bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Ika
/
Ika 2018 Bible
/
Mark 10
Mark 10
Ika 2018 Bible
← Chapter 9
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 11 →
1
Jesu nọ gha Kapanọm pụ, ghashi nfetu Iyi Jọdanị pụha ẹgbẹrẹ Judia. Igunrun ịhịan nọ kokomẹzi ebe ọ rị. Ọ nọ kuzimẹ wẹ k'o dọn a kuzi.
2
Ya kẹ ndị Itu-Farisi nọ bịa d'e kunrun Jesu, gi ajụjụ shin'ẹ ọnyan, sị a, “Iwu ẹnyi e kwerighọ nị okẹnnyẹ kpechan nwunyẹ ẹ?”
3
Ọ nọ sị wẹ, “Kị Mozizi sị ụnụ mẹ?”
4
Wẹ nọ sị a, “Mozizi sị nị okẹnnyẹ nwọn ikẹn de ẹkụkwọ-mkpechan, chụ nwunyẹ ẹ.”
5
Kanị Jizọsị nọ sị wẹ, “Obi ụnụ e zekẹ haịn o gi deni ụnụ iwuni,
6
kanị, ghakwọrị isi mbidọn lala, ogẹn Osolobuẹ gi ke ihiẹn ile, ‘Osolobuẹ ke wẹ okẹn lẹ onyẹnnyẹ’ k'ọ dọn rị imẹ Ẹkụkwọ-nsọ. Ẹkụkwọ-nsọ sịzị:
7
‘Ufiri ẹ, okẹnnyẹ sikọ d'a latọ nẹdi ẹ lẹ nnẹ ẹ, kwọnkẹnmẹ nwunyẹ ẹ,
8
wẹ ẹbụbụọ a wụrụ ẹhụ ohu.’ Ya wụ, ẹlẹzi wẹ ẹbụọ, kama ẹhụ ohu.
9
Ihiẹn Osolobuẹ wegbama nwan, ịhịan ya ekebelẹ ẹ.”
10
Ogẹn wẹ gi rị imẹ ụlọ, ya ndị nsọnmazụụn a nọ jụmazị a oku mkpechannị.
11
Ọ nọ sị wẹ, “Onyẹ kpechan nwunyẹ ẹ lụma okpoho ọzọ a ghẹrẹọlẹ, mẹ nwunyẹ ẹ njọ.
12
Okpoho kpechan di ẹ lụma okẹnnyẹ ọzọ a ghẹrẹọlẹ — ọ zọgụọ ụkụ ye ọfịa.”
13
O nwọn ndị rị e wẹhẹni Jesu ụmụẹka n'o mẹtụ wẹ ẹka, kanị ndị nsọnmazụụn a nọ jụgbọ ndị hụ wẹhẹni wẹ.
14
Jesu a hụn a, iwe nọ we ẹ. Ọ nọ sị wẹ, “Nị nị ụmụẹka bịa d'e kunrun m; akụsịlẹ ni wẹ, makẹni Alị-eze Osolobuẹ wụ nke ndị nọ ẹnịna.
15
Ezioku kẹ m rị a gwa ụnụ, onyẹ nabanhanlẹni Alị-eze Chuku nọkẹ nwa-ndu, abanyekọ a.”
16
Ọ nọ parị ụmụẹka hụ, bu ẹka kwasị wẹ, gọzi wẹ.
17
Hụn Jesu gi pụkọ, okẹnnyẹ ohu nọ gbaha d'e gbun'ẹ osekpu, sị a, “Ezigbo onyẹ nkuzi, kị m'e mẹ ni m nwọnhẹn ndụn-itẹbitẹ?”
18
Jesu nọ sị a, “K'ị rị a kpọnị m ezigbo onyẹ nkuzi? Onwọnni onyẹ rị mma wezụka Osolobuẹ.
19
Y'a marịnghọ ihiẹn Iwu ku: ‘Egbulẹ ọchụn; aghẹrẹlẹ, ezunlẹ ohin; ebuokinlẹ ịhịan ọnụ; atụnarịnlẹ ịhịan ihiẹn ẹ; gbaye nẹdi i lẹ nnẹ i.’ ”
20
Okẹnnyẹ hụ nọ sị Jesu, “Onyẹ-nkuzi, m hụ e dọnmẹ iwu ndịnị ile kete m marịnlẹ ihiẹn.”
