Micah 2

Ika 2018 Bible

← Chapter 1 Jump to: Chapter 3 →

1Ọ rịkọnị ụnụ mma, ụnụ ndị e chu ụran elu-ukpo, e rotọ eje-ihiẹn, eki fọn, e mẹ w'ẹ makẹni ọ rị wẹ ẹka.

2Wẹ chọ alị mọbụ ugbo ịhịan, a narịn w'a ya; omẹni ụlọ rọ, e weri w'ẹ; wẹ hụ a bịangbu ịhịan, e weri ụlọ a; a bịangbu ịhịan, e weri ukuu ẹ.

3Ufiri ẹ, Osolobuẹ e sị, “M rị nwan a mama ihiẹn m k'e mẹ ebọnni; isi ụnụ k'a tọ a; ụnụ ebọnmẹkọzị, makẹni o jẹnkọ d'a wụ eje-ogẹn.

4O ru ogẹn hụ, wẹ k'a gba ị ẹbụ, sị, ‘Heuu, nke ẹnyi a gụ-o! Osolobuẹ e hutọgụọ ezigbo ọnọdị ndị nke ẹnyi! Ọ napụgụọ ẹnyi ihiẹn ẹnyi; o wegụọ alị lẹ ugbo ẹnyi keni ndị ghalẹni e fe ẹ!’

5M mẹgụ nwan ụnụ ihiẹn m k'e mẹ ụnụ ụnụ enwẹkọzị onyẹ a hanpụhanị ụnụ alị imẹ ozuzu ndị nke Osolobuẹ.”

6Kanị, ụnụ hụ a sị, “Ekuzilẹ! Ebuzilẹ amụma nọ ẹrịra! Ụya erikọ ẹnyi.

7Heuu, ikpụlọ Jekọpụ, ụnụ hụ e sị nị ndụn ndidin ara gụ Osolobuẹ, nị ẹlẹ Osolobuẹ ku ihiẹn ndịnị. Kanị, oku-ọnụ m hụ a rị ndị kụrụ ọtọ mma ẹhụ. Ẹlẹ ya?

8Ikpanzụụnnị, ụnụ rị e mẹ ndị nke m kẹ eṅẹnrẹn: a napụ ịhịan ẹwuru o yi ẹhụ, nwa ịhịan ghafekọ nke ẹ rịlẹni e ro oku, nọkẹ ndị gha agha lala.

9Ụnụ a chụpụ ikpoho alị m iwe wẹ obi gi a sụọ wẹ ụsụọ, a napụ ụmụ wẹ ọghọ m ye wẹ, a napụchanrịn.

10Lihi ni! Pụ nị; nị ẹlẹ ebeni kẹ ẹhụ ahụn a nọ fuzi ụnụ, makẹni ụnụ e mẹrụọlẹ ebeni hụn wẹ jẹnkọ d'e gi tikpọ a eje ntikpọ;

11nọkẹ sị onyẹ-amụma ntụ te pụha a sị ndịnị, ‘Manya lala — kẹ hụn a tụnị,’ onyẹ-amụma nọ ẹrịra ya nwọn a sụọ ndịnị!

12“Omẹgụ, m sikọ d'e wegbamazịrịrị ụnụ, ụmụ Jekọpụ; m jẹnkọ d'e wegbamazị ndị k'a hụn isi. M k'e wegbama wẹ ile, a nọ wẹ kẹ atụnrụn rị ebe wụ nke wẹ, nọkẹ igunrun atụnrụn rịchanrịn ebe wẹ nọ a kpa nni hụn wụ nke wẹ; ụzụn k'e jun alịnị yeni ndị bu ọda rịn'a.”

13Onyẹ hụn e tikpọnị wẹ mgbọn sikọ d'e buruni wẹ ụzọ; wẹ k'a gha ọnụ-mgbọn alị gini wẹ zụnkpọpụha, la alị hụ tọ. Eze wẹ k'e buruni wẹ ụzọ, Osolobuẹ k'a rị wẹ ihun.

← Chapter 1 Jump to: Chapter 3 →