Mark 7

Ilokano (Ti Biblia (1973))

← Chapter 6 Jump to: Chapter 8 →

1Ket naguurnong iti sibayna dagiti Fariseo ken dadduma cadagiti escriba a naggapu idiay Jerusalem,

2Ket nakitada dagiti dadduma cadagiti adalanna a mangmanganda a narugit dagiti imimada, cayatna a saoen, saan a nabuggoan,

3Ta dagidi Fariseo ken dagiti amin a Judio, no saanda a buggoan a maminadu dagiti im-imada, saanda a mangan, ta sursurotenda ti ugali dagiti lallacay,

4Ket no aggapuda idiay tindaan, no saanda nga warsian ti bagida saanda a mangan: ken sabsabali pay nga adu a banag ti adda nga inawatda tapno surutenda: dagiti panangugas cadagiti copa, ken dagiti banga, ken dagiti baso a cobre, ken dagiti pagtugawan.

5Ket dagiti Fariseo ken escriba inimtuudda kencuana. Apayapay dagiti adalam saanda a suruten ti ugali dagiti lallacay, no di ket pacammetda dagiti imimada a di nabuggoan?

6Ket kinunana cadacuada: Naimbag ti panangipadto ni Isaias ti maipapan cadacayo, managinsisingpet, cas iti naisurat; Daytoy nga umili dayawennac cadagiti bibigda; ngem ti pusoda adda iti adayu caniac.

7Ngem barengbareng ti panagdayawda caniac, isursuroda a cas pagalagadanda dagiti bilbilin dagiti tattao.

8Ta baybay-anyo ti bilin ti Dios ket surutenyo ti ugali dagiti tattao.

9Ket kinunana cadacuada: Nacascasdaaw ti panamagbalinyo nga ubbaw ti bilin ti Dios, tapno matungpalyo ti ugaliyo.

10Ta ni Moises kinunana: Dayawem ni amam ken ni inam; ket ti mangilunod iti ama wenno iti ina, matay coma a dibumurong.

11Ngem cunayo: No adda agcunanto iti ama wenno iti ina: naidatonen iti Dios daydiay mabalinco coma a pagservi kenca.

12Ket dicay ipalubosen kencuana nga agaramid pay ti aniaman a maipaay iti ama wenno iti ina:

13Nga iccatenyo ti capapayan ti sao ti Dios gapu iti ugali nga inyawatyo: ket adu dagiti banag nga umasasping cadagitoy nga aramidenyo.

14Ket inayabanna manen dagiti adu a tattao, ket kinunana cadacuada; Dumengegcay amin ket awatenyo:

15Awan ti banag iti ruar ti tao a no sumrec kencuana, mabalinna ti mangrugit kencuana; ngem dagiti banag nga agtaud kencuana, isuda ti mangrugit iti tao.

16No ti siasinoman a tao adda lapayagna a pagdengngeg, dumngeg coma.

17Ket idi pinanawanna dagiti tattao simrec iti balay ket inimtuud dagiti adalanna kencuana ti maipapan iti pangngarig.

18Ket cunana cadacuada: Castacayo met aya nga awan isipyo? Saanyo nga ammo nga amin nga aggapu iti ruar a sumrec iti tao, saanna a mabalin ti mangrugit;

19Ta saan a sumrec iti pusona no di ket iti tianna ket ibel-lengna iti nalimed? Daytoy kinunana, a guguranna dagiti amin a sida.

20Ket kinunana: ti agtaud iti tao, isu ti mangrugit iti tao.

21Ta iti uneg ti puso dagiti tao, agtaud dagiti dakes a panunot, dagiti pannakicamalala, dagiti tacaw, dagiti panangpapay, dagiti pannakiabig,

22Dagiti agum, dagiti kinadakes, ti panangulbod, ti kinaderrep, ti mata a managdacdakes, ti panagtabbaaw, ti kinapalangguad, ti kinaawan nakem;

23Amin dagitoy a banag aggapuda iti uneg ket rugitanda ti tao.

24Ket pimmanaw sadiay, ket napan cadagiti nagbeddengan ti Tiro ken Sidon, ket simrec iti maysa a balay, ket cayatna nga awan coma ti macaammo; ngem saana a nabalin ti mailemmeng.

25Ta apaman a nangngeg ti maysa a babai, nga adda bassit nga anacna a babai a nagun-gan ti maysa nga espiritu a narugit, immay ket nagrucbab cadagiti sacsacana,

26Daydi babai taga Grecia, Sirofenicia ti ilina, ket nagpacpacaasi ken Jesus ta paruarenna coma iti anacna daydi sairo.

27Ngem kinunana kencuana: Bay-am a mapnecda coma nga umuna dagiti annac; ta saan a nalinteg nga alaen ti tinapay dagiti annac, ket ibacal cadagiti aso.

28Ngem isu simmungbat ket kinunana kencuana: Pudno a casta Apo; ngem dagiti met aso iti siroc ti panganan manganda cadagiti murcat dagiti annac.

29Ket isu kinunana kencuana: Gapu itoy a panagsaom, incan; ti sairo rimmuaren ken anacmo.

30Ket nagawid idiay balayna, ket nasaracanna daydi ubing nga adda iti pagiddaan, a pinanawanen daydi sairo.

31Ket pimmanaw manen cadagiti beddeng ti Tiro, ket nagna idiay Sidon iti baybay ti Galilea, a limmabas iti nagbabaetan dagiti dagdaga ti Decapolis.

32Ket inyegda kencuana ti maysa a tuleng ken gago ket dawdawatenda nga isu ipatayna coma kencuana ti imana.

33Ket innalana nga inlasin cadagiti adu a tao, ket inserrecna dagiti ramayna cadagiti lapayagna, ket timupra, ket sinagidna ti dilana;

34Ket idi a timmangad iti langit, nagasug ket kinunana: Ephatha! a cayatna a saoen: Malucatan!

35Ket dagus a nalucatan dagiti pagdengngegna, ket nawarwar met ti biring ti dilana, ket nagsao iti nalawag.

36Ket imbilinna cadacuada nga dida coma ibaga iti uray siasino; ngem no casano ti panangibilinna, casta met nga adadda ti regtada a mangiwara.

37Ket nagsidsiddaawda unay a cuncunada: Naimbag ti panangaramidna iti isu-amin; uray dagiti tuleng aramidenna a macangngegda, ken dagiti umel agsaoda.

← Chapter 6 Jump to: Chapter 8 →