2 Samuel 7

Ilokano (Ti Biblia (1973))

← Chapter 6 Jump to: Chapter 8 →

1Ket naaramid, idi a ti ari agnanaed idiay balayna, ket ni Jehova intedna kencuana ti talna cadagiti isu-amin a cabusorna iti aglicmut.

2A ti ari kinunana ken mammadto a Natan, Kitaem ita, siac agnaedac iti balay a kinantingenan, ngem ti lacasa ni Jehova agnaed iti uneg dagiti bengbeng.

3Ket ni Natan kinunana iti ari, Inca, aramidem amin dayta nga adda ita pusom; ta ni Jehova adda kenca.

4Ket naaramid idi met laeng a rabii, a ti sao ni Jehova immay ken Natan, a kinunana,

5Inca ket cunaem ken adipenco a David, Castoy ti cuna ni Jehova, Sica mangaramidcanto iti balay a maipaay caniac a pagtaengac?

6Ta saanac a nagnaed iti maysa a balay nanipud iti aldaw a panangaonco cadagiti annac ti Israel idiay Egipto agingga iti daytoy nga aldaw met laeng, no di ket nagnaac iti tolda ken iti tabernaculo.

7Cadagiti isu-amin a luglugar a nakipagnaac cadagiti isu-amin nga annac ti Israel, nangisaoac aya ti maysa a balicas iti uray asinoman cadagiti caputotan ti Israel, a nangibilinac a mangipaarab iti ilic nga Israel, a kinunac, Apayapay didac imbangonan iti balayco a kinantingenan?

8Gapuna ita daytoy ti cunaemto ken adipenco a David, Castoy ti cuna ni Jehova dagiti buybuyot, Siac innalaca nanipud iti pagaponan ti carnero, nanipud iti pagsarsarunoan iti carcarnero, tapno sica ti pangolo iti ilic, nga Israel;

9Ket addaac idi kenca iti uray sadino a napnapanam, ket iti sangoanam kineltayco amin dagiti cabusormo; ket pinagbalinca a nagan a dackel, a cas iti nagan dagiti dadackel, nga addada ditoy daga.

10Ket itudingconto ti maysa a lugar a maipaay iti ilic nga Israel, ket imulacto ida, tapno agnaedda coma iti lugarda met laeng ket dida coma mayallatiwen; iti uray caano dagiti annac ti kinadakes didanto parigatenen ida, a cas la idi unana,

11Ken cas nanipud iti aldaw a panangbilinco cadagiti agoc-ocom iti ilic nga Israel; ken aramidecto kenca ti inana cadagiti isu-amin a cabusormo. Casta met a ni Jehova ibagana kenca a ni Jehova yaramidannacanto iti maysa a balay.

12Intono dagiti al-aldawmo naturposdan, ket makiturogcanto cadagiti ammam, bangonecto ti putotmo a sumaruno kenca, isu nga agtaudto ita tianmo; ket pasingkedacto ti pagarianna.

13Isu mangbangonto iti balay a maipaay iti naganco; ket pasingkedacto iti agnanayon ti trono ti pagarianna.

14Siacto ti amana, ket isunto ti anacco: no isu agaramidto iti dakes, isu dusaecto iti sarucod dagiti lallaki, ken iti baot dagiti annac dagiti lallaki;

15Ngem ti naayat a kinaimbagco dinto sumina kencuana, a cas iti panangisinac idi ken Saul, nga iniccatco idi iti sangoanam.

16Ket mapatalgedanto ti balaymo ken ti pagariam iti agnanayon iti sangoanam: ti tronom mapasingkedanto nga agnanayon.

17Mayalubog cadagitoy amin a sasao, ken mayalubog iti amin daytoy a parparmata, casta ti panangisao ni Natan ken David.

18Idin ni ari David simrec, ket nagtugaw iti sango ni Jehova; ket kinunana, O Apo Jehova, siasinoac aya, ken ania aya ti balayco, tapno inyegnac agingga ditoy?

19Ket daytoy bassit pay laeng a banag cadagita matam, O Apo Jehova; ngem saoem met iti maipapan iti balay ti adipenmo iti naunday a tiempo a mapasungad; ken daytoy pay a mayannurot iti cadawyan dagiti lallaki; O Apo Jehova!

20Ket ania pay ti mabalin a saoen ni David kenca? ta sica ammom ti adipenmo, O Apo Jehova.

21Gapu iti saom, ken mayalubog ita pusom met laeng, inaramidmo daytoy a kinadackel, tapno isu ti ipacaammom iti adipenmo.

22Gapuna a sica nadayagca, O Jehova a Dios: agsipud ta awan ti sabali a cas kenca, awan ti siasinoman a Dios iti lacsidmo, a mayalubog iti isu-amin a nangnangegmi babaen cadagiti lapayagmi.

23Ket ania ti maysa a nacion nga adda iti daga a cas iti ilim, nga ti Israel met laeng, isu a napanan ti Dios a nangsubbot a maipaay kencuana met laeng a maysa nga ili, ket isu naaramid a maysa a nagan, ken naaramid dagiti dadackel a banag a gapu kenca, ken dagiti nacakigkigtot a banag a gapu iti dagam, iti sango ti ilim, a sinubbotmo a maipaay kenca nanipud Egipto, nanipud cadagiti nacion ken cadagiti didiosda?

24Ket sica binangonmo a maipaay kenca met laeng ti ilim nga Israel tapno isu ti ilim nga agnanayon; ket sica, Jehova, nagbalinca a Diosda.

25Ket ita, O Jehova a Dios, ti sao nga insaom maipapan iti adipenmo, ken maipapan iti balayna, isu pasingkedam iti agnanayon, ket aramidem coma a cas iti insaom.

26Ket madayaw coma ti naganmo iti agnanayon, a cunaen, Ni Jehova dagiti buybuyot isu ti Dios ti Israel; ket ti balay ni adipenmo a David mapatibkerto iti saclangmo.

27Ta sica, O Jehova dagiti buybuyot, a Dios ti Israel impaltiingmo iti adipenmo, a cunam, Siac ibangonancanto iti maysa a balay: gapuna a ti adipenmo napataud iti pusona a mangicararag kenca iti daytoy a cararag.

28Ket ita, O Apo Jehova, sica ti Dios, ket dagiti sasaom pudnoda, ket incarim daytoy naimbag a banag iti adipenmo:

29Gapuna ita, a maay-ayoca coma a mangbendicion iti balay ti adipenmo, tapno agnanayon coma nga agtaeng iti sangoanam; ta sica, O Apo Jehova, insaom idi; ket babaen ti pammendicionmo mabendicionan coma ti balay ti adipenmo iti agnanayon.

← Chapter 6 Jump to: Chapter 8 →