21
Jesu e lee ẹ, ihiẹn ẹ a sụọ a, ọ nọ sị a, “O nwọn ihiẹn ohu rị a kọn'ị: jẹn d'e rekwama ihiẹn ile i nwọn, y'e we egho ẹ ye ndị igbẹnnyẹ, gi ẹ nwọn akụ-lẹ-ụba imẹ elu-igwee, y'a bịa d'e sọnmẹ m.”
22
Okẹnnyẹ hụ a nụ ihiẹnni, ihun a sụọzịn'a ẹmụ, ọ nọ sụkụrụ, pụ, makẹni o nwọn ihiẹn ọda-ọda.
23
Jizọsị e lehunmẹ ẹnya, ọ nọ sị ndị nsọnmazụụn a, “Alị-eze Osolobuẹ k'a fụ ọdanfịn ọrụn ọbanye!”
24
Okuni nọ tụ ndị nsọnmazụụn Jizọsị ẹnya. Kanị Jizọsị nọ sịzị wẹ, “Ụmụ m, nị Alị-eze Osolobuẹ fụka ọrụn ọbanye!
25
Ẹnya-olodẹn k'a kadẹ anyịnyan-mkpukpuke wụ kamẹlụ nfe ọghịgha karị nị ọdanfịn banye Alị-eze Osolobuẹ.”
26
Ọ tụ wẹ ẹnya ọda-ọda, wẹ nọ jụma ibe wẹ, sị, “Onyẹ sikọ d'a sazị nwan ẹka nwọn nzụọpụha?”
27
Jesu e bu ẹnya tụma wẹ, sị, “Ẹka ịhịan, ọ nịkọ mẹ, kanị ẹlẹ ẹka Osolobuẹ, makẹni onwọnni ihiẹn Osolobuẹ ghalẹni asaẹka e mẹ.”
28
Pita nọ sị a, “Lee ẹ, ẹnyi a latọgụọ ihiẹn ile sọnmẹ i.”
29
Jesu nọ sị, “Ezioku kẹ m rị a gwa ụnụ, onwọnni onyẹ gi ufiri mmẹ lẹ oziọma latọ ụlọ, mọbụ umunẹ-ẹ-ikẹnnyẹ mọbụ umunẹ-ẹ-ikpoho, mọbụ nnẹ ẹ mọbụ nẹdi ẹ mọbụ ụmụ a mọbụ alị o nwọn
30
hụn jẹnkọlẹni d'e nwọnhẹn ụlọ lẹ umunẹ-ikẹnnyẹ lẹ umunẹ-ikpoho lẹ nnẹ lẹ ụmụ lẹ alị, nwọnhẹn wẹ ụzọ ọgụn-isẹn eluni, cheni ukpokpo; nwọnhẹnzikwọ ndụn itẹbitẹ imẹ ụwa hụn lalanị.
31
Kanị, imẹrinmẹ bu nwan ụzọ jẹnkọ d'a kpa azụụn, ndị ikpanzụụn e buru ụzọ.”
32
Jesu lẹ ndị nsọnmazụụn a rị ụzọ wẹ gi jẹnkọ Jerusalẹm. Jizọsị rị wẹ ihun; obi eruni ndị nsọnmazụụn a alị; egun hụ a tụ ndị sọnkọnị wẹ. Ya Jizọsị nọ werizi wẹ mmẹbụọ shi ụsụọ, gwama wẹ ihiẹn jẹnkọ d'e mẹn'ẹ;
33
ọ sị wẹ, “Gọn ni ntịn, ẹnyi jẹnkọ nwan Jerusalẹm; wẹ k'e we Nwa nke Ịhịan che ẹka ndị-isi nchụn-ẹjan lẹ ndị-nkuzi Iwu, a ma w'a ikpe-ọnwụn, w'ẹ ye ndị wụlẹni ndị Ju.
34
Wẹ jẹnkọ d'a mụ a ẹmụ, jụ a ẹsọn, fịan a mkpịnsịn, gbu ẹ; kanị hụn m'ẹ akpọhịn ẹtọ, o k'e lihi.”
