Micah 1

Ika 2018 Bible

Jump to: Chapter 2 →

1Ọnwan wụ oku Osolobuẹ, hụn bịanị Maịka onyẹ obodo Morẹshẹti ogẹn Jọtam lẹ Ahazị lẹ Hezikaya gisọnmẹ kị alị Juda; ihiẹn ndịnị kẹ Maịka hụn banyeni obodo Sameria lẹ obodo Jerusalẹm.

2Gọn ni ntịn, ndị alị ile; ụnụ ile, gọn ni ntịn! Elu-ụwa lẹ ihiẹn ile rịn'a, gọn ntịn! Gọn ni ntịn, nị Osolobuẹ nwọnni ẹnyi shịagbu ụnụ ẹri; n'ọ gha Ụnọ-NSỌ a rị nsọ ku ihiẹn ụnụ mẹ!

3Lee ẹ! Osolobuẹ gha ebe obibi ẹ pụla: o hidanla d'a zọpịpịasọnmẹ ebe ile jẹn elu elu-ụwa.

4Ugu ichẹn-ichẹn jẹnkọ d'a rịnranpụtọ okpuru ụkụ a, ọdanmgbugbu ichẹn-ichẹn e tiwa, rịkẹ ebe ọkụn nọ rịnranpụ ofugbọn, nọkẹ ebe mirin rị e hutu mkpọtu òke.

5Wẹ ile lala makẹni ụmụ Jekọpụ mẹfie emẹfie, wẹ lala makẹ njọ ikpụlọ Izrẹlụ mẹsọnmẹ. Kị wụ njọ ụmụ Jekọpụ? Ẹlẹ obodo Sameria k'ọ rị? Elebe kẹ ukpo-mmọn jun imẹ Juda? Ẹlẹ Jerusalẹm?

6M jẹnkọ d'e tikpọ Sameria, o họnrin mkpọkọ-ụlọ mkpọkọ-ụlọ, họnrin ọfịa wẹ nọ a rụn vaịnị; e kpọn m ọmụma a ile ye imẹ ọdanmgbugbu, a hụnchanrịn wẹ iyetọ a.

7Wẹ k'a kụkpọ mmọn ile ndị Sameria kpụ, dụnpụ ihiẹn ile wẹ gi njọ wẹ nwọnhẹn ọkụn; m k'e tikpọ mmọn wẹ ile la iwi. Ihiẹn wẹ gi ịgbaraja nwọnhẹn kẹ wẹ wụ, ịgbaraja kẹ wẹ k'a gha la.

8Ufiri ihiẹnni, m jẹnkọ d'a kwan, goo; m jẹnkọ d'e gi ọtọ lẹ ụkụ mmaka a ghahunmẹ! M k'e yisọnmẹ nọkẹ nkitẹ-ọfịa; m k'e wo nọkẹ ozuzu!

9Makẹni alị Sameria a rụgụọ eje ẹhụ nwọnlẹni ọgụn! Ihiẹn ohu ahụn e kunrungụọ Juda! O rugụọdẹ nwan ọnụ-mgbọn ndị nke m, o rugụọdẹ Jerusalẹm.

10Agwakwọlẹ ni wẹ ẹ imẹ obodo Gatị! Akwankwọlẹ ni ẹkwan kaka! Ndị rị Bẹt-Lafra, kperemẹdẹ ni alị!

11Ndị bi Shafiri, gi ni ifẹnrẹn ghaferi, ụnụ lẹ ọtọ ndị bi Zaananị apụhakwọlẹ ni, makẹni ndị Bẹt-Ẹzẹlụ nkẹ rị e goo; eyekọzịnị wẹ ụnụ ẹka.

12Uhue e d'e huegbu ndị bi Marọtụ, ebe wẹ rị e ro kẹ w'a dọn hụn isi, yeni nsọngbu Osolobuẹ zila ọnụ-mgbọn Jerusalẹm!

13Ndị bi Lakishi, kwademẹ nị nwan ụgbọ-ẹshin agha ụnụ. Makẹni, Lakishi kẹ Zayọnụ mụnarịn eje-ihiẹn, imẹ ẹ kẹ njọ ndị hụ gha Izrẹlụ bịa bu ụzọ rị.

14Ufiri ẹ, ihiẹn wẹ gi a sị “Koghoo” k'i jẹnkọ d'e ye obodo Morẹshẹti rị Gatị. Ndị obodo Akizibu dufie ndị-nze Izrẹlụ.

15Ụnụ ndị Maresha, m welazịnị ụnụ onyẹ k'a kpụnrụn ụnụ; ndị alị Izrẹlụ gi dọn ẹnya k'a gbashi Adulam d'a warị.

16Kọ nị nwan ntutu, kwanma makẹ ụmụ ụnụ hụn ụnụ e mẹni nwa; kpụnchanpụ nị ntutu nọkẹ udele makẹni wẹ lala d'a dọkpụnrụn ụmụ ụnụ we wẹ shi alị ọzọ!

Jump to: Chapter 2 →