2 Samuel 24

Ilokano (Ti Biblia (1973))

← Chapter 23 Jump to:

1Ket ti pungtot ni Jehova simged manen a maibusor iti Israel, ket tinignayna ni David a maibusor cadacuada, a kinunana, Inca, bilangem ti Israel, ken ti Juda.

2Ket ti ari kinunana ken ni Joab a capitan ti buyot, nga adda idi kencuana, Inca ita ditoy ken idiay cadagiti amin a caputotan ti Israel, manipud Dan inggana iti Beerseba, ket bilangem ti umili, tapno maammoac coma ti dagup ti umili.

3Ket ni Joab kinunana iti ari, Ita ni Jehova a Diosmo nayonanna ti umili, iti mamingasut ngem ti adda a bilangda coma, ket dagiti mata ti apoc nga ari isu ti makitana coma: ngem apay aya a ti apoc nga ari agragsac itoy a banag?

4Nupay casta ti sao ti ari pinarmecna ni Joab, ken dagiti capcapitan ti buyot. Ket ni Joab ken dagiti capcapitan ti buyot rimmuarda a naggapu iti saclang ti ari, tapno mapanda bilangen ti umili ti Israel.

5Ket bimmallasiwda iti Jordan, ket nagpacarsoda idiay Aroer, iti abay a canawan ti ili nga adda iti tengnga ti lobong sadi Gad, ken agingga iti Jazer:

6Sada dimteng iti Galaad, ken iti daga sadi Tatim-hodsi; ket napanda iti Danjaan, ken naglicmut agingga iti Sidon,

7Ket dimanonda iti sarikedked ti Tiro, ken cadagiti isu-amin nga il-ili dagiti Heveo, ken dagiti Cananeo; ket rimmuarda iti abagatan ti Juda, idiay Beerseba.

8Iti casta idi a napanda ditoy ken idiay iti isu-amin a daga, immayda iti Jerusalem iti calpasan ti siam a bulan ken duapulo nga aldaw.

9Ket ni Joab intedna ti dagup ti bilang ti umili iti ari: ket idiay Israel adda idi walo gasut a ribu a tattao a mamaingel a nagtagicampilan; ket dagiti lallaki ti Juda adda idi lima gasut a ribu a lallaki.

10Ket ti puso ni David nagsennaay iti calpasan nga isu pinabilangna ti umili. Ket ni David kinunana ken Jehova, Siac nacabasolac iti dackel unay iti daydiay nga inaramidco: ngem ita, O Jehova, agdawatac kenca, a pacawanem coma ti basol toy adipenmo; ta siac nagaramidac a simamaag unay.

11Ket idinto a ni David bimmangon iti bigat, ti sao ni Jehova immay ken ni mammadto a Gad, a mammadto ni David, a kinunana,

12Inca, ket saoem ken ni David, Castoy ti cuna ni Jehova, Tallo a banag ti igay-atco kenca: sica mangpilica iti maysa cadacuada, nga aramidec coma kenca.

13Iti casta ni Gad immay ken ni David, ket imbagana ken kinunana kencuana, Umaydanto kenca iti dagam dagiti pito a tawen ti bisin? wenno italtalawamto iti tallo a bulan ti saclang dagiti cabusormo iti bayat nga isuda camcamatendaca? wenno addanto angol iti tallo nga aldaw iti dagam? Panunotem ita, ket kitaem no ania ti sungbat nga isublicto iti daydiay a nangibaon caniac.

14Ket ni David kinunana ken ni Gad, Naladingitac iti napalalo: coma iti ima ni Jehova; ta dagiti caasina dadackelda; ket saanac coma a matnag iti ima ti tao.

15Iti casta ni Jehova imbaonna ti maysa nga angol iti Israel nanipud iti bigat inggana met laeng iti tiempo a nadutocan; ket natayda cadagiti tattao nanipud Dan agingga met laeng iti Beerseba ti pitopulo ribu a tattao.

16Ket idi a ti angel inyunnatna ti imana iti Jerusalem tapno isu dadaelenna, ni Jehova imbabawina ti dakes, ket kinunana iti angel a mangdadael iti umili, Umanayen; ita itukenmo ta imam. Ket ti angel ni Jehova adda idi iti denna ti pagtaltagan ni Arauna a Jebuseo.

17Ket ni David nagsao idi ken Jehova idi a makitana ti angel a mangcabil idi iti umili, ket kinunana, Adtoy, nacabasolac, siac nagaramidac a sidadangcoc; ngem dagitoy a carnero ania ti inaramidda? Agdawatac kenca, a palubosam coma ta imam a maibusor coma caniac, ken maibusor iti balay ni amac.

18Ket ni Gad immay ken ni David idi nga aldaw, ket kinunana kencuana, Sumang-atca, mangbangonca iti maysa nga altar ken ni Jehova idiay pagtaltagan ni Arauna a Jebuseo.

19Ket ni David simmang-at a mayalubog iti panagsao ni Gad, a cas imbilin ni Jehova.

20Ket kimmita ni Arauna, ket nakitana ti ari ken dagiti ad-adipenna nga umayda kencuana: ket ni Arauna rimmuar, ket incul-obna ti rupana iti daga iti sango ti ari.

21Ket ni Arauna kinunana, Apayapay nga umay ti apoc nga ari iti adipenna? Ket ni David kinunana, Tapno gatangec kenca ti pagtaltagan, tapno mangbangonac kencuana iti maysa nga altar ken ni Jehova, tapno ti didigra maituken coma iti umili.

22Ket ni Arauna kinunana ken ni David, Alaen coma ti apoc nga ari ket idatonna coma ti pagarupenna a naimbag: adtoy, dagiti vacvaca a maipaay iti daton a mapuuran, ken dagiti aruaten ti agbayo, ken dagiti sangsangol dagiti vacvaca maipaay a sungrod.

23Isu-amin dagitoy, O ari, ni Arauna itedna iti ari. Ket ni Arauna kinunana iti ari, Ni Jehova a Diosmo awatennaca coma.

24Ket ti ari kinunana ken ni Arauna, Saan; no di ket pudno a gatangec kenca iti maysa a pateg; diacto mangidaton ken Jehova a Diosco iti mapuuran a daton a diac ginatang. Iti casta ni David ginatangna ti pagtaltagan ken dagiti vacvaca iti lima pulo a siclo a pirac.

25Ket ni David nangbangon sadiay iti maysa nga altar ken ni Jehova, ket nangidaton cadagiti mapuuran a datdaton ken datdaton ti cappia. Iti casta ni Jehova nacararagan a gapu iti daga, ket ti didigra naisardeng idi iti Israel.

← Chapter 23 Jump to: