1 Timothy 5

Ilokano (Ti Biblia (1973))

← Chapter 4 Jump to: Chapter 6 →

1Dica ungtan ti maysa a lacay, no di ket bagbagaam a cas la amam, dagiti ub-ubing, balacadam ida a cas la cacabsat:

2Dagiti babbaket, a cas la inam; dagiti babbai nga ub-ubing, a cas la cabsatmo iti amin a kinadalus.

3Padayawam dagiti babbai a balo a pudnoda a balo.

4Ngem no adda balo nga adda annacna wenno appona, ammoen coma dagitoy nga umuna nga ipakitada ti kinasingpetda cadagiti cabbalayda met laeng, ken panangliwliwada cadagiti naganac cadacuada; ta daytoy macaay-ayo iti imatang ti Dios.

5Ti pudno a balo, ken taltalipungawen, manginanama iti Dios, ket agtalinaed cadagiti ar-araraw ken dawdawat iti rabii ken aldaw.

6Ngem ti agbibiag cadagiti ragragsac, idinto a sibibiag, adda a natay.

7Ibilinmo met cadacuada dagitoy a banbanag, tapno awan coma ti pacababalawanda.

8Ngem no adda saan a mangtaraon cadagiti adda iti aywanna, ket nangrona dagiti cabbalayna met laeng, naglicudanna ti pammati, ket dacdakes ngem iti saan a mammati.

9Saan coma a pailista ti uray siasino a cas balo, no awan pay innem a pulo a taw-enna, asawa ti maymaysa a lalaki,

10Nga adda naimbag a damagna ti maipapan cadagiti nasayaat nga aramid: no nagtaraken cadagiti annac, no nagpadagus cadagiti gangannaet, no binuggoanna dagiti sacsaca dagiti sasanto, no tinulonganna dagiti naladingit, no sinurotna a sigaganetget dagiti amin a naimbag nga aramid.

11Ngem dica awaten dagiti balo nga ub-ubing; ta inton agbalinda a naalas a maisalungasing ken Cristo, tarigagayanda ti makiasawa;

12A macabasolda gapu ta tinal-licudanda di immuna a carida.

13Ken castamet, iruamda ti di agaramid, a mapanda cadagiti balbalay; ket saan laeng nga awan ti maararamidda, no di ket mannanaoda ken mannakibiangda, a sao-enda dagiti banag a dida rebbeng.

14Tarigagayac ngarud a dagiti ub-ubing (a balo) makiasawada coma, agipasngayda cadagiti annac, urnosenda ti balay, ket dida iccan ti cabusor ti gundawayna nga agsao ti dakes:

15Ta dagiti dadduma simminadan a simmurot ken satanas.

16No adda mammati, nga adda balbalona, palag-ananna coma dagiti pacasapsapulanda ket di coma maipaawit iti Iglesia, tapno tulonganna dagiti pudno a balo.

17Dagiti panglacayen a mangituray a naimbag, maibilangda coma a maicari iti dackel a dayaw, nangrona dagiti agtrabajo iti sao ken panursuro.

18Ta cuna ti Surat: Dicanto busalan ti vaca nga agiric babaen cadagiti sacsacana, ken: Ti mangmangged maicari iti tangdanna.

19Dica umawat ti asug a maibusor iti maysa a panglacayen, no awan ti dua wenno tal-lo a sacsi.

20Dagiti nacabasol, babalawen ida iti sangoanan dagiti isu-amin, tapno dagiti dadduma adda met butengda.

21Dawatec unay, iti imatang ti Dios ken ni Cristo Jesus, ken dagiti anangel a tungpalem dagitoy a banbanag nga awan ti panangipilpili nga awan ti aramidem nga adda pannacaidumdumana.

22Saanmo nga ipatay dagiti im-ima, iti ginaganat iti uray asino, ket dica met makiraman cadagiti basbasol ti sabali: agtalinaedca a nadalus.

23Saanca nga uminumen ti danum, no di ket aramatem ti bassit nga arac, gapu ita rusocmo ken dagiti masansan a nasacsakitmo.

24Dagiti basbasol dagiti dadduma a tao addada a nalawagen, nga unaanda ida iti pannacaocom; ngem cadagiti dadduma sumarunoda.

25Casta met adda naimbag nga ar-aramid a maiparangarangda; ket dagiti saan a casta saanda a mabalin ti mailemmeng.

← Chapter 4 Jump to: Chapter 6 →