Lamentations 1

Ika 2018 Bible

Jump to: Chapter 2 →

1Euu, obodo nwẹn a gba okpokoro! Obodo nwẹn ịhịan te jun! Ledẹ k'ọ nọ kẹ okpoho di nwụnnahịn — obodo hụn te wụ okẹn obodo imẹ alị ichẹn-ichẹn! Obodo hụn te wụ eze-okpoho imẹ ẹgbẹrẹ rị ichẹn-ichẹn, e họnnringụọ nwan igbọn!

2Ọ hụ a kwan ntan a kwan-imọn imẹ uhinhin, ẹnya-mirin e jun ẹ nti. Imẹ ndị ile ya lẹ wẹ gba a sụọ, onwọnni hụn a hụhụn'a. Ndị ọwụ a ile e regụọ a; e họnringụọ wẹ ndị-iṅẹnrẹn ẹ!

3E mẹshigụ wẹ alị Juda ikẹn, mẹ ẹ rụngbu enwẹn ẹ, wẹ nọ kpụn Juda shi alị ọzọ. O bi nwan alị ndị ọzọ rị ichẹn-ichẹn; ọ hụnnị ebe ẹhụ nọ fụ ẹ. Ndị ile chụkọn'a e kunrungụọ a k'ọ rị imẹ nsọngbu.

4Ụzọ ile wẹ gha e jẹn Zayọnụ rịdẹ a kwan, makẹni onwọnni onyẹ a ghazị wẹ a bịa mmẹmmẹ nsọ. Ọnụ-mgbọn ẹ ile a gba okpokoro, ndị nchụn-ẹjan rịn'a hụ a sụn udẹn, ịgbagba rịn'a hụ a kwan, okẹn ụya kẹ Zayọnụ rị e ri.

5Ndị iṅẹnrẹn ẹ a kịmagụọ a; ẹhụ fu ndị-iṅẹnrẹn ẹ. Osolobuẹ e wẹhẹgụọn'a ẹkwan yeni njọ bu ọda o mẹ. A kpụngụọ wẹ ụmụ a la alị ndị ọzọ — ndị iṅẹnrẹn wẹ gi wẹ nwan e gi.

6Ọghọnẹi ile Nwa-Zayọnụ nwọn a nahịnchanrịngụọ a. Ndị ọkịkị a nọ kẹ ele hụn hụnlẹni ẹfịfịa ri; e gi wẹ ufiri ndụn-ọgụgụọ gba ọsọ — gbanị ndị chụkọnị wẹ ọsọ.

7Hụnnị Jerusalẹm rị a hụnjun ẹnya, a wahunmẹ, ọ hụ a nyanhan ihiẹn ile rị mkpa hụn o nwọn ogẹn mbụ. Ogẹn ndị nke ẹ gi danban ẹka eṅẹnrẹn, onwọnni onyẹ yen'ẹ ẹka. Ndị-iṅẹnrẹn ẹ e legụ a, wẹ nọ mụ a ẹmụ otikpọ wẹ tikpọ a.

8Jerusalẹm e mẹọlẹ okẹn njọ, o gigụ a nwan rụ. Ndị ile hụn te a gbaye ẹ rị nwan e legberi ẹ, makẹni a hụngụọ wẹ ọtọ a; ya nwẹn rị nwan a sụn udẹn, e bupụ ihun.

9Unyin hụn o ru ratọdẹ ẹkwa a — kanị o rodẹni ihiẹn k'e mẹn'ẹ ihun. Ọ nọ dan eje ẹdan, onwọnni onyẹ hụhụn'a. Euu Osolobuẹ, ledẹ afụnfụn m rị imẹ ẹ, nị hụn a nị eṅẹnrẹn e mẹrigụọ!

10Eṅẹnrẹn e bu ẹka che ihiẹn ile rị mkpa o dọnmẹ; ọ hụnghọdẹ kẹ ndị a rụa mmọn banye ụlọ-nsọ a — ndị hụn ị sị nị abanyekọ wẹ igunrun ndị nke i.

