Titus 3

Ika 2018 Bible

← Chapter 2 Jump to:

1Nyanhan nị wẹ nị wẹ e bu enwẹn wẹ e che okpuru ndị-ndu lẹ ndị-ọkịkị, wẹ e humẹ isi; wẹ kwademẹ nị wẹ e mẹ ihiẹn ọwụlẹ rị mma.

2Gwa wẹ ekujalẹ oku ịhịan, wẹ emẹlẹ ndị ikpe-lẹ-ọgụn, wẹ wụrụ ndị e mẹ jụụ lẹ ndị e ye onyẹ ọwụlẹ mgbaye.

3Makẹni, ẹnyi nwẹn te wụzị ndị-nzuzu, ndị nnupụ-isi lẹ ndị wẹ dufie; eje-ihiẹn a gụnnị ẹnyi lẹ ihiẹn ichẹn-ichẹn a sụọnị e te kịzịghọ ẹnyi kẹ igbọn. Ẹnyi te e mẹ ibe ẹnyi eje-ihiẹn, e we iwe-ẹnya, ize ẹnyi hụ e ze ịhịan, ize ibe ẹnyi hụ e ze ẹnyi.

4Kanị, ogẹn Osolobuẹ Onyẹ-nzụọpụha ẹnyi gi mẹni ịhịan ọhụnmanị o gi mẹyeni ịhịan,

5ọ nọ zụọpụha ẹnyi, ẹlẹ ihiẹn rị mma ẹnyi mẹ haịn, kanị, omikẹn ẹ; o gi ịmụdọnzini ẹnyi chanchan ẹnyi, o mẹ ẹnyi wụrụ ndị ọhụn ghahanị Mmọn-nsọ,

6Mmọn-nsọ hụn o ghaha ẹka Jesu Kristi Onyẹ-nzụọpụha ẹnyi hukpu ẹnyi ọhụnma-ọhụnma.

7Hụnnị o gigụ nwan ẹfọma a kuni ẹnyi ọhụnma, ẹnyi e họnringụọ ụmụ a rị e lee ẹnya ndụn itẹbitẹ o kwe nkwa a.

8Ọnwan wụ ezioku. M chọ ni y'e ku ihiẹn ndịnị, e kushi wẹ ikẹn, kẹni ndị kwerigụnị Osolobuẹ hụn ụzọ e dọnrin ẹnya e we enwẹn wẹ a kwanị ọrụn ọma. Ihiẹn ndịnị a rịka mma, w'a bannị ịhịan ile erere.

9Kanị, latọ ndọndọ nzuzu lẹ okẹn ịchọ-alị oku lẹ ikpe-lẹ-ọgụn yeni Iwu Mozizi, makẹni ihiẹn la iwi rọ, erere arịa.

10O mẹ nke onyẹ nkebe, dọ a ẹka-ntịn nke ibuzọ, dọ a nke ẹbụọ, y'a la a tọ — ịyụ lẹ ịya enwọnzilẹ mmẹkọ,

11makẹni ya marịnghọ nị uche onyẹ nọ ẹrịra a rụgụọ, nị onyẹ-njọ k'ọ wụ; o gigụọ njọ ọ rị e mẹ ma enwẹn ẹ ikpe.

12Ozigbo m zihẹn'i Atemasị mọbụ Taịkikọsụ, y'a lịlịma bịa Nịkopolisi d'e kunrun m, makẹni a kwademẹgụọ m obi m nị m k'a nọdị ebẹhụ ogẹn oyini lalanị.

13Lịlịma nị ị hụn a n'o nwọnni ihiẹn kọ ọka-iwu wụ Zẹnasị lẹ Apolọsụ wẹ jẹkọnị ebe wẹ jẹnkọ.

14Ndị nke ẹnyi wẹ mụnrụnzịkwọ kẹ wẹ dọn e we enwẹn wẹ a kwanị ihiẹn rị mma, kẹni wẹ saẹka e ye ẹka ezigbo mkpa pụha, amamgbe w'a wụrụ ndị nwọnlẹni hụn w'a rụn.

15Ndị ile mmẹ lẹ wẹ rị ebeni e zi ekele. Kele ndị ile ihiẹn ẹnyi a sụọ makẹ ofufe-Kraịstị. Ẹfọma Osolobuẹ ya rịnị ụnụ!

← Chapter 2 Jump to: