Micah 7

Ika 2018 Bible

← Chapter 6 Jump to:

1Ụya e gbuẹ m! M nọ nwan kẹ onyẹ chọha figi ogẹn figi, kanị a ghọgụọ w'a, ghọdọnzi! Akpụrụ figi-ibuzọ rị a gụnnị m arịa!

2Ndị e mẹ uche Osolobuẹ arịzị alịnị; onwọnzini onyẹ kụrụ ọtọ. Onyẹ ọwụlẹ hụ e che n'o gbu ibe ẹ; onyẹ-onyẹ hụ e shitọnị ibe ẹ ọnyan.

3Wẹ ile buchanrịn ẹka ẹbụbụọ che eje-ihiẹn, ọ hụ a gha wẹ ẹka. Ndị isi hụ e gi ọnụ a dọ egho-azụụn, ndị ọka-ikpe hụzị a na; Ndị uku hụ e gi ọnụ wẹ a chọ nke wẹ; wẹ ile hụ e kịgbama e mẹ eje-ihiẹn.

4Mma wẹ e mẹ nọ kẹ ogun; onyẹ hụn kụrụ ọtọ imẹ wẹ akanị ụgba ogun-lẹ-ọkịnkan mma. Kanị ogẹn ahụn ndị-nche ụnụ gwatọ ụnụ a bịagụọ, ogẹn m'e gi ye ụnụ afụnfụn; o sikọ d'a gba ụnụ ngharị-ẹnya!

5Egikwọlẹ onyẹ ịyụ lẹ ya gba a wị dọn ẹnya; egikwọlẹ ọwụ ị dọn ẹnya; marịnkwọ ihiẹn y'e ku ebe nwunyẹ i rị.

6Makẹni, okẹnnyẹ rị nwan e legberi nẹdi ẹ; okpoho rị e bu a nụmanị nnẹ mụn'a; nwunyẹ-nwa rị e bu a nụmanị nnẹ-di ẹ; ndị rị ikpụlọ ịhịan wụ nwan ndị iṅẹnrẹn ẹ.

7Kanị, mmẹ nwẹn, Osolobuẹ kẹ m'e lee; m k'e cheri Chuku hụn a zụọpụhanị m; Chuku m jẹnkọ d'a za m.

8Onyẹ iwe, amụlẹ m ẹmụ, makẹni, ọsụọn'a nị m dan adan, m k'e lihizi; ọsụọn'a nị m rị imẹ ishi, Osolobuẹ jẹnkọ d'a wụrụnị m ukpẹ.

9Nị m narịn afụnfụn Osolobuẹ ye m makẹ njọ m mẹ ẹ, d'e ru n'o leban ẹnya ọnọdị m, hannị mmẹ lẹ ndị o gi e ye m afụnfụn eṅẹn. O wepụhazị m ebe ukpẹ rị, a hụn m nzụọpụha a.

10Ogẹn hụ, eṅẹnrẹn m a hụn a, ifẹnrẹn e mẹgbu ẹ onyẹ nwẹn te sị m “Elebe Osolobuẹ wụ Chuku i rị nwan?!” Ẹnya m k'a hụn k'ọ dan; o họnrin ihiẹn w'a zọ ụkụ nọkẹ ịkpọtọ rị ụzọ.

11Jerusalẹm, ogẹn w'e gi rụndọnzi mgbọn i lala! O ru ogẹn ahụn, wẹ k'e weshịa alị ị.

12O ru ogẹn hụ, a gha wẹ Asiria lẹ obodo rịsọnmẹ Ijiptu lụaburu i, gha Ijiptu d'e ru Iyi Yufretisi lụaburu i, gha ebe ile ohimin ru lẹ ugu ile lụaburu i.

13Kanị ụwa k'e mẹ mkpọkọ-mkpọkọ, yeni ihiẹn ndị rịn'a rị e mẹ.

14Osolobuẹ dodo, gi ọkpọ ị du ndị nke i, atụnrụn ị hụn wẹ sụọ bi imẹ ọfịa, ọsụọn'a nị wẹ rị adamada ogige mẹ wokowoko. Dodo nịzị wẹ kpa nni imẹ Bashanị lẹ Gilẹdị kẹ wẹ e mẹ mbụ-mbụ.

15Kẹ m dọn mẹ ogẹn ahụn, gi ẹ wepụha ụnụ imẹ alị Ijiptu, m jẹnkọ nwan d'a rụnghọsị wẹ ọrụn-atụmẹnya.

16Alị ndị ọzọ jẹnkọ d'a hụn a, ifẹnrẹn e mẹgbu wẹ nị ikẹn ile wẹ kpa enwọn ihiẹn ọ wụ, e gi wẹ ẹka kpumẹ ọnụ, ntịn a kụkin wẹ;

17a ra wẹ uzunzun nọkẹ agwọ nọkẹ ihiẹn a rịnị; a ma wẹ piripiri rụpụhasọnmẹ ebe wẹ te gi dọn ẹnya, gi egun buruhẹ Osolobuẹ, Chuku ẹnyi, a tụ egun ụnụ.

18Elee mmọn nọ kẹ yụ wụ Osolobuẹ, hụn a gbagharị njọ? Ịyụ hụn jẹnkọ d'e bupụ ẹnya njọ ndị nke i ndị nke hụn k'a họdụnị? Osolobuẹ ara wesọnmẹ iwe jẹnrin ejẹn, makẹni ihiẹn-ọsụsụọ wụ ihiẹn a sụọn'a.

19O jẹnkọ d'e mẹzi omikẹn ẹnyi; o jẹnkọ d'a zọ njọ ẹnyi ụkụ. O k'a ma njọ ile ndị nke ẹ mẹ ye imẹ-imẹ ohimin.

20I jẹnkọ d'e gi ezioku sọn odibo i wụ Jekọpụ; gi ihiẹn-ọsụsụọ sọn Ebraham kẹ i dọn kun enwẹn i kwe wẹ ndị nẹdi ẹnyi kanị nkwa ogẹn mbụ.

← Chapter 6 Jump to: