2 Thessalonians 2

Ilokano (Ti Biblia (1973))

← Chapter 1 Jump to: Chapter 3 →

1Ngem no maipapan iti iyaay ni Apotayo a Jesu-Cristo, ken iti pannakigimongtayo kencuana, dawatenmi cadacayo, cacabsat;

2A dicayo coma paalis a sipapardas iti panunotyo, ket dicayo paririboc uray gapu iti espiritu, uray gapu iti sao, uray gapu iti surat a cas naggapu cadacami a cas la nga asidegen ti aldaw ti Apo;

3Dicayo paallilaw iti uray siasino iti uray aniaman; ta dinto umay no dipay umuna ti panaglicud, ken maiparangarang ti tao ti basol, ti anac ti pannacapucaw,

4Isu a sumalungasing ken agpalangguad a bumusor iti isu-amin a managan Dios, wenno ti nairucbab; ket iti casta agtugaw iti templo ti Dios, nga agparang a cas la isu ti Dios.

5Dicayo malagip nga idi addaac pay laeng cadacayo, imbagbagac cadacayo dagitoy a banbanag?

6Ket ita ammoyo ti mangtiped kencuana, tapno maiparangarang iti tiempona.

7Ta ti palimed ti kinadakes agar-aramiden; isuna laeng nga adda ita mangigawid agingga iti isu ti maiccat iti tengnga.

8Ket iti casta maiparangarangton ti nadangkes isu a papatayento ni Apo Jesus babaen ti espiritu ti ngiwatna, ket pucawennanto babaen ti rangrang ti yaayna;

9Daydiay nga ti iyaayna cas iti panangaramid ni Satanas, a mapacuyugan iti amin a pannacabalin, ken dagiti pagilasinan, ken dagiti ulbod a datdatlag.

10Ken ti amin nga allilaw ti kinadakes, a maipaay cadagiti mapucaw; agsipud ta dida inawat ti ayat ti kinapudno, a maipaay coma a pacaisalacananda.

11Ket gapu itoy, ti Dios ipaw-itna cadacuada ti kinabileg ti allilaw, tapno patienda ti tiri;

12Tapno maocom coma amin dagiti di namati iti pudno, no di ket nagray-wanda ti kinakil-lo.

13Ngem rebbengmi ti agyaman a cancanayon iti Dios, gapu cadacayo, cacabsat nga dongdongoen ti Apo, agsipud ta pinilinacayo ti Dios, nanipud idi punganay, a maipaay iti pannacaisalacan babaen iti pannacasantificar ti Espiritu ken ti pammati iti pudno:

14Isu a nangayabanna cadacayo a gapu iti evangeliomi, tapno magunodan ti gloria ni Apotayo a Jesu-Cristo.

15Iti casta ngarud, cacabsat, bumilegcayo ket taginayonenyo dagiti ug-ugali a naisuro cadacayo, iti sao man ken iti suratmi.

16Ket ni Apotayo a Jesu-Cristo met laeng, ken ti Dios nga Amatayo, isu a nagayat cadatayo, ket iniccannatayo iti agnanayon a liwliwa ken nasayaat nga inanama gapu iti parabur,

17Liwliwaenna coma dagiti puspusoyo, ket patibkerenna coma ida iti isu-amin nga aramid ken sao a naimbag.

← Chapter 1 Jump to: Chapter 3 →