹ ndị alị ile lẹ asụsụ ile gi a man'a piripiri ogẹn nke ẹ, a tụ egun ẹ. Ndị ọ chọ n'o gbu, o gbu; ndị ọ chọ n'o dọnmẹ ndụn, o dọnmẹ ndụn; ndị ọ chọ n'o bushi elu, o bushi; ndị ọ chọ n'o wetu alị, o wetu.
20
Kanị, ogẹn o gi họnrọnma, kpọkin obi ẹ ebe ọ rị a pache, wẹ nọ wepụ a ukpo-eze ẹ, napụ a ọghọ a,
21
mẹ ẹ pụ ebe ịhịan rị, we uche anụmanụ ye ẹ; o sọn jaki-ọfịa biri, ri irurue kẹ efin; igirigi igwere e ziẹnkpu ẹ, d'e ru ebe ọ nọ we ẹ ẹnya nị alị-eze ile ịhịan pumẹ rị Chuku Hụn Kachanrịnnị ẹka, lẹni Chuku e tumẹ onyẹ ọwụlẹ ọ chọ n'ọ kị wẹ.
22
“Kanị, ịyụ nwẹn wụ Bẹlụshaza nwa a ewelụanị enwẹn i alị, ọ sụọn'a nị y'a marịngụọ ihiẹnni ile.
23
Ị nọ bushimẹdẹ enwẹn i elu ebe Onyẹ nwọn elu-igwee rị, sị wẹ kịhanị ị mkpu ndị wẹ weri imẹ Ụlọ-nsọ a, ịyụ lẹ ndị-isi lẹ inyẹnmẹ i lẹ ndị mgba ị nọ gi wẹ ra manya; ị nọ jama mmọn ichẹn-ichẹn mma — kẹ nke goru kẹ nke siliva kẹ nke igwe-bronzu kẹ nke igwe-mmaka kẹ nke osisi kẹ nke ọmụma — mmọn ndị hụn ghalẹni e legha ụzọ mọbụ a nụ ihiẹn mọbụ a ghọta ihiẹn. Bụ y'e yeni Chuku ọghọ — Chuku, hụn gi ndụn ị lẹ ọpụpụ ị lẹ ọbanhan i.
24
Ya haịn o gi nwan zihẹ ẹka hụ de ihiẹn hụ.
25
“Ọnwan wụ ihiẹn o de: “ ‘MẸNẸ, MẸNẸ, TẸKẸLỤ, FASINI.’
26
“Lee ihiẹn nkpụrụ-oku ndị ahụn wụ: “MẸNẸ wụ: Chuku a gụngụọ akpọhịn ole ị k'a kị, sị n'o higụọ.
27
“TẸKẸLỤ wụ: e gigụọ wẹ ihiẹn wẹ gi e lele ihiẹn lele i, y'a dan.
28
“FASINI wụ: E kebegụọ wẹ alị-eze i, we ẹ ye ndị Mẹdịa-lẹ-Pẹshịa.”
29
Bẹlụshaza nọ gwa wẹ, wẹ nọ yimẹ Daniẹlụ okẹn ẹwuru pọpụ, yimẹ ẹ ihiẹn olu goru, ma ọkwa nị ịya wụ nwan ube-ẹtọ imẹ ndị a kị alị-eze hụ.
30
Uhinhin ahụn daị kẹ wẹ gbu Bẹlụshaza eze ndị Babilọnụ.
31
Dariọsụ onyẹ Mẹdịa nọ weri alị-eze hụ kịma, ebe ọ rị nwa ahụa ẹbụọ kwasị ọgụn-ẹtọ.
← Chapter 4
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 6 →
All chapters:
1
2
3
4
5
6
7
8
9
10
11
12