Nahum 2

Ika 2018 Bible

← Chapter 1 Jump to: Chapter 3 →

1Onyẹ hụn jẹnkọ d'e tikpọ ị kpayịya e kunrungụọ ị, Ninivẹ! D'e weri ni ọnọdị ụlọ-nche! Chemẹkwọ nị ụwaya ụnụ nche! Kọnrin ni agha ọhụnma-ọhụnma! Kịpụhakwọ nị ndị-agha ụnụ ile!

2Makẹni Osolobuẹ e d'e yekin ụmụ Jekọpụ ọghọ, nọkẹ ọghọ Izrẹlụ; ọsụọn'a nị ndị e tikpọnị e tikpọgụọ wẹ la iwi, kpagichanrịn agalaba wẹ.

3Akpaịn ufie kẹ ndị agha hụn onyẹ ahụn kịla d'e tikpọ Ninivẹ bu; ẹwuru ufie kẹ wẹ yizi. Ụgbọ-anyịnyan wẹ rị e be nwanran-nwanran ebe ọ rị a kịpụha wẹ! Wẹ hụ e fehunmẹ igwerigwe obo wẹ!

4Ụgbọ-anyịnyan hụ a gba ẹra-ẹra ụwaya, a gbajẹn a gbalụa imẹ ughere, e nwun kẹ ọkụn-ọwa e feghafe nwaịn-nwaịn nọkẹ amụma!

5Ọ kpọ ndị ọkị-agha a: a pụha wẹ ọgbahu-ọgbahu, a kpọgburu, e jẹn wẹ ebe mgbọn Ninivẹ rị ozigbo-ozigbo; a rụn wẹ okpukpu wẹ gi e gbọnkin ụta ndị Ninivẹ.

6Ọnụ-mgbọn gbọndọn Iyi a gụnpụ; mirin e rukpumẹ obi-eze Ninivẹ!

7A gba wẹ eze-okpoho nwẹn ọtọ, kpụnrụn a, igbọn-ikpoho rịn'a hụ e yi kẹ nduru, tikọ ẹka obi.

8Ninivẹ te nọkẹ ọmị ogẹn ẹ: kanị wẹ rị nwan a gba a a tọ; olu hụ e yi “Kụsị nị! Kụsị nị!” kanị, onwọndẹni onyẹ rị e lee ẹnya azụụn!

9Ndị rị e gbun'ẹ hụ a sị ibe wẹ, “Kwarị nị siliva! Kwarị nị goru! Ihiẹn rịn'a ara gụ kaka! Ihiẹn ile w'a chọ achọ jun ẹ!”

10E tikpọ w'a! E gbukpọ w'a! A gba w'a okpokoro! Obi hụ a nahịn onyẹ ọwụlẹ; ụkụ hụ a ma onyẹ ọwụlẹ nni! Ndụn a gụgụọ onyẹ ọwụlẹ; eje-egun a nwụn ndị Ninivẹ!

11Kị mẹzi Ninivẹ, ụlọ-ẹwọrọ nwẹn? Ebe nwẹn ụmụ ẹwọrọ nọ e ri; ebe nwẹn okẹn lẹ onyẹnnyẹ ẹwọrọ nọ a kpa; nwa-ẹwọrọ a kpadẹ ebẹhụ onwọnni ihiẹn e rọn ẹ egun?

12Okẹn-ẹwọrọ wụ Ninivẹ e te gbu a kwalụanị ndị nke ẹ ihiẹn hụn e jun wẹ ẹfọ. Ẹwọrọ hụ e te tagbugụọnị onyẹnnyẹ ẹ anụ ọda-ọda, e bu ihiẹn alị ndị ọzọ e jun alị wẹ, e gbu anụ e jun ebẹhụ o bi.

13Mmẹ lẹ ịyụ rọ, Ninivẹ! Ya kẹ Osolobuẹ ihiẹn ile rị okpuru ẹ ku. M k'a dụn ụgbọ-anyịnyan ndị ahụn Ninivẹ nwọn ọkụn, e họnrin wẹ ẹnwụnrụn; ọpịa-agha k'e gbuchanrịn ndị nke i hụn wụ ụmụ ẹwọrọ ị, a napụ m'ị alị ndịnị ị rị e gbu a kwarị ihiẹn wẹ; anụkọzị wẹ olu ndị ụkọ ị!

← Chapter 1 Jump to: Chapter 3 →