35
Ụmụ Zẹbẹdi wụ Jemisi lẹ Jọnụ nọ pụha ihun Jesu, sị a, “Onyẹ-nkuzi, o nwọn ihiẹn ẹnyi chọ n'i mẹni ẹnyi.”
36
Jesu nọ sị wẹ, “Kị ụnụ chọ nị m mẹni ụnụ?”
37
Wẹ nọ sị a, “Kweri nị onyẹ ohu imẹ ẹnyi ẹbụbụọ jẹnkọ d'a nọdị alị ẹka-nni i, onyẹ ohu a nọdị alị ẹka-ekpẹn i mgbe y'e gi kịma.”
38
Kanị Jizọsị nọ sị wẹ, “Ụnụ amarịn ihiẹn ụnụ rị a rịọ. Nị ụnụ saẹka ra mkpu afụnfụn m sikọ d'a ra mọbụ ri ụya m jẹnkọ d'e ri?”
39
Wẹ nọ sị a, “Ẹnyi jẹnkọ d'a s'ẹka.” Jesu nọ sị wẹ, “Ezioku-ezioku, ụnụ jẹnkọ d'a ra mkpu afụnfụn m sikọ d'a ra, ri ụya m jẹnkọ d'e ri;
40
kanị ẹlẹ mmẹ nwẹn ku onyẹ k'a nọdị ẹka-ihiẹn m mọbụ ẹka-ekpẹn m; nke ndị wẹ kwademẹn'ẹ rọ.”
41
Ogẹn ndị nsọnmazụụn a iri họdụnị gi nụ a, wẹ nọ bumẹni Jemisi lẹ Jọnụ olulu.
42
Jesu nọ kpọzụnhan wẹ, sị, “Ụnụ a marịnghọ nị ndị ọkịkị alị ndị ọzọ a kị wẹ nkịgbu, ndị okẹn-ịhịan a ghọsị ndị ọzọ nị wẹ ka wẹ.
43
Ka emẹlẹ ni ẹrịra; onyẹ hụn chọ n'o mẹ okẹn-ịhịan imẹ ụnụ sikọ d'a wụrịrị odibo ụnụ;
44
onyẹ ọwụlẹ chọ n'ọ wụrụ ibuzọ imẹ ụnụ jẹnkọ d'a wụrịrị igbọn ụnụ ile —
45
makẹni, Nwa nke Ịhịan lẹ enwẹn ẹ abịadẹni nị wẹ gban'a odibo, kalẹ, ọ bịa d'a gba odibo lẹ n'o ye ndụn a, gi gbapụha ndị bu ọda.”
46
Jesu wẹ e ru Jẹriko; ogẹn ya lẹ ndị nsọnmazụụn a lẹ igunrun hi-ogbe sọnkọnị wẹ gi gha imẹ Jẹriko pụkọ, onyẹ ẹnya-ishi ohu a rịọ ụrịọ nọdị alị mkpẹnrẹn ụzọ ebahụn, Batimịọsụ nwa Timọsụ rọ.
47
Ogẹn o gi nụ nị Jesu onyẹ Nazarẹtị rọ, ọ nọ yimẹ oro, sị, “Jesu! Nwa Defidi! Mẹ omikẹn m!”
48
Ndị bu ọda nọ jụgbọ a, sị a gba nkịtịn; kanị ọ nọ yikẹnmẹdẹ, “Nwa Defidi, mẹ omikẹn m!!”
49
Jizọsị nọ wuzo, sị, “Kpọha n'a.” Wẹ nọ kpọha onyẹ ẹnya-ishi hụ, sị a, “Kwọndọn obi i! Lihi ọtọ, n'ọ sị ị bịa.”
50
Ọ nọ fe ẹwuru o yiye elu ẹ tuhu, felihi ọtọ d'e kunrun Jesu.
51
Jizọsị nọ sị a, “K'ị chọ nị m mẹni i?” Onyẹ ẹnya-ishi hụ nọ sị a, “Onyẹ-nkuzi, m chọ nị m leghama ụzọ.”
52
Jesu nọ sị a, “Jẹnmẹ, okukwe i a zụọgụọ ị.” Ya kẹ Batimịọsụ nọ leghama ụzọ ozigbo, ọ nọ sọnmẹ Jesu.
← Chapter 9
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 11 →
All chapters:
1
2
3
4
5
6
7
8
9
10
11
12
13
14
15
16