11Ndị Juda ile hụ a sụn udẹn, ebe wẹ rị a chọ ihiẹn-oriri; e gi wẹ ihiẹn ndị rị mkpa wẹ dọnmẹ a gbarị ihiẹn-oriri, kẹni wẹ hụn ụzọ ri ndụn. Euu Osolobuẹ, lee k'ọ rị m nị hụn kẹ wẹ rị e legberi m.

12Onwọnni ihiẹn ọ wụ ụnụ ẹnya — ụnụ ile ndị rị a ghafeni? Lehunmẹ ni ẹnya nị ụnụ hụn: O nwọnghọ afụnfụn nọ kẹ afụnfụn wẹ ye m, afụnfụn hụn Osolobuẹ ye m ogẹn o gi ghọsị okẹn iwe rị e wen'ẹ?

13Elu k'ọ gha zihẹ ọkụn, zidẹ ẹ ye m imẹ ọkpụkpụ. O shitọnị ụkụ m ọnyan, o mẹgụọ m lakin azụụn. O mẹgụọ m gba okpokoro, e mẹ ndụn a gụ m uhinhin lẹ efinnaị.

14A kpagbamagụọ wẹ njọ m lẹ agbụn-ọrụn, yimẹ m'ẹ; ẹka Osolobuẹ kpagbama wẹ. Wẹ rị m nwan olu — Osolobuẹ a mịpụgụọ m umẹ. O bugụọ m che ẹka ndị ka m ẹka!

15Osolobuẹ a lagụọ ndị odogun-agha m tọ; o zigụọ ndị-agha d'a pịpịa ikorọbịa m ile. Osolobuẹ a zọpịpịagụọ Nwagbọọ wụ Juda kẹ w'e mẹ ebe wẹ nọ a zọ vaịnị.

16Ihiẹn ndịnị kẹ m rị a kwannị, ẹnya-mirin gi e jun m ẹnya. Onwọnni onyẹ a nọkunmẹni m n'ọ hụhụ m, enwọn m onyẹ e mẹ ndụn banzị m. Ụya rị nwan e ri ụmụ m makẹni eṅẹnrẹn e mẹrigụọ.

17Zayọnụ rị nwan a tịnpụ ẹka, kanị onwọnni onyẹ a hụhụn'a. Osolobuẹ e yegụọ iwu banyeni Jekọpụ nị ndị nọkunmẹn'ẹ jẹnkọ d'e họnrin ndị-iṅẹnrẹn ẹ; Jerusalẹm e họnringụọ ihiẹn rụnị imẹ igunrun wẹ.

18Osolobuẹ wụ onyẹ ezi-omumẹ, kanị a paghọ m oku ẹ. Gọn ni ntịn, ụnụ ndị alị ichẹn-ichẹn; lee ni afụnfụn m rị imẹ ẹ! Kẹ ikorọbịa m kẹ ịgbagba m — a kpụngụọ wẹ wẹ shi alị ndị ọzọ rị ichẹn-ichẹn.

19A kpọghọ m ndị mmẹ lẹ wẹ te e mẹtarị, kanị wẹ nọ re m. Ndị nchụn-ẹjan m lẹ ndị-ichẹn m a nwụnhụngụọ imẹ obodo, ebe wẹ chọkọ ihiẹn w'e ri kẹni wẹ rị ndụn.

20Euu, Osolobuẹ, dodo lee nsọngbu m! Imẹ ẹhụ rị e nwụn m ọkụn, obi eruni m alị, makẹni e nupụgụọ m isi ọda-ọda. Ọpịa hụ e gbu ndị ọ rị e gbu ogbe; ọnwụn hụ e gbu mmụlọ.

21A nụgụọ wẹ udẹn m rị a sụn, kanị onwọnni onyẹ a hụhụnị m. Ndị-iṅẹnrẹn m ile a nụgụọ nsọngbu m rị imẹ ẹ; wẹ hụ e gi ihiẹn i mẹ m a ghọghọ. Mẹ ụhụọhịn ahụn i ku oku ẹ bịa kẹni wẹ nwẹn rị kẹ mmẹ.

22Eje-omumẹ wẹ ile ya ruchanrịn ebe ị rị; mẹshi wẹ ikẹn k'i dọn mẹ m makẹ njọ ile m mẹ. Udẹn-udẹn kẹ m rị a sụn, ndụn arịzị m.

Jump to: Chapter 2 →