2 Thessalonians 1

Ilokano (Ti Biblia (1973))

Jump to: Chapter 2 →

1Ni Pablo, ni Silvano ken ni Timoteo, isuratda iti Iglesia dagiti taga Tesalonica, nga adda iti Dios nga Amatayo ken ni Apo Jesu-Cristo;

2Parabur ken talna ti Dios Ama ken ni Apo Jesu-Cristo, adda coma cadacayo.

3Rebbengmi ti agyaman a cancanayon gapu cadacayo cacabsat, cas maicari, agsipud ta rumang-ay unay ti pammatiyo ket dumacdackel ti panagayat ti maysa ken maysa cadacayo amin;

4Nga iti casta dacami pagpasindayawdacayo cadagiti Iglesia ti Dios, a maipuon iti anusyo ken pammati iti tengnga dagiti isu-amin a pannacaidadanes ken rigat a sagabaenyo;

5Isuda a nalawag a pacailasinan ti nalinteg a panangipato ti Dios; maipaay iti pannacaibilangyo a maicari iti pagarian ti Dios, isu met a pacaigapuan ti panagsagabayo:

6A no coma no nalinteg iti biang ti Dios, a maisupapac ti rigat cadagiti mamarigat cadacayo.

7Ket dacayo a maparparigat, aginanacayo a mairaman cadacami, intono maiparangarang ni Apo Jesus, nga aggapu sadi langit, agraman cadagiti angelna cadagiti darang ti apuy.

8A balsenna dagiti saan a mangammo iti Dios, ken di agtulnog iti evangelio ni Apotayo a Jesus:

9Isuda madusadanto iti agnanayon a pannacapucaw a maisinada iti sangoanan ti Apo ken ti dayag ti pannacabalinna,

10Inton umay, tapno maidaydayaw cadagiti sasantona, ken maaramid a nacascasdaaw iti dayta nga aldaw cadagiti amin a namati: (ta ti pangpanecnecmi cadacayo, napapati).

11Gapu itoy a panggep, cancanayon nga idawdawatdacayo, tapno ti Diostayo ibilangnacayo a maicari iti nacaawisanyo, ket pagbanagenna ti isu-amin a tarigagay ti kinaimbag ken aramid ti pammati, a buyugen ti pannacabalin;

12Tapno ti nagan ni Apotayo a Jesus madaydayaw cadacayo, ket dacayo, kencuana, a mayalubog iti parabur ti Diostayo, ken ni Apo Jesu-Cristo.

Jump to: Chapter 2 →