James 3

Ika 2018 Bible

← Chapter 2 Jump to: Chapter 4 →

1Umunẹ m, emẹlẹ ni ndị-nkuzi, ndị-nkuzi, makẹni ụnụ a marịnghọ nị ikpe wẹ k'e kin ẹnyi ndị-nkuzi k'a ka ikẹn.

2Ọ rụnahịn ẹnyi ile arụnahịn. Onyẹ oku-ọnụ ghalẹni a rụnahịn e zugụọ oke: n'ọ sazịghọ ẹka kwọndọnchanrịn ẹhụ a ile.

3Ọnụ ẹshin sụọ kẹ ẹnyi e kẹnmẹhụ, ẹhụ a ile a nị ẹnyi a kị.

4Lezidẹ ụgbọ-mirin: ọsụọn'a nị e hikẹ wẹ ogbe, ọsụọn'a nị okẹn ufere sụọ nwọn e bu wẹ, ihiẹn mẹhụ ẹkẹrẹ kẹ onyẹ a nyann'a gi a fị a e shi ebe ọwụlẹ ọ chọ.

5Ẹrịra kẹ ire rị: mkpamkpa ẹhụ mẹ ẹkẹrẹ rọ, kanị o kukarị enwẹn ẹ! Ledẹ ọkụn mẹ ẹkẹrẹ a dụnpụ ẹgboko!

6Ire wụ ọkụn nke-esi. Ọ nọhụ kẹ ebe wẹ nọ bu njọ han kẹ ụwa ile che ẹnyi ẹhụ! O ruchanrịn ẹhụ ile unyin! Ọ dụnkwama ndụn ịhịan ọkụn. Ọkụn ire gi a dụn a gha ọkụn-mmọn a bịa.

7Onwọnni anụ ọwụlẹ a kpa alị mọbụ hụn a rịnị mọbụ hụn rị ohimin mọbụ nnụnụ ịhịan kelẹni zụntu mọbụ hụn wẹ ghalẹni a sa ẹka a zụn.

8Kanị, onwọnni onyẹ wụ ịhịan hụn a sa ẹka a zụn ire. Eje-ihiẹn ghalẹni e zu ikẹn k'ọ wụ. Eje-nshi e gbu ịhịan jun imẹ ẹ.

9Ịya kẹ ẹnyi gi a ja Di-nwọnni-ẹnyi wụ Nẹdi ẹnyi mma; ịya kẹ ẹnyi gizi a bụ ịhịan ọnụ, ịhịan Osolobuẹ leri enwẹn ẹ ke!

10Ọnụ ohu hụ kẹ ọjịja-mma lẹ ịbụ-ọnụ gha a pụha! Umunẹ m, o furuni n'ọ rị ẹrịra.

11Isi-mirin a ghazịdẹ nwan ọnụ ohu a mụpụha mirin rị mma a sụọ ọhụnma lẹ mirin e lu ilu ra?

12Umunẹ m, figi a mịdẹ nwan olivu ra? Vaịnị a mịdẹ nwan figi ra? Isi-mirin hụn mirin ẹ a sụọ nnu-nnu asakọ ẹka mụpụha mirin a sụọ ọhụnma.

13Onyẹ marịn ihiẹn nke-esi imẹ igunrun ụnụ? Onyẹ nwọn nghọta? Ya gi obibi rị mma lẹ iwelụa enwẹn ẹ alị ghọsị amamihiẹn ẹ.

14Kanị, omẹni eje ẹnya-ụfụ lẹ nke-i nke-i rị ị obi, egikwọlẹ ịban-mban lẹ ntụ zuemẹ ezioku rịn'a.

15Amamihiẹn nọ ẹrịra aghakwọnị elu-igwee bịa! Nke ụwa rọ, ẹka Mmọn-nsọ arịa; nke Ekwensụ rọ.

16Makẹni ebe ọwụlẹ ẹnya-ụfụ lẹ nke-m nke-m rị, ebẹhụ kẹ wẹ nọ a hụnzị isusu lẹ eje-ihiẹn ile rị ichẹn-ichẹn.

17O mẹ nke amamihiẹn ahụn gha elu-igwee bịa, nke ibuzọ wụ nị ya lẹ obi rị ọchan wị, udọn k'ọ chọ, ara mẹ ikẹn-ikẹn; o kweyezini ndị ọzọ, omikẹn lẹ mkpụrụ rị mma jun ẹ, ara gbeyeni ịhịan, ntụ arịa.

18Ndị-udọn ma gi udọn kụn mkpụrụ, ọ mịpụha ezi-omumẹ.

← Chapter 2 Jump to: Chapter 4 →