2 Thessalonians 3

Ilokano (Ti Biblia (1973))

← Chapter 2 Jump to:

1Camaudianna, cacabsat, icarcararagandacami, tapno ti sao ti Apo agtaray ket madaydayaw, a cas met maaramid cadacayo;

2Ken tapno maisalacancami cadagiti tao a macarengreng ken dakes; ta saanda a mamati amin.

3Ngem ti Apo matalec, isu a mamagtalinaedto cadacayo, ket aluadannacayto iti dakes.

4Ket adda panagtalecmi iti Apo no maipapan cadacayo, nga aramidenyo, ken aramidenyonto dagiti ibilinmi cadacayo.

5Ket ti Apo idalanna coma dagiti puspusoyo iti ayat ti Dios, ken iti anus ni Cristo.

6Ibilinmi ngarud cadacayo, cacabsat, babaen ti nagan ni Apotayo a Jesu-Cristo, a panawanyo ti amin a cabsat a magna iti saan a naurnos, ket saan a cas iti sursuro nga inawatyo cadacami.

7Ta dacayo met laeng ammoyo no casano ti rebbengyo a panangtulad cadacami ta dicami nagna iti naculcul iti tengngayo;

8Ket dacami met kinnan ti tinapay ti siasinoman a tao nga awan bayadna no di ket nagtrabajocami a nagbannog ken binuyog ti narigat a panagtrabajo, iti rabii ken aldaw, tapno dicami madagsenan ti siasinoman cadacayo.

9Saan a gapu ta awan ti calinteganmi, no di ket tapno agbalincami nga ulidan cadacayo, tapno tumuladcayo cadacami.

10Ta uray pay idi addacami cadacayo, imbilbilinmi cadacayo daytoy: No adda madi nga agtrabajo, di met coma mangan.

11Ta madamdamagmi nga adda dadduma cadacayo a magnada iti saan a naurnos, a dida sangoen ti uray ania nga aramid, no di ket manangsalsalida.

12Cadagita a tao, ngarud, ibilinmi cadacuada ken bagbagaanmi ida gapu ken Apo Jesu-Cristo, nga agtrabajoda a sitatalna ket canenda ti tinapayda met laeng.

13Ngem dacayo, cacabsat, saancayo coma a maupay nga agaramid ti naimbag.

14Ket no addanto di mangtungpal iti saomi, gapu itoy a surat, usigenyo dayta, ket dicayo makicuyog kencuana, tapno mabainan.

15Ngem dicayo ibilang a cabusor, ngem bagbagaanyo a cas cabsat.

16Ket ti met laeng Apo ti talna iccannacayo coma ti talna, iti cancanayon ken cadagiti isu-amin a casasaad. Ti Apo adda coma cadacayo amin.

17Ti cablaaw sinuratan toy imac met laeng, Pablo; isu ti pagilasinan iti tunggal Surat: castoy ti panagsuratco.

18Ti parabur ni Apotayo a Jesu-Cristo agtaeng coma cadacayo amin.

← Chapter 2 Jump to: