Lamentations 2

Ika 2018 Bible

← Chapter 1 Jump to: Chapter 3 →

1Ledẹ kẹ Osolobuẹ dọn gi olulu mẹ ishi gbakpuru Nwagbọọ wụ Obodo Zayọnụ. Ọ ghagụọ elu-igwee tụ ọghọ Izrẹlụ ye alị; ọ nyanhandẹni nị ihiẹn o gi a tụkwasị ụkụ rọ, ụhụọhịn ahụn ọ rị e bu olulu.

2Osolobuẹ emẹdẹni omikẹn, o tikpọchanrịn ebe ile ebọn Jekọpụ bi; o gigụọ ọnụma a tikpọchanrịn ebe ile w'a gbaban imẹ Nwagbọọ wụ Juda. O budangụọ alị-eze Juda lẹ ndị-isi rịn'a, bu wẹ che imẹ ifẹnrẹn.

3Ọ gigụọ okẹn-olulu ẹ kwọnpụchanrịn mpịn ile Izrẹlụ gi a lụ ọgụn. O serigụọ ẹka-nni ẹ o gi a lụnị Izrẹlụ ọgụn — ihun ndị-iṅẹnrẹn wẹ. Ọ dụngụọ kẹ ọkụn imẹ alị Jekọpụ dụnpụ ihiẹn ile nọkunmẹn'ẹ.

4O kwọngụọ ụta a nọkẹ eṅẹnrẹn, ẹka-nni ẹ a dọgụọ ụta a. O mẹgụọ kẹ onyẹ-iwe gbuchanrịn ndị ile rị mma ẹnya, o hugụọ ọnụma a kẹ ọkụn kpu Nwagbọọ wụ obodo Zayọnụ.

5Osolobuẹ e mẹgụọ kẹ eṅẹnrẹn; o luepụgụọ Izrẹlụ. O luepụchanrịngụọ obi-eze ile rịn'a, tikpọpụ ebe ile rịn'a w'a gbaban. O mẹgụọ ẹkwan lẹ ịkwan-ụya waye imẹ Nwagbọọ wụ Juda.

6Osolobuẹ e titugụọ Ụlọ-nsọ a nọkẹ ugbo-nta mmakalaka; o tikpọpụ ebe ya lẹ ndị nke ẹ nọ e zu. Osolobuẹ e mẹgụọ Zayọnụ zọ kẹ mmẹmmẹ nsọ kẹ Ụhụọkịn Ezumikẹn. O gigụọ olulu gbakitọ kẹ eze kẹ ndị nchụn-ẹjan rị Juda azụụn.

7Di-nwọnni-ẹnyi a jụgụọ ukpo nchụn-ẹjan a, latọ Ụlọ-nsọ a. Ọ nịgụọ eṅẹnrẹn kụtu mgbọn obi-eze ichẹn-ichẹn rịn'a — a bangụọdẹ wẹ Ụlọ Di-nwọnni-ẹnyi wụ Osolobuẹ, nọ a yi oro mmẹri nọkẹ oro w'e yi Ụhụọhịn mmẹmmẹ nsọ.

8Osolobuẹ e kughọ a n'o k'e tikpọrịrị mgbọn hụn ghahunmẹ Obodo Zayọnụ. Ọ ghọsịgụ n'ọ nọnị k'ọ chọ, o serini ẹka d'e ru n'o tikpọchanrịn a. Ọ la mgbọn ibuzọ lẹ nke ẹbụọ rịn'a tọnị wẹ tikpọ; wẹ ẹbụbụọ a dankpọpụ.

9Ọnụ-mgbọn Jerusalẹm a dangụọ; ọ kpagipụgụọ ihiẹn ndị wẹ gi fidọn wẹ, wiwipụ wẹ. Eze ẹ lẹ ndị-isi ẹ rị nwan alị ndị ọzọ; Iwu Osolobuẹ arịzị, ndị-amụma rịn'a ara hụnzị ihiẹn ọwụlẹ ebe Osolobuẹ rị.

10Ndị-ichẹn rị imẹ Nwagbọọ wụ obodo Zayọnụ gwọrị nwan alị, gbachanrịn nkịtịn; a bụọgụọ wẹ uzunzun ye isi, yirisọnmẹ ẹkwa-achọ nke ndị ihiẹn mẹ. Ịgbagba Jerusalẹm rị nwan e bu ihun a kọma alị.

11Ẹnya e d'a kpọhị m m gi a kwan ẹkwan, obi eruni m alị kaka, obi e dẹnhingụọ m makẹni e gbuchanrịngụọ wẹ ndị nke m, makẹni ụmụ-ẹka lẹ ndị wẹ pa ẹka rị a sọhịtọ ọgbara-ogbe imẹ obodo.

