Job 20

Ilokano (Ti Biblia (1973))

← Chapter 19 Jump to: Chapter 21 →

1Idin simmungbat ni Sofar a Naamatita, ket kinunana,

2Gapuna a dagiti panpanunutco sungbatandac, gapu met laeng iti ganat nga adda caniac.

3Nangngegco idi ti panangtubngar a nangibabain caniac; ket ti espiritu ti panagawatco sinungbatannac.

4Dica ammo aya daytoy a nanipud idi ugma, nanipud pannacaisaad ti tao iti rabaw ti daga,

5A ti panagballigi ti dakes ababa, ken ti rag-o ti nadangkes apagcanito laeng?

6Nupay no ti catayagna ngumato agingga cadagiti langlangit, ket ti olona gumaw-at cadagiti ul-ulep;

7Nupay casta mapucawto iti agnanayon a cas iti iblengna met laeng; dagiti nacakita idi kencuana cunadanto, Sadino ti yanna?

8Tumayabto a cas maysa a tagtagainep, ket dinto masaracan: wen, mapagtalawto a cas maysa a parparmata ti rabii.

9Ti mata a nacakita kencuana isu ti dinanto makitan uray caano; uray ti nagsaadanna dinanto mabigbigen uray caano.

10Dagiti annacna sapulendanto ti parabur ti napanglaw, ket dagiti im-imana isublidanto ti sanicuana.

11Dagiti tultulangna mapnoda iti kinaagtutubona, ngem makipagpasagdanto kencuana iti tapoc,

12Nupay no ti kinadangcoc nasamit iti ngiwatna, nupay no isu ti ilemmengna iti baba ti dilana.

13Nupay no isu ti iliclicna, ket dinanto palubosan a mapan, no di ket isu ti aywananna pay laeng iti uneg ti ngiwatna;

14Uray casta ti taraonna cadagiti lalaemna agbaliw, isu ti apro dagiti aspides iti unegna.

15Nagalun-un cadagiti kinabacnang, ket ibacuarnanto ida manen; ti Dios aonennanto ida idiay tianna.

16Isu susupennanto ti gita dagiti aspides: Ti dila ti carasaen ti mangpatayto kencuana.

17Dinto macakita cadagiti carcarayan, dagiti agay-ayus a burayoc ti diro ken mantequilla.

18Ti nagbannoganna a ginun-od isublinanto, ket isu ti dinanto alun-unen; cas iti cucua nga innalana idi, dinanto pagrag-oan.

19Ta pinarigat ken binay-anna ti napanglaw; isu immagaw idi iti maysa a balay, ket isu ti dinanto bangonen.

20Agsipud ta dina binigbig ti kinatalna iti unegna, awanto ti maibatina uray bassit iti dayta a pagragragoanna.

21Awan ti nalabasan a dina inalun-un; gapuna ti kinarang-ayna dinto agnanayon.

22Iti kinapunno ti panaglapusananna agbalinto a kinakirang. Ti ima ti tunggal nacaay-ay-ay agdissodanto kencuana.

23Intono dandanina punnoen ti tianna, ti Dios ipalladawnanto kencuana ti rungsot ti ungetna, ket isu ti maitudo kencuana bayat ti pannanganna.

24Isu itarayannanto ti igam a landoc, ket isu salputento ti ba-i a gambang:

25Isu gab-utenna ken iruarna iti bagina; wen, ti nasilap a murdong rumuar iti aprona: dagiti nacakigkigtot addada iti rabawna.

26Amin a kinasipnget maidulin a maipaay a gamgamengna: Maysa nga apuy a di-puyotan ti tao ti mangalununto kencuana; isu ti mangrunawto iti adda a nabati idiay toldana.

27Dagiti langlangit ipalgacdanto ti kinadangkesna, ket tumacderto ti daga a maibusor kencuana.

28Ti mainayon iti balayna pumanawto; dagiti cucuana agayusdanto iti aldaw ti pungtotna.

29Daytoy ti pannacabiang ti nadangcoc nga aggapu iti Dios, ken ti tawid nga intuding ti Dios kencuana.

← Chapter 19 Jump to: Chapter 21 →