Job 34

Ilokano (Ti Biblia (1973))

← Chapter 33 Jump to: Chapter 35 →

1Simmungbat manen ni Eliu, ket kinunana,

2Denggenyo dagiti sasaoc, dacayo mamasirib a tattao; ket timudendac, dacayo nga addaan pannacaammo.

3Ta ti lapayag suutenna dagiti sasao, cas panangraman ti ngadas iti taraon.

4Pilientayo coma nga agpaay cadatayo no asino ti nalinteg: ammoentayo coma cadatayo met laeng no ania ti naimbag.

5Ta ni Job kinunana idi, Nalintegac, ket ti Dios iniccatna ti calintegac:

6Nupay adda calintegac maibilangac a maysa a managulbod; ti sugatco saan a maagasan nupay siac awan labsingco.

7Asino a tao ti cas ken Job, a manginum ti panangumsi a cas la danum,

8A mapan cumuyog cadagiti managaramid iti kinadangkes, ken makipagna cadagiti nadangcoc a tattao?

9Ta isu kinunana, Awan magunguna ti maysa a tao, a makipagrag-o coma iti Dios.

10Gapuna nga imdengandac, dacayo tattao a mannacaawat: adayu coma nga ipagarup a ti Dios, aramidenna ti kinadangcoc, ken iti Mannacabalin, nga isu aramidenna coma ti kinadangkes.

11Ta ti aramid ti tao isu isupapacnanto kencuana, ken ipasarungcarna iti tunggal tao dagiti dalanna.

12Wen, ti kinapudnona, ti Dios dinto agaramid a sidadangcoc, uray ti Mannacabalin dinanto met killoen ti kinajusticia.

13Asino ti nangted kencuana ti panagakem iti daga? Wenno asino ti nangimaton iti amin a lubong?

14No isu insaadna ti pusona kencuana met laeng. No inurnongna kencuana met laeng ti espirituna ken ti angesna;

15Amin a lasag mapucawto a padapada, ket ti tao agsublinto manen iti tapoc.

16No addaanca ngarud iti panagawat, denggem daytoy: ipangagmo ti timec dagiti sasaoc.

17Agturayto met laeng aya ti gumura iti kinajusticia? Ket dusaemto aya ti nalinteg ken mannacabalin?

18Daydiay nga agcuna iti ari, Sica nacas-angca, wenno cadagiti natacneng, Dacayo nadangcoccayo;

19Ti di agraem cadagiti kina-tao dagiti principe, wenno mangipangpangrona iti bacnang ngem iti napanglaw; ta isuda amin aramid ida dagiti im-imana.

20Iti apagdaricmat matayda, uray iti tengnga ti rabii; dagiti tattao magungonda ket aglabasda, ket dagiti mamaingel maiccatda nga saan nga iti ima.

21Ta dagiti matana addada cadagiti daldalan ti tao, ket isu kitkitaenna amin a pappapananna.

22Awan ti sipnget wenno napuscol nga anniniwan, isu a paglemmengan coma dagiti managaramid ti kinadangkes.

23Ta isu dina pay masapul nga otoben ti tao, tapno mapan coma iti sango ti Dios iti pannacaocom.

24Burakenna dagiti mamaingel a tattao iti wagas a di-maawatan, ket isaadna dagiti sabali iti saadda.

25Gapuna nga ammoenna dagiti ar-aramidda; ket idupalitna ida iti rabii, iti casta madadaelda.

26Isu cabilenna ida a casda la dakes a tattao iti napanayag nga imatang dagiti sabsabali;

27Agsipud ta simminada iti isusurot kencuana, ket dida kinayat ngaincancano iti aniaman cadagiti daldalanna:

28Iti casta padatengenda ti asug ti napanglaw kencuana, ket isu impangagna ti asug ti maparigat.

29No isu mangted talna, asino nga-rud ti macabalin a mangpabasol? Ket no ilemmengna ti rupana, asino ngarud ti macakita kencuana? Agpadpada a no maaramid coma iti maysa a nacion, wenno iti maysa a tao:

30Tapno ti tao a nadangkes di agari, tapno awan coma ti mangallilaw cadagiti tattao.

31Ta adda aya nagcuna iti Dios, Inturedco ti dusa, diacto mangranggasen uray caano.

32Ti diac makita isurom caniac: No nagaramidac iti kinadangkes, isu ti diacto aramidenen uray caano?

33Ti supapacna caslanto aya iti cayatmo, tapno isu paidem? Ta sica ti agpili coma, ket saan a siac: gapuna a saoem no ania ti ammon.

34Tattao a mannacaawat saoendanto caniac, wen, tunggal masirib a macangngeg caniac:

35Ni Job agsao nga awanan pannacaammo, ket dagiti sasaona saanda a nainsiriban.

36Sapay coma ta masuut ni Job agingga iti panungpalan, agsipud ta iti panagsungbatna umasping cadagiti nadangcoc a tattao.

37Ta inayonna ti kinasukir iti basolna; isu pagsipatenna dagiti imana iti tengngatayo; ket paaduenna dagiti sasaona a maibusor iti Dios.

← Chapter 33 Jump to: Chapter 35 →