Mark 16

Ilokano (Ti Biblia (1973))

← Chapter 15 Jump to:

1Ket idi nalabes ti aldaw a panaginana, ni Maria Magdalena, ken ni Maria nga ina ni Santiago, ken ni Salome gimmatangda cadagiti bangbanglo, tapno macapanda mangsapsapo kencuana.

2Ket idi a napanda iti nasapaunay iti umuna nga aldaw ti lawas, dimtengda iti tanem idi rimmuaren ti init.

3Ket cuncuna ti maysa ken maysa cadacuada: Asino ti mangipaay cadatayo ti pannacaligsay iti daytay bato iti ruangan ti tanem?

4Ket idi intangadda dagiti matada, nakitada a naligsayen daydi dackel unay a bato.

5Ket idi simrecda idi uneg di tanem, nakitada ti maysa a baro nga agtutugaw iti sikigan a macanawan, a nagcawes ti maysa a pagananay nga atiddug a puraw; ket nagkigtotda.

6Ngem isu cunana cadacuada: Saancay nga agkigtot! sapulenyo ni Jesus Nazareno, daydi nailansa iti cruz: nagungaren; awan ditoy; kitaenyo ti disso a nangicabilanda kencuana!

7Ngem incayo, ibagayo cadagiti adalanna, ken ni Pedro: Isu mapan iti masangoananyo idiay Galilea; isu makitayonto idiay, cas imbagana cadacayo.

8Ket rimmuarda iti tanem ket napanda a sitataray a napnoda ti buteng ken pigerger; ket awan a pulos ti nangisaoanda, ta napabutengda unay.

9Ket idi nagungar ni Jesus, iti agsapa unay, iti umuna nga aldaw ti lawas, nagparang nga immuna ken ni Maria Magdalena, isu a namaruaranna cadagiti pito a sairo.

10Isu napan ket impacaammona cadagiti nakicadcaddua kencuana, nga addada idi nga agun-unnoy ken agsangsangit.

11Ket isuda, idi nangngegda kencuana a sibibiag ken nakitana, isu dida pinati.

12Calpasan daytoy, nagparang iti sabali a langa cadagiti dua cadacuada a magmagnada, a mapan iti away.

13Ket napanda ket impacaammoda cadagiti sabsabali; ngem uray dagitoy saanda ida a pinati.

14Calpasan dagitoy nagparang cadagiti sangapulo ket maysa met laeng, idi addada a mangmangan ket binabalawna ida gapu iti awan a pammatida ken tangken ti pusoda, gapu iti dida pinati dagiti nacakita kencuana a nagungaren.

15Ket kinunana cadacuada: incay iti isu-amin a lubong, ket icasabayo ti evangelio iti isu-amin a parsua.

16Ket ti mamati ken ti mabautizaran, maisalacanto; ket ti saan a mamati, madusaanto.

17Ket dagitoy a pagilasinan cuyugendanto dagiti mammati: Iti naganco paruarendanto dagiti sairo; agsaodanto cadagiti babbaro a pagsasao:

18Agpidutdanto ti ululeg; ket no uminumdanto ti macagamut, saandanto a maanano; ipataydanto dagiti imimada cadagiti masacsakit, ket umimbagdanto.

19Casta ngarud, idi nalpas ni Apo Jesus ti nakisao cadacuada, naawat idiay ngato sadi langit ket nagtugaw iti macanawan ti Dios,

20Ket rimmuarda ket nangascasabada cadagiti isu-amin a disso, a ti Apo timmultulong cadacuada, ket pinanecnecanna ti sao cadagiti datdatlag a naipacuyog. Amen.

← Chapter 15 Jump to: