2 Samuel 20

Ilokano (Ti Biblia (1973))

← Chapter 19 Jump to: Chapter 21 →

1Ket napasamac nga adda idi sadiay ti maysa a tao a nadangkes a ti naganna Seba, nga anac a lalaki ni Bicri, a maysa a Benjamita: ket pinagunina ti tangguyob, a kinunana, Datayo awan ti biangtayo ken David, uray tawid awanantayo iti anac ni Isai. O Israel tunggal lalaki agturong iti toldana.

2Iti casta isu-amin a lallaki ti Israel binay-anda ti isusurot ken David, ket simmang-atda a simmurotda ken Seba, nga anac ni Bicri; ngem dagiti lallaki ti Juda kimmapponda iti arida, nanipud iti Jordan aginggana iti Jerusalem.

3Ket ni David immay iti balayna sadi Jerusalem, ket ti ari innalana dagidi sangapulo a camalalana daydi imbatina nga agaywan iti balay, ket impupucna ida, ket iniccanna ida iti taraon, ngem saan a simrec cadacuada. Iti casta napupucda inggana iti aldaw ti ipapatayda, a nagbibiagda iti kinabalo.

4Ket ti ari kinunana ken ni Amasa, Ayabam caniac dagiti lallaki ti Juda nga agtitipon iti tallo nga aldaw, ket sica pumarangca ditoy.

5Iti casta ni Amasa napan a nangayab cadagiti lallaki ti Juda nga agtitipon; ngem nagtactac iti nabaybayag ngem iti tiempo a nakedngan a naituding kencuana.

6Ket ni David kinunana ken Abisai, Ita ni Seba nga anac ni Bicri agaramidto iti dacdakes cadatayo ngem ni Absalom: mangalaca cadagiti ad-adipen ni apom, ket isu camatem, tapno isu saan coma a macagun-od cadagiti il-ili a nasarikedkedan, ket macatalaw iti imatangtayo.

7Ket rimmuarda a simmurot kencuana dagiti lallaki ni Joab, ken dagiti Cereteos, ken dagiti Felesteos, ken isu-amin dagiti mamaingel a tattao; ket rimmuarda sadi Jerusalem, tapno camatenda ni Seba nga anac ni Bicri.

8Idi nga addada iti denna ti dackel a bato nga adda idiay Gabaon, ni Amasa rimmuar a simmabet cadacuada, ket ni Joab nacabarikes iti cawesna a pakigubat, ket iti rabawna adda barikes agraman campilan a naigalut ti calubanna iti rabaw ti lomona; ket idi a rimmuar siasut.

9Ket ni Joab kinunana ken ni Amasa, Adda imbag kenca, cabsatco? Ket ni Joab iniggamanna iti imana a canawan ti timid ni Amasa tapno isu ti agcanna.

10Ngem ni Amasa dina inannadan ti campilan nga adda idi ima ni Joab; iti casta isu ti panangcabilna kencuana iti bagina, ket naiburayray dagiti lalaemna iti daga, ket saanna a kinabilen; ket natay. Ket ni Joab ken ni Abisai a cabsatna kinamatda ni Seba, nga anac ni Bicri.

11Ket ti maysa cadagiti agtutubo a lallaki ni Joab nagtacder iti dennana, ket kinunana, Daydiay a mangsaranay ken ni Joab, ken daydiay nga agpaay ken ni David, sumurot coma ken ni Joab.

12Ket ni Amasa napasag a nagilad idi darana iti tengnga ti napatag a dalan. Ket idi a daydi a tao makitana nga isu-amin a tattao sumardengda idi, inlisina ni Amasa iti napatag a dalan nga inpa-away, ket inabbunganna iti maysa a pagan-anay, idi a nakitana a tumunggal maysa nga immay iti dennana nagsardeng.

13Ket idi a nailisi iti napatag a dalan, isu-amin dagiti tattao simmurotda ken ni Joab, nga agcamat ken ni Seba nga anac ni Bicri.

14Ket isu napan cadagiti isu-amin a caputotan ti Israel agingga iti Abel, ken Bet-maaca, ken isu-amin a Beritas: ket naguornongda, ket kimmamatda met a simmaruno kencuana.

15Ket immayda ket isu linacubda idiay Abel ti Bet-maaca, ket nangicabilda iti turod a maibusor iti sarikedked; ket isu-amin a tattao nga adda idi ken Joab nagtubtobda iti bacud, tapno duprakenda.

16Idin maysa a masirib a babai imkis ken Joab nanipud iti ili, a kinunana, Denggenyo, denggenyo, agdawatac cadacayo, umadanica coma ditoy, tapno makisaoac coma kenca.

17Ket immasideg kencuana; ket ti babai kinunana, Sica ni Joab? Ket isu simmungbat, Siac. Idin isu kinunana kencuana, Denggem dagitoy balicas ti adipenmo a babai. Ket isu simmungbat, Denggec.

18Idin isu nagsao, a kinunana, Cadawyan a saoen idi ugma, a cuna, Pudno a sumaludsuddanto iti patigmaan idiay Abel, ket iti casta naturposdan ti panggep.

19Siac maysaac cadagiti natalna ken nasongdo ti Israel: sica birukem ti panangdadaelmo iti maysa nga ili ken iti maysa nga ina iti Israel: apayapay nga alun-unemto ti maysa a tawid ni Jehova?

20Ket ni Joab simmungbat a kinunana, Adayu coma, adayu coma caniac, a siac alun-unec coma wenno dadaelec.

21Ti panggep saan a casta: ngem ti maysa a tao ti caturodan ti Efraim, a managan Seba, nga anac ni Bicri, intagayna ti imana a maibusor iti ari, a maibusor met laeng ken David; itedyo cadacami nga is-isu, ket siac panawacto ti ili. Ket ti babai kinunana ken Joab, Adtoy, a ti olona maipalladawto kenca a mailayaw iti bacud.

22Idin ti babai iti kinasiribna napan iti isu-amin nga umili. Ket isuda pinutolda ti olo ni Seba nga anac ni Bicri, ket isu impalladawda ken Joab. Ket isu pinagunina ti tangguyob, ket isuda amin nagwarada nanipud iti ili, tunggal maysa napan iti toldana. Ket ni Joab simmubli iti ari idiay Jerusalem.

23Ket ni Joab naisaad a pangolo ti amin a buyot ti Israel; ket ni Banaya nga anac ni Joiada isu ti pangolo dagiti Cereteos ken Felesteos;

24Ket ni Aduram isu ti pangolo cadagiti agtartrabajo; ket ni Josafat nga anac ni Ahilud isu ti registrador;

25Ket ni Siba isu ti escriba; ket da Sadoc ken Abiatar isuda dagiti papadi;

26Ket casta met a ni Ira a Jaireo isu ti cangatoan a ministro ken David.

← Chapter 19 Jump to: Chapter 21 →

Recommended Reading

Commentary 2 Samuel Commentaries → Devotional 2 Samuel Devotional Guide → Get This Bible 1973 Study Bible →