Titus 2

Ika 2018 Bible

← Chapter 1 Jump to: Chapter 3 →

1Kanị yụ nwẹn, kuzirịrị ihiẹn furu nkuzi kụrụ ọtọ:

2Kuzi ikẹnnyẹ-ọba wẹ wụrụ ndị ẹnya dọn, ndị furu w'a gbaye, ndị e kwọndọn enwẹn wẹ, ndị turu ọhụnma ebe okukwe lẹ ihiẹn-ọsụsụọ lẹ ndidin rị.

3Kuzizi ikpoho-ọba nị w'e bi obibi ndị nsọ; w'e mẹlẹ ndị e kuja oku ịhịan, w'e mẹlẹ igbọn manya kanị ndị a kuzi ihiẹn rị mma,

4kẹni wẹ a saẹka a zụn ikpoho rị wẹ ibe alị nị w'e nwọn ihiẹn-ọsụsụọ di wẹ lẹ ụmụ wẹ,

5nị wẹ e kwọndọn enwẹn wẹ, e dọnmẹ enwẹn wẹ, a ma e bi obi-ụlọ, e mẹ ẹfọma, e bu enwẹn wẹ e che okpuru di wẹ — amamgbe ịhịan e kuja oku Osolobuẹ.

6Ẹrịrazịkwọ, kuzi ikorọbịa nị wẹ wụrụ ndị e kwọndọn enwẹn wẹ.

7Wụrụ onyẹ wẹ e leri imẹ ihiẹn ile rị mma. Ebe nkuzi i rị, wụrụ onyẹ ezioku lẹ onyẹ ghalẹni e gi nkuzi e gu egu,

8onyẹ gi oku kụrụ ọtọ nwọnlẹni nkọrịanị a kuzi, kẹni ifẹnrẹn mẹ ndị iṅẹnrẹn makẹni ahụnnị wẹ eje-ihiẹn wẹ e gi kuja oku ẹnyi.

9Nke idibo lẹ ndị rị okpuru ịhịan, sị wẹ humẹni ndị wẹ rị okpuru wẹ isi; wẹ lịlịma nị wẹ e mẹ ihiẹn a sụọ ndị wẹ rị okpuru wẹ ụsụọ; w'a shịagwarịlẹ wẹ oku;

10w'e zunlẹ wẹ ohin, kama, wẹ ghọsịchanrịn nị wẹ furu wẹ gi e dọn ẹnya ogẹn ile, kẹni wẹ gi obibi wẹ e mẹ nkuzi Osolobuẹ Onyẹ-nzụọpụha ẹnyi a wụrụ ihiẹn a la ẹnya.

11Makẹni, ẹfọma Osolobuẹ gi a zụọpụha ịhịan ile a pụhagụọ ifọn.

12Ẹfọma ahụn a kuzi ẹnyi ịjụ obibi rịlẹni mma ẹnya Osolobuẹ lẹ ịjụ ihiẹn-ọlịlẹnya ụwanị; ọ kuzi ẹnyi igi uche e bi lẹ ibi obibi kụrụ ọtọ lẹ ịtụ egun Osolobuẹ — imẹ ụwanị ẹnyi rị,

13kẹ ẹnyi dọn rị e che okẹn ngọzi ahụn ẹnyi rị e lee ẹnya a, ọbịbịa ahụn Osolobuẹ ẹnyi hi ogbe wụ Jizọsị Kraịstị Onyẹ-nzụọpụha ẹnyi jẹnkọ d'e gi ọghọ bịa.

14Jizọsị Kraịstị, hụn gi ufiri ẹnyi we enwẹn ẹ ye, n'ọ gbapụha ẹnyi imẹ njọ ile, gi ẹ chanchanpụhanị enwẹn ẹ ndị k'a wụchanrịn nke ẹ, ndị ihiẹn rị mma a dụ omumẹ.

15Ya wụ, a kuzi wẹ nwan ihiẹn ndịnị, a gba wẹ umẹ, a jụgbọ wẹ. E mẹ ẹ kẹ onyẹ oku rịchanrịn ẹka. Anịkwọlẹ onyẹ ọwụlẹ legberi i.

← Chapter 1 Jump to: Chapter 3 →