1 Timothy 6

Ilokano (Ti Biblia (1973))

← Chapter 5 Jump to:

1Dagup dagiti adda iti baba tisangol ti pannacaadipen, ibilangda coma dagiti appoda met laeng a maicari iti isu-amin a dayaw tapno ti nagan ti Dios ken ti sursuro saanda coma a matabbaawan.

2Ket dagiti adda appoda a mamati, saanda coma a pabasitten ti panagraemda, gapu ta cacabsat ida, no di ket agservida coma iti nasaysayaat cadacuada, agsipud ta matalec ket ay-ayaten dagiti umawat ti casta a panagservi. Isurom ket ibalacadmo dagitoy a banbanag.

3No adda mangisuro ti sabali, ket saan nga umanamung cadagiti macapacaradcad a sao ni Apotayo a Jesu-Cristo, ken ti sursuro a mayannurot iti kinasingpet;

4Isu natangsit, nga awan ti ammona, no di ket adda nasakit nga ayatna cadagiti culcul ken panagsususic dagiti sasao, isu a paggapuan ti apal, ringgor, panaguy-uyaw, dagiti panangipagarup a dakes.

5Panagsusungbat dagiti tao a dakes ti nakemda, ket naawananda ti pudno, a pagarupenda a ti nadiosan a biag maysa a pagsapulan.

6Ngem ti nadiosan a biag dackel a gongona no buyugen ti pannacapnec:

7Ta awan ti inyegtayo ditoy lubong, ket ditayto met mabalin ti mangitugut ti aniaman a banag;

8No adda ngarud pagtaraontayo ken pagcawestayo, mapnectayon coma iti daytoy.

9Ngem dagiti agpanggep a bumacnang, matnagda iti maysa a pannacasulisog ken ti maysa a silo, ken cadagiti adu nga agum a minamaag ken macaranggas a mangipalned cadagiti tao iti pannacarba ken pannacapucaw.

10Ta ti ayat ti pirac isu ti maysa a ramut ti isu-amin a kita ti dakes: isu, nga idi inaguman dagiti dadduma, nayawawanda iti pammati ket nasalputda cadagiti adu a ladladingit.

11Ngem sica, O tao ti Dios, pagtalawam dagitoy a banbanag, ket sumurotca iti kinalinteg, ti kinasingpet, ti pammati, ti ayat, ti anus, ti kinaemma.

12Makirupacca iti nasayaat a pannakidangadang ti pammati; petpetam ti biag nga agnanayon isu a nacaawisam, ket impaduyacyacmo ti nasayaat a panagipudno, iti sangoanan dagiti adu a nacaimatang.

13Icumitco kenca, iti imatang ti Dios a mangted ti biag cadagiti isu-amin ken iti imatang ni Cristo Jesus, isu a nangpanecnec iti sangoanan ni Poncio Pilato ti nasayaat a panangipudno;

14A tungpalem coma daytoy a bilin nga awan ti tulawna, awan ti pacababalawanna, agingga iti panagparang ni Apotayo a Jesu-Cristo:

15Isu nga inton aldawna iparangarangto ti bendito ken maymaysa a Mannacabalin, Ari dagiti ar-ari, ken Apo dagiti apap-po;

16Isu laeng nga adaan iti saan nga ipapatay, nga agnaed iti maysa a lawag a di maasitgan, isu a saan a nakita ti uray siasino a tao, ket di met mabalin a kitaen: isu a madaydayaw ken agturay iti agnanayon, Amen.

17Cadagiti nabacnang itoy lubong ibilinmo cadacuada a dida agtangtangsit, ket dida met imaldit ti inanamada cadagiti kinabacnang a pagduaduaan, no di ket iti Dios. Isu a mangted cadatayo iti nawadwad cadagiti isu-amin a pagnam-ayantayo;

18Nga agaramidda coma iti naimbag, a nabacnangda coma cadagiti naimbag nga aramid, a managparanudda, a nalacada a makipagricna;

19Nga agurnongda iti maipaay cadacuada ti maysa a nasayaat a pamunganayan a maisagana iti aldaw a mapasungad, tapno magun-udanda ti biag a pudno.

20O Timoteo, aywanam ti naitalec kenca, nga umadayuca cadagiti palpalawag nga ubbaw ken cadagiti panagsuppiat ti naganenda kinasirib ngem saan a pudno;

21Isu nga idi sinurot dagiti dadduma, naal-lilawda ti maipapan iti pammati. Ti parabur adda coma kenca.

← Chapter 5 Jump to: