1 Timothy 3

Ilokano (Ti Biblia (1973))

← Chapter 2 Jump to: Chapter 4 →

1Papatien daytoy a sao: No adda agtarigagay iti saad nga obispo, naimbag nga aramid ti tarigagayanna.

2Masapul ngarud a ti obispo awan ti pacapilawanna, asawa ti maymaysa a babai, managparbeng, nasayaat ti ricnana, naemma, managpadagus, nalaing a mangisuro;

3Saan a managinum ti arac, saan a mannakicabil, no di ket naimbag ti awidna; saan a mannakiringgor, saan a naagum ti pirac;

4Maysa a mangituray a naimbag ti balayna met laeng, nga iturayanna dagiti annacna iti amin a kinatacneng;

5(Ta no ti maysa a tao dina ammo ti mangurnos iti balayna met laeng; casanonto ti panangaywanna iti Iglesia ti Dios?)

6Saan a baro iti sursuro, di la ket ta agtangsit ket matnag iti pannacadusa ti diablo.

7Masapul pay nga adda naimbag a damagna cadagiti taga ruar, di la ket ta matnag iti pannacaibabain ken iti silo ti diablo.

8Casta met dagiti diacono natacnengda, saan a dua ti dilada, saanda a managinum ti adu nga arac, saanda a naagum ti pirac;

9A cupicupanda ti palimed ti pammati a buyugen ti nadalus a nakem.

10Ket dagitoy masuutda nga umuna, ket iti casta tumulongda a cas diacono no awanto ti pacapilawanda.

11Casta met, dagiti babbai natacnengda coma saanda a mamadpadakes, managparbengda matalecda iti isu-amin.

12Dagiti diacono assawa coma ida ti maymaysa a babai, nga urnosenda a naimbag dagiti annac ken balbalayda.

13Ta dagiti nagservi a naimbag iti saad a diacono, macagun-odda ti maysa a naimbag a casasaad a maipaay cadacuada, ken bumilegda iti pammati ken Cristo Jesus.

14Dagitoy a banbanag isuratco kenca, a siinanamaac iti iyaayco kenca iti mabiit:

15Ngem no mabayagto, tapno ammom no casano ti maiparbeng a cababalin ti sangacabbalayan ti Dios nga isu ti Iglesia ti Dios a sibibiag, nga adigi ken sadiri ti kinapudno,

16Ket awan duadua, dackel ti palimed ti kinasanto: Daydi naiparang iti lasag, Napanecnecan iti espiritu, Nakita dagiti angel, Naicascasaba cadagiti nacion, Napapati ditoy lubong, Naipangato sadi gloria.

← Chapter 2 Jump to: Chapter 4 →