12Ụmụẹka hụ a sị nnẹ wẹ, “Kẹ ẹnyi k'e ri? Kẹ ẹnyi k'a ra?” hụn ahụn wẹ rị a sọhị nọkẹ ndị-agha wẹ rụ eje-ẹhụ, a dantọ ọgbara-ogbe rịsọnmẹ imẹ obodo; a nwụntọ ẹka nnẹ wẹ.

13Kị m'a sịzị ị nwan, Nwagbọọ wụ Jerusalẹm? Kị m'e gi jen'i? Kị m'e gi ma atụ ị Nwagbọọ ọma wụ Zayọnụ kẹni m hụn ụzọ huhu ị? Ẹtẹ i mi kẹ ohimin! Onyẹ k'a saẹka zụọ ị?

14Ọhụn ndị-amụma ị hụnnị ị wụhụ ọhụn ntụ lẹ ọhụn nwọnlẹni isi, agwapụnị wẹ i njọ ị, gi ẹ napụ ị ẹgbụnnị kunrunn'i nwan. Oku wẹ gwa ị nị ya kẹ Osolobuẹ ku wụhụ ntụ lẹ ndufie.

15Ẹka kẹ ndị ile ghafekọnị a kpọyeni i; wẹ hụ e ru Obodo Zayọnụ imi, e finfinn'ẹ isi, a sị, “Ọnwan wụ obodo nwẹn w'a kpọ, ‘Mma zu oke’, ‘obodo hụn ụwa ile gi a ghọghọ?’ ”

16Ndị-iṅẹnrẹn i ile hụ a mụ ị ẹmụ, a sị ị “Ọṅọị!” Wẹ hụ e ru i imi, a tan'ị nkwẹnrẹn-eze, a sị, “Ẹnyi e luepụgụọ a. Ọnwan wụ ụhụọhịn ahụn ẹnyi rị e che; ẹnyi a hụngụọ a nwan!”

17Osolobuẹ e mẹgụọ ihiẹn rị a obi; o mẹọlẹ ihiẹn o ku kete-kete, o tikpọgụọ ị — o mẹni omikẹn, ọ mẹgụọ ndị-iṅẹnrẹn i mụ ị ẹmụ; o mẹgụọ mpịn ndị-iṅẹnrẹn i kẹnrẹn.

18Obi ndịnị hụ a kwanghọsị Osolobuẹ. Mgbọn Obodo Zayọnụ kwanma nị ẹnya-mirin i huru nọkẹ mirin Iyi — kẹ efinnaị kẹ uhinhin; akwanbehikwọlẹ, anịlẹ ẹnya ị zu ikẹn.

19Lihi ọtọ imẹ abalị n'ị kwan ẹkwan, ogẹn ndị nche abalị gi e bidọn nche; hupụha ihiẹn rị e sọngbu i obi nọkẹ mirin ihun Osolobuẹ; Kịshi ẹka elu, rịọ a, makẹ ndụn ụmụ ị, hụn rị a sọhịnị yeni ẹgụn isi ọgbara-ogbe ile.

20“Euu Osolobuẹ, ledẹ k'ọ rị m! Onyẹ k'i mẹtu ẹnịna? Nị ikpoho e ri ụmụ ẹfọ wẹ, ụmụ wẹ rị e gi ẹka wẹ a zụn? Nị ịhịan e gbu ndị nchụn-ẹjan lẹ ndị-amụma imẹ Ụlọ-nsọ Osolobuẹ?

21Kẹ ụmụ-ẹka kẹ ndị ẹgẹdi e fiẹnrinsọnmẹ imẹ uzunzun rị ụzọ; kẹ ikorọbịa m kẹ ịgbagba m, e gigụọ wẹ ọpịa-agha gbu wẹ. Y'e gbugụọ wẹ ụhụọhịn ahụn ị ghọsị olulu i; y'a jagbu wẹ — y'e mẹni omikẹn.

22K'i dọn a kpọ oriri ụhụọhịn mmẹmmẹ nsọ, ẹrịra k'i dọn kpọhanị m ihiẹn-egun d'e fihunmẹ m azụụn ile. Ụhụọhịn hụ Osolobuẹ ghọsị olulu rị a obi, onwọnni onyẹ wanahịnnị mọbụ hụn isi pụha — ndị m lepụ ẹnya, zụn, eṅẹnrẹn m e gbugụọ wẹ.”

← Chapter 1 Jump to: Chapter 3 →