Mark 2

Ilokano (Ti Biblia (1973))

← Chapter 1 Jump to: Chapter 3 →

1Ket calpasan ti sumagmamano nga aldaw, ni Jesus simrec manen idiay Capernaum; ket idi naammoan nga adda iti balay,

2Immaracda kencuana dagiti adu, iti casta dida malaonen uray pay iti arubayan ti ruangan; ket icascasabana cadacuada ti sao.

3Ket dimteng dagiti nangyeg kencuana iti maysa a tao a di macagunay, nga inawit ti uppat.

4Ket idi saanda a mabalin ti umasideg kencuana gapu iti umariwecwec a tattao binutbutanda ti atep ti balay a yanna idi; ket idi a nabutawanda, imbabada ti langcapi a nagiddaan daydi saan a macagunay.

5Idi ngarud makita ni Jesus ti pammatida, cunana iti daydi saan a macagunay: Anac, dagiti basbasolmo mapacawanda.

6Ngem addada sadiay a situtugaw dagiti dadduma cadagiti escriba, a panpanunutenda cadagiti puspusoda:

7Apayapay agsao daytoy iti castoy? Agtabbaaw: Siasino ti macabalin a mamacawan cadagiti basbasol no di laeng ti Dios?

8Ket nailasin a dagus ni Jesus ti pacpakinacmenda ket kinunana cadacuada: Apayapay panunutenyo dagiti cacasta a banag cadagiti puspusoyo?

9Ania ti nalaclaca, ti panagcuna itoy saan a macagunay: Dagiti basbasolmo mapacawanda: wenno ti panagcuna: Tumacderca, ket alaem ti langcapim ket magnaca?

10Tapno maammoanyo ngarud, a toy Anac ti tao adda pannacabalinna ditoy daga a mamacawan cadagiti basbasol cunana idi saan a macagunay:

11Cunac kenca: Tumacderca, bagcatem ta langcapim ket inca idiay balaymo.

12Ket timmacder, ket binagcatna a dagus daydi langcapi, ket rimmuar iti sangoananda amin; iti casta nagsiddaawda amin, ket dinaydayawda ti Dios a cuncunada: Uray caano dicam pay nacakita ti castoy.

13Ket rimmuar manen iti dinna ti baybay; ket ti umariwecwec a tao immayda kencuana, ket insursurona ida.

14Ket idi a lumablabas, nakitana ni Levi, nga anac ni Alfeo nga agtutugaw iti pagsingiran ti buis, ket cunana kencuana; Surutennac. Ket timmacder ket simmurot kencuana.

15Ket naaramid nga idi adda ni Jesus a sisasango iti panganan idiay balayna, adu dagiti agsingsingir ti buis ken managbasol a nakisangoda ken Jesus ken dagiti adalanna; ta aduda idi a simmurot kencuana.

16Ket dagiti escriba ken dagiti Fariseo idi makitada a makipangan cadagiti agsingsingir ti buis ken managbasol, cunada cadagiti adalanna: Apayapay a ti manursuroyo makipangan ken makiinum cadagiti agsingsingir ti buis ken managbasol?

17Ket idi nangngeg ni Jesus daytoy cunana cadacuada: Dagiti sisasalunat awan ti pacasapulanda iti mangngagas, no di ket dagiti masacsakit; saanac nga immay nga agayab cadagiti nalinteg; no di ket cadagiti managbasol.

18Ket dagiti adalan ni Juan ken dagiti Fariseo addada nga agayunar; ket immayda ket cunada kencuana: Apayapay nga agayunar dagiti adalan ni Juan ken dagiti adalan dagiti Fariseo, ngem dagiti adalam dida agayunar?

19Ket ni Jesus cunana cadacuada: Mabalin aya dagiti gagayyem ti novio ti agayunar no adda pay laeng cadacuada? No adda pay laeng cadacuada ti novio, dida mabalin ti agayunar.

20Ngem umaydanto dagiti aldaw a ti novio maiccatto cadacuada; ket iti casta agayunardanto iti dayta nga aldaw.

21Awan ti mangitacup ti lupot a baro iti pagananay a daan; ta no saan daydiay met la pangtacup a baro intono cumsen, ray-abenna ti daan, ket maaramid a dacdakes ti pigis.

22Ket awan met ti mangicabil ti arac a baro cadagiti supot a lalat a daan; ta no saan, ti arac bettakennanto dagiti lalat ket maibel-leng ti arac, ket dagiti supot madadaelda; no di ket icabilda ti arac a baro cadagiti supot a babbaro.

23Ket naaramid nga isu idi lumablabas iti minulmulaan iti aldaw a panaginana, dagiti adalanna, idi a magmagnada, rinugianda ti nagala cadagiti dawa.

24Ket dagiti Fariseo kinunada kencuana: Kitaem! apayapay aramidenda ti saan a maipalubos iti aldaw a panaginana?

25Ngem isu kinunana cadacuada: dicay aya nabasa uray caanoman ti inaramid ni David, idi adda nacasapulanna, ken nagbisin, isu ken dagidi naicuyog kencuana;

26No casano ti iseserrecna iti Balay ti Dios, cadagiti aldaw ni Abiatar a cangatoan a padi, ket kinnanna dagidi tinapay a sidadaya iti altar, a saanda a maipalubos a canen, no dilaeng cadagiti papadi; ket iniccanna met dagiti naicuyog kencuana?

27Ket kinunana cadacuada: Ti aldaw a panaginana naaramid a maipaay iti tao, ket saan a ti tao maipaay iti aldaw a panaginana.

28Iti casta, toy Anac ti tao isu ti Apo ti aldaw a panaginana.

← Chapter 1 Jump to: Chapter 3 →