Titus 1

Ika 2018 Bible

Jump to: Chapter 2 →

1Mmẹ wụ Pọlụ de ẹkụkwọ-ozini. M wụ igbọn Osolobuẹ lẹ onyẹ-ozi pụ-ichẹn Jizọs Kraịstị. Ọrụn m wụ ịkwadọn okukwe ndị hụ Osolobuẹ họrị lẹ imẹ ịhịan marịn ezioku wẹ gi e fe Osolobuẹ k'o furu.

2M rị a rụn kẹni wẹ nwọnhẹn ndụn itẹbitẹ ahụn ẹnyi rị e lee ẹnya a hụn Osolobuẹ ghalẹni a tụ ntụ kwe nkwa a ẹdẹi nị ogẹn d'e bidọndẹ,

3o ru nwan ogẹn ẹ, Osolobuẹ nọ wepụha a ifọn ghahanị ozini o ye m iwu zisọnmẹ. Osolobuẹ mẹ ihiẹnni makẹni Osolobuẹ wụ Onyẹ-nzụọpụha ẹnyi.

4M rị e dejẹnni Taịtọsụ, hụn wụ ezigbo nwa m imẹ okukwe ẹnyi. Ẹfọma lẹ udọn, hụn gha ẹka Osolobuẹ Nẹdi ẹnyi lẹ Kraịstị wụ Jizọsị Onyẹ-nzụọpụha ẹnyi a bịa, ya rịn'ị.

5M la ị tọ alị Kriti n'ị hụn ụzọ dọnkwama ihiẹn họdụnị lẹ n'i tumẹsọnmẹ ndị-ndu ụka imẹ obodo ile rị ebẹhụ kẹ m dọn gwa ị.

6Onyẹ-isi ụka k'a wụrịrị onyẹ nwọnlẹni nkọrịanị, onyẹ nwọn nwunyẹ ohu sụọ; onyẹ hụn ụmụ a wụzị ndị kwerini lẹ ndị wẹ gilẹni eje-obibi mọbụ ịgba isi-akwanran marịn.

7Ebe o mẹ ni onyẹ-isi ụka e lepụ ọrụn Osolobuẹ ẹnya, o furuni n'o nwọn nkọrịanị. Ọ wụkọ onyẹ e mẹ uche ẹ mọbụ onyẹ e bukẹnrin olulu mọbụ onyẹ-manya mọbụ onyẹ ẹka-ikẹn mọbụ onyẹ e mẹ oku egho.

8Kama, o k'a wụrịrị onyẹ ma nabanhan ọbịa; onyẹ hụn imẹ ihiẹn rị mma a sụọ; onyẹ uche ẹ zu oke, onyẹ kụma enwẹn ẹ ọtọ; onyẹ rị nsọ, onyẹ e kwọndọn enwẹn ẹ.

9O k'a marịnrịrị ẹnya nkuzi ahụn furu w'a tụkwasị obi hụn rị okukwe ẹnyi, kẹni ọ saẹka gi nkuzi zu oke a gba ndị ọzọ umẹ, e gizi ẹ a ghọsị ndị hụn a papụ nkuzi ahụn nị wẹ rị e mẹfie.

10Makẹni ndị rị e nupụ isi lẹ ndị rị e ku mpụ lẹ ndị-ndufie bu ọda, tụmadụ ndị ahụn e mẹ oku ịkwa-ugun.

11O furu ni wẹ kpukin wẹ ọnụ! Makẹni, wẹ rị e gi ihiẹn ahụn furulẹni wẹ gi ufiri egho a kuzi a sụkpọsọnmẹ ikpụlọ.

12Onyẹ Kriti ibe wẹ hụn e deni e kugụọd'a, sị, “Ndị Kriti wụ ndị-ntụ, ezigbo eje-anụ, ndị okẹn ihiẹn-oriri, ndị ghalẹni a saẹka a rụn ihiẹn ọwụlẹ.”

13Ezioku k'o ku. A jụgbọ wẹ nwan ọhụnma-ọhụnma, kẹni wẹ hụn ụzọ turu ọhụnma imẹ okukwe,

14e gọnbehi wẹ ilu ndị Ju ntịn, mẹbehi ihiẹn ndị gbakịtọgụ ezioku azụụn rị a gwa wẹ.

15Ẹnya ndị obi wẹ rị ọchan, ihiẹn ile rị ọchan, kanị ẹnya ndị rụnị lẹ ndị gilẹni oku Osolobuẹ dọn, ihiẹn ile rụ arụ — kẹ uche wẹ kẹ ịhọrị wẹ rụzịdẹ arụ.

16Wẹ sị n'a marịnghọ wẹ Osolobuẹ, kanị wẹ e gi ihiẹn w'e mẹ a ghọsị n'a marịn w'a. Wẹ wụ ihiẹn-izize; wẹ a gba isi-akwanran; w'a ra saẹka mẹ ihiẹn ọwụlẹ rị mma.

Jump to: Chapter 2 →