James 2

Ika 2018 Bible

← Chapter 1 Jump to: Chapter 3 →

1Umunẹ m, egbeyelẹni ni ịhịan ebe o mẹni ụnụ e fe Di-nwọnni-ẹnyi wụ Jesu Kristi, Onyẹ ahụn kachanrịnnị.

2Omẹni ịhịan yi ẹkwa rị mma ṅanrannị lẹ ọla goru banhan ebe ụnụ rị e zu, nị ogbẹnnyẹ yi ẹkwa rịlẹni mma kaka a banhanzịkwọ ebẹhụ,

3nị ụnụ a gbaye hụn kẹn ekikẹn rị mma, sị a, “Dodo, nọdị alị ocheni rị mma,” sị hụn ogbẹnnyẹ, “Wuzo ebẹhụ,” mọbụ “Nọdị alị akpakalị ebeni ụkụ m rị,”

4ọhụn a ghọsịgụọnị nị ụnụ e gbeyeni ịhịan imẹ igunrun ụnụ, e gi eje-obi e mẹ ihiẹn ụnụ?

5Ezigbo umunẹ m m bu obi, gọn ni ntịn! Osolobuẹ a họrịgụọnị ndị wụ igbẹnnyẹ imẹ ụwanị mẹ wẹ wụrụ ndị-ịdanfịn imẹ okukwe, wụrụzị ndị k'a banye Alị-eze hụ o kwe nkwa n'o k'e ye ndị ihiẹn ẹ a sụọ?

6Bụ ụnụ hụ e legberi ndị-igbẹnnyẹ! Ẹlẹ ndị-ịdanfịn a bịangbu ụnụ? Ẹlẹ wẹ a dọjẹn ụnụ ọgwa?

7Ẹlẹ wẹ e kuja oku ezigbo ẹfan Jesu ụnụ rị a za?

8Omẹni ụnụ e dọnmẹghọ iwu hụ Eze ye kẹ wẹ dọn de ẹ imẹ Ẹkụkwọ-nsọ, sị, “Ihiẹn ibe i ya sụọ ị kẹ ihiẹn i dọn a sụọ ị,” nkẹ ọ rịka mma.

9Kanị, omẹni ụnụ e gbeyeni ịhịan, njọ kẹ ụnụ rị e mẹ, ikpe a maọlẹ ụnụ makẹni ụnụ rị a dan iwu.

10Makẹni, onyẹ dọnmẹchanrịn iwu ile, dan ohu, a danchanrịnọlẹ iwu ile.

11Makẹni, Osolobuẹ ahụn sị, “Aghẹrẹlẹ,” ịya sịzịkwọ, “Egbulẹ ọchụn.” O mẹ nwan nị y'a ghẹrẹni bụ y'e gbughọ ọchụn, y'a danchanrịngụọ iwu ile.

12Ya wụ, kẹ oku-ọnụ kẹ omumẹ, e mẹchanrịn nị wẹ kẹ ndị wẹ k'e gi iwu e mẹ ịhịan e nwọnrin enwẹn ẹ kin ikpe:

13onyẹ ghalẹni e mẹ omikẹn, emẹkọnị w'a omikẹn wẹ gha e kin ẹ ikpe. Omikẹn e mẹri ikpe-ọmụma.

14Umunẹ, elee erere k'ọ ban nị ịhịan sị n'o nwọn okukwe, bụ o gin'ẹ rụn ọrụn? Nị okukwe ahụn saẹka zụọpụha a?

15Omẹni ẹkwa ezuni onyẹ nke Kraịstị ibe i ukun mọbụ ihiẹn o k'e ri ụhụọhịn hụ arịa:

16ị sị a, “Ihiẹn e mẹ i! Oyi atụkwọlẹ i! Rijunkwọ ẹfọ!” Bụ y'e yenin'ẹ ẹka, elee erere k'ọ ban?

17Ẹrịrazịkwọ, okukwe wẹ gilẹni rụn ọrụn a nwụnhụngụọ.

18Kanị, o nwọn onyẹ k'a sị, “Nke i wụ okukwe, nke m wụ ọrụn.” Azịza m wụ, “Ghọsị m okukwe i ahụn i gilẹni rụn ọrụn. Mmẹ nwẹn, m jẹnkọ d'e gi ọrụn m ghọsị ị okukwe m.”

19Y'e nwọnghọ okukwe i gi kweri nị Osolobuẹ ohu sụọ rị, ẹlẹ ịya? Y'e mẹkẹ! Eje-mmọn nkẹ e nwọnzighọ okukwe wẹ gi kweri! Ya haịn wẹ gi a ma piripiri!

20Onyẹ-nzuzu! Ị chọ nị wẹ ghọsị ị nị okukwe wẹ gilẹni rụn ọrụn a nwụnhụngụọ?

21Ẹlẹ ihiẹn nẹdi ẹnyi wụ Ebraham rụn kẹ Osolobuẹ gi kun'ẹ ọhụnma, ogẹn hụ o gi wẹhẹ nwa a wụ Aziki ukpo nchụn-ẹjan hụ, n'o gi ẹ chụn ẹjan?

22Y'a hụn a? Okukwe ẹ lẹ ihiẹn o mẹ gba rụn ọrụn; ihiẹn o mẹ kẹ okukwe ẹ gi zu oke.

23Ya kẹ ihiẹn hụ Ẹkụkwọ-nsọ ku nọ mẹ: nị “Ebraham kweyeni Osolobuẹ, Osolobuẹ nọ gụn a yen'ẹ, kpọ a onyẹ ezi-omumẹ, kpọ a ọwụ Osolobuẹ.”

24Y'a hụn a nwan nị ihiẹn onyẹ rụn kẹ Osolobuẹ gi e kun'ẹ ọhụnma, ẹlẹ okukwe sụọ!

25Ẹlẹ ẹrịra kẹ Osolobuẹ dọnzi kuni ịgbaraja hụ wụ Rehabụ ọhụnma yeni ọrụn a, ogẹn hụ o gi nabanhan ndị Joshụa zi d'e gi nzuzue lele alị Jẹriko, o zuemẹ wẹ, ghọsị wẹ ụzọ wẹ gha la?

26Ya wụ, kẹ ẹhụ mmọn rịlẹni dọn wụ ihiẹn nwụnnị, ẹrịra kẹ okukwe ọrụn rịlẹni dọnzikwọ wụ ihiẹn nwụnnị.

← Chapter 1 Jump to: Chapter 3 →