Nahum 1

Ika 2018 Bible

Jump to: Chapter 2 →

1Ọnwan wụ ihiẹn Osolobuẹ ku banyeni obodo Ninivẹ. Ihiẹn Osolobuẹ ghọsị Nahum onyẹ alị Ẹl'koshi k'o de imẹ ẹkụkwọnị.

2Chuku ẹnya a fụ lẹ hụn e mẹgwarịnị kẹ Osolobuẹ wụ; Osolobuẹ e mẹgwarị emẹgwarị, e bu olulu ọda-ọda; Osolobuẹ e mẹgwarị ndị iṅẹnrẹn ẹ, ọ tọ e buni ndị-iṅẹnrẹn ẹ olulu.

3Osolobuẹ ara bukẹnrin olulu, kanị o nwọnkẹkwọ ikẹn; ara hatukwọ onyẹ mẹ eje-ihiẹn. Okẹn ufere lẹ ẹbi k'o gi lala; ụkụ a e kpọn orukpu-igwere kẹ uzunzun.

4Ọ bannị ohimin mban, ohimin a tahị; o mẹ iyi a tahị; ẹfịfịa jun Bashanị lẹ ugu Kamẹlụ e shinwụn, osisi jun alị Lẹbanọnụ a kpọpụ nkụn.

5Ugu hụn a, e mẹhunmẹ wẹ, elu òke hụn a, a rịnranpụ wẹ. Ọ pụha, elu-ụwa a mama piripiri, elu-ụwa lẹ ndị ile rịn'a!

6Ọ kpọma ọnụma, onyẹ k'a saẹka turu? Onyẹ k'a saẹka dingbu uwowo olulu ẹ? Iwe lẹ ọnụma a e hupụha rịkẹ ọkụn — Osolobuẹ e tikpọchanrịn ọmụma.

7Osolobuẹ a rịka mma, ebe zeni w'a gbaban ogẹn nsọngbu k'ọ wụ. O marịnghọ ndị gbọnnin'ẹ, o lepụ wẹ ẹnya.

8O gi okẹn mirin rị e huni e bupụchanrịn ndị-iṅẹnrẹn ẹ; ọ chụ ndị-iṅẹnrẹn ẹ ye imẹ ishi.

9Kị ị rị e zuni ni Osolobuẹ umẹ, Ninivẹ? O k'e wiwi umẹ hụ ru alị — y'e yekọ nsọngbu mgbe ẹbụọ.

10Ndị iṅẹnrẹn ẹ k'a nọ kẹ ogun kụtọnị, a danhunmẹ kẹ ndị manya rị a tụ; ọkụn sikọ d'e rẹnpụ wẹ nọkẹ ẹfịfịa ọkpọ-nkụn.

11O nwọngụọ onyẹ gha imẹ yụ wụ Ninivẹ bịa, hụn rị e zuni Osolobuẹ eje umẹ, a maman'a eje-ihiẹn.

12Osolobuẹ sị Izrẹlụ: Ọsụọn'a nị ndị Ninivẹ e zekẹ, ọsụọn'a nị e bukẹ wẹ ọda, wẹ k'e tikpọ wẹ, nke wẹ a gụ. Ọsụọn'a nị e yeọlẹ m ụnụ afụnfụn nkesi, eyekọzị m ụnụ afụnfụn.

13M k'a dọbepụ nwan ẹgbụn hụ o kẹn ụnụ, tibepụ ẹgan hụ, ụnụ e nwọnrin enwẹn ụnụ.

14Osolobuẹ e kuọlẹ ihiẹn o sikọ d'e mẹ i, Ninivẹ: ọ sị, “Ndị k'a za ẹfan ị arịkọzị. M k'e gbuchanrịn ndị ile rị imẹ i; m k'e tikpọchanrịn mmọn ile rị ụlọ-mmọn ị, kẹ hụn wẹ kpụ kẹ hụn wẹ pịn. M k'e gun'i ili, makẹni ihiẹn-ẹti kẹ ị wụ!”

15E lee ni ụkụ onyẹ rị elu ugu gi ozi rị mma lala! Ọ hụ e yi, “Ihiẹn ile a rịgụọ mma! Ndị Juda mẹmẹzi ni mmẹmmẹ ụnụ! Mẹni ni nwan Osolobuẹ nkwa ụnụ kwe ẹ; ndị-ejẹ ahụn amayekọzị ụnụ! Wẹ k'e tikpọchanrịn wẹ!”

Jump to: Chapter 2 →