Nahum 3

Ika 2018 Bible

← Chapter 2 Jump to:

1Nke i a gụgụọ, obodo Ninivẹ, izighẹ! Ntụ lẹ ihiẹn ị kwanarịn ndị ọzọ jun ụzọ ile! Y'a nọ onwọnni onyẹ i bu nụmanị!

2Mkpịnsịn ndị kị ẹshin-agha hụ a han; ụkụ ụgbọ-anyịnyan agha hụ a han, ya lẹ nkiti-ụkụ ẹshin-agha wụkọnị lẹ ụzụn ụgbọ-anyịnyan agha ghakọ nkpọke.

3E lee ndị-agha gi ẹshin zụnbankọ ọgbọ-agha! Ọpịa-agha hụ e fehunmẹ, obo wẹ hụ e gbuke. Ozun e jun alị, a dankwasị ibe wẹ. Onyẹ k'a saẹka gụn wẹ? Wẹ hụ a kpọgburu wẹ!

4Makẹni ịgbaraja wụ Ninivẹ mẹ eje-ihiẹn ọda-ọda ebe ọ rị a gba ịgbaraja, obodo magbu enwẹn ẹ mma, a la ẹnya, nnẹ ịgbaraja ile, hụn gwọnahịn wẹ ile ọgụn; obodo hụn gi ịgbaraja a e re alị ndị ọzọ, e gi ọgụn a e re ebọn ndị ọzọ.

5“Mmẹ lẹ ịyụ rọ, Ninivẹ!” Ya kẹ Osolobuẹ ihiẹn ile rị okpuru ẹ ku. “M sikọ d'a yọshi ẹkwa ị elu, e mẹ m alị ndị ọzọ hụn ọtọ ị a hụn wẹ ihiẹn-ifẹnrẹn i.

6M k'e kpọn ẹfịfịa kpu i, gbe ifẹnrẹn ye i ihun, a gba wẹ i ile.

7Onyẹ hụn ị, ọ gbanị ị ọsọ, sị, ‘Euu, e tikpọgụọ wẹ Ninivẹ la iwi! Onyẹ k'a saẹka hụhụ ị?’ Elebe kẹ m'a nọ hụn onyẹ k'a saẹka hụhụ ị?”

8Ịyụ kadẹ isi-alị Ijiptu wụ Tẹbẹsi mma ra? Tẹbẹsi hụn rị Iyi Naịlị, hụn mirin ahụn rị azụụn ile; Iyi ahụn te e che ẹ nche, mirin ahụn te gbahunmẹ ẹ mgbọn;

9Ẹtiopịa te wụ ikẹn ẹ, Ijiptu wụzịkwọ ikẹn ẹ hụn ka ikẹn, alị Putu lẹ alị Libia te e yezikwọn'a ẹka.

10Kanị, emẹrikwọ wẹ ndị Tẹbẹsi kpụnrụn; e gizidẹ wẹ ụmụẹka wẹ a fịan ọmụma ndị rị ọkpụzọ wẹ ile, a fịangbu wẹ. A tụzịghọ wẹ mkpọ keri ndị w'a gbaye imẹ wẹ, kẹn okẹn-ịhịan ndị rịn'a ẹgbụn.

11Yụ nwẹn wụ Ninivẹ k'a razịkwọ manya m wụ afụnfụn, tụ; i k'e jẹn d'a warị, a chọ ebe y'a gbabannị ndị iṅẹnrẹn i!

12Okẹn mgbọn ile ụnụ tụn wụhụ osisi-figi; ụnụ wụhụ mkpụrụ figi-ibuzọ rịn'a, onyẹ zinzin osisi ẹkẹrẹ a danyesọnmẹ w'ẹ ọnụ!

13Ndị-agha ụnụ wụhụ ikpoho imẹ igunrun ụnụ. Ọnụ-mgbọn obodo ụnụ rịchanrịn oghe tọnị ndị-iṅẹnrẹn ụnụ; ọkụn a dụnpụgụọ ihiẹn ụnụ gi fidọn ọnụ-mgbọn.

14Ọ sụọ ụnụ, Dọjunkwọ nị mirin nị wẹ k'e kehunmẹ ụnụ; mẹkwọ ni ebe ile ụnụ a gbagban zekẹnmẹ; d'a zọkwọ nị ẹjan; kpụkwọ nị blọkụ!

15Ọ napụkọ ọkụn a dụnpụlẹ ụnụ! Ọpịa-agha jẹnkọ d'e gbu ụnụ. O k'e mẹ ụnụ ihiẹn igurube mẹ ẹhụhụọ-oyiyi. Ọsụọn'a nị ụnụ e buwayedẹ ọda kẹ igurube, ọsụọn'a nị ụnụ a barahị kẹ igurube!

16Ụnụ e mẹgụọ ndị-afịa ụnụ kadẹ kokisẹ rị igwere ọda, kanị wẹ lala kẹ igurube d'e richanrịn ihiẹn ile, fela.

17Ndị-nche ụnụ buhụ ọda kẹ igurube; wẹ lẹ ndị-isi ụnụ nọ kẹ igunrun igurube bejun ẹhụ-ụlọ ụhụọhịn oyi, hụn anwụn gihụ pụha, e fela wẹ onwọnni onyẹ a marịn ebe wẹ feshi.

18Heuu, Eze Asiria rị Ninivẹ a kị! Ndị-ndu i rị e ru ụran! Ndị isi i e dinẹgụọ ranhịn. Ndị nke ụnụ a gbayịyagụọ elu ugu, onyẹ k'e dulụanị wẹ arịa.

19Y'a rụgụọ eje ẹhụ nwọnlẹni ọgụn! Eje-ẹhụ e gbuni rọ! Onyẹ nụ ihiẹn mẹn'i, ọ ghọghọma, makẹni onwọnni onyẹ i ye la.

← Chapter 2 Jump to: