Philippians 4

Ilokano (Ti Biblia (1973))

← Chapter 3 Jump to:

1Gapuna cacabsatco, nga ay-ayatec ken il-iliwec, ragsacco ken balangatco, agtalinaedcayo ngarud iti Apo, dungdungngoec.

2Bagbagaac ni Evodias, ket bagbagaac ni Sintique, nga agmaymaysada coma ti nakemda iti Apo.

3Ket dawatec kenca met, matalec a catulongan, a tulungam coma dagitoy a babbai, isuda a nakipagbannog caniac iti evangelio, agraman met ken Clemente, ken cadagiti dadduma pay a catulongac, a dagiti nagnaganda addada iti libro ti biag.

4Agragsaccayo iti Apo iti cancanayon, ibagac manen: Agrag-ocayo.

5Maammoan coma dagiti isu-amin a tattao ti kinaanusyo. Ti Apo asidegen.

6Dicay madanagan iti uray ania, no di ket cadagiti isu-amin, maipacaammo coma dagiti dawdawatyo iti Dios, gapu iti cararag ken araraw, agraman panagiaman.

7Ket ti talna ti Dios, a daeganna ti amin a pannacaawat, aywanannanto dagiti puspusoyo ken dagiti panunotyo ken Cristo Jesus.

8Camaudiananna, cacabsat, dagiti aniaman a banbanag a napudno, dagiti aniaman a banbanag a nadayaw, dagiti aniaman a banbanag a nalinteg, dagiti aniaman a banbanag a nadalus, dagiti aniaman a banbanag a macaay-ayo, dagiti aniaman a banbanag a naimbag ti damagda; no adda aniaman a kinasingpet, ken no adda aniaman a kinadayaw, panunutenyo dagitoy a banbanag.

9Dagiti banbanag nga inadalyo, ken inawatyo, ken nangngegyo, ken nakitayo caniac, aramidenyo ida: ket ti Dios ti talna addanto cadacayo.

10Ket nagragrag-oac unay iti Apo, ta iti camaudiananna nangabaroanan ti panunotyo maipapan caniac; nga iti kinapudnona, pinanunotyo, ngem awanancayo ti gundaway.

11Saanco a cuna ti maipapan iti pannacasapul, ta naadalco ti mapnec cadagiti aniaman a casasaadco.

12Ammoc ti panagsagaba iti kinanomo ket ammoc ti panaglac-am iti nam-ay: iti tunggal disso ken iti isu-amin a casasaad, naadalco ti palimed, ti pannacapnec ken ti panagsagaba iti bisin; castamet ti panaglaplapusanan ken ti kinakirang.

13Mabalinac dagiti amin a banbanag gapu iti daydiay mamapigsa caniac.

14Nupay casta, naimbag ti inaramidyo iti pannakiramanyo caniac iti sagabaec.

15Ket dacayo, a taga Filipos, ammoyo met nga idi pannacairugi ti evangelio, idi pimmanawac idiay Macedonia, awan ti Iglesia a nakicadcadua caniac iti banag a panagited ken panagawat, no di dacdacayo laeng;

16Ta uray idiay Tesalonica, masansan a nangipaw-itcayo ti maipaay iti pacasapulac.

17Saan a gapu ta tarigagayac ti sagut, no di ket tarigagayac ti bunga nga umadu coma a maipaay cadacayo.

18Ngem adda amin caniac ken aduanac: mapnecac, iti calpasan ti panangawatco ken Epafrodito cadagiti impawityo, nasam-it nga ayamuum, daton a napateg, a pagay-ayatan unay ti Dios.

19Ket ti Diosco punnoannanto ti amin a pacasapsapulanyo, cas mainugot iti kinabacnangna iti dayaw ken Cristo Jesus.

20Ket iti Dios ken Amatayo madaydayaw coma iti agnanayon. Amen.

21Cablaawanyo ti tunggal santo ken Cristo Jesus. Cablaawandacayo dagiti cacabsat nga addada caniac.

22Isu-amin dagiti sasanto cablaawandacayo nangrona dagiti cabbalay ni Cesar.

23Ti parabur ni Apo Jesu-Cristo agtaeng coma iti espirituyo.

← Chapter 3 Jump to: