Philippians 3

Ilokano (Ti Biblia (1973))

← Chapter 2 Jump to: Chapter 4 →

1Camaudiananna, cacabsatco, agrag-ocayo iti Apo. Ti panangisurat cadagidi met la a banag cadacayo, saan a macaalimuteng caniac, ngem cadacayo, pacapatibkeran.

2Annadanyo dagiti asaso, annadanyo dagiti dakes nga agar-aramid, annadanyo ti managcugit:

3Ta datayo ti pudno a pannacacugit, nga agdayaw babaen ti Espiritu ti Dios ket agrag-o ken Cristo Jesus, ket awan ti panagtalectayo iti lasag:

4Uray siac met mabalinco coma ti agtalec iti lasag no adda siasinoman nga agpanunot nga agtalec iti lasag, nangnangronaac pay.

5A nacugit iti maicawalo nga aldaw, iti capuonan ti Israel, iti caputotan ni Benjamin, Hebreo dagiti Hebreo, ti maipapan iti linteg, Fariseo;

6Ket no maipapan iti regta, nangidadanes iti Iglesia, ket no maipapan iti kinalinteg nga adda iti linteg, awan pacapilawac.

7Ngem dagidiay banbanag a gonggona caniac idi, imbilangco ida a pannacadadael gapu ken Cristo.

8Nangnangrona pay, isu-amin dagiti banag ibilangco ida a pannacadadael, gapu iti napateg unay a pannacaammo ken Cristo Jesus, nga Apoc, a gapu kencuana pinucawco amin, ket ibilangco ida a rugit, tapno magun-odac ni Cristo,

9Ket tapno maaddaac kencuana, a diac cupicupan ti kinalintegco met laeng nga gapu iti linteg, no di ket ti adda gapu iti pammati ken Cristo, ti kinalinteg nga aggapu iti Dios gapu iti pammati:

10Tapno maammoac, ni Cristo ken ti pannacabalin ti panagungarna, ken ti pannacaicaddua cadagiti sinagabana, a mayaspingac iti ipapatayna;

11Bareng iti aniaman a pamay-an magun-odac coma ti panagungar cadagiti natay.

12Saan a nacagun-odacon wenno naaananayacon; no di ket agtuluyac, bareng no maalac daydiay gapu a nangalaan met ni Cristo Jesus caniac.

13Cacabsat, diac pagarupen a nagun-odacon; ngem maysa ti aramidec idinto a lipatac dagiti malicudan, camacamec dagiti masangoanan,

14Agtarayac a sipipinget nga agturong iti calat, maipuon ti gonggona ti natan-oc a panangawis ti Dios gapu ken Cristo Jesus.

15Datayo ngarud amin, a nataenganen, addaantayo coma ti castoy a ricna; ket no maricnayo ti maisupadi daytoy lawlawaganto met ti Dios:

16Isuna laeng nga iti nacagtengantayon ituloytayo coma a pagnaan.

17Cacabsat, tumuladcayo a sititimpuyog caniac, ket matmatanyo dagidiay casta ti pannagnada ken cas iti pagulidananmi nga adda cadacayo.

18Ta adu dagiti magna, isuda nga imbagac a naminadu cadacayo, ket ita ibagac manen a sisasangit cadacayo, nga cabusor ida ti cruz ni Cristo:

19A ti panungpalanda isu ti pannacapucaw, a ti diosda isu ti tianda, ket ti dayagda adda iti bainda; isuda panunutenda laeng ti naindagaan.

20Ta ti pannakipagilitayo adda sadi langit: ket manipud idiay urayentayo met ti Manangisalacan, ni Apo Jesu-Cristo:

21Isu pabaroennanto daytoy nanomo a bagitayo, tapno mayasping iti nadayag a bagina, cas mayalubog iti pannacabalinna met a mangpatulnog a maipaay kencuana met laeng cadagiti isu-amin a banbanag.

← Chapter 2 Jump to: Chapter 4 →