Deuteronomy 21

Ilokano (Ti Baro a Naimbag a Damag Biblia) 1996

← Chapter 20 Jump to: Chapter 22 →

1Intuloy ni Moises, “No adda masarakanyo a bangkay iti maysa a talon iti daga nga ited ti Apo a Diosyo kadakayo, ket diyo ammo ti pimmatay,

2masapul a mapan dagiti panglakayen ken dagiti ukomyo iti disso a nakaiwalangan ti bangkay ket rukodenda ti kaadayo ti tunggal ili iti kabangibang manipud iti nasao a disso.

3Mangala dagiti panglakayen iti baka a saan pay a naipako manipud iti kaasitgan nga ili a nakasarakan iti bangkay.

4Ipanda ti baka iti saan pay a naarado a daga, iti asideg ti maysa nga agay-ayus a waig ket rungdoenda sadiay ti tengnged ti baka.

5Mapan met sadiay dagiti papadi a Levita, ta akemda ti mangusig ken mangeddeng iti amin a kaso a mainaig iti kinaranggas. Pinili ida ti Apo a Diosyo tapno agserbida kenkuana ken mangbendision iti naganna.

6Amin a pangulo ti ili a kaasitgan iti lugar a nakasarakan iti bangkay buggoanda ti imada iti rabaw ti baka

7sada kuna, ‘Saan a dakami ti pimmatay iti tao ket dimi ammo no siasino ti pimmatay.

8Pakawanem, O Apo, dagiti tattaom nga Israelita nga inispalmo idiay Egipto. Pakawanennakami ket dinakam pabasolen iti ipapatay ti tao nga awan basolna.’

9Ngarud, gapu ta inaramidyo ti pagayatan ti Apo, awanto ti sungsungbatanyo iti pammapatay.

10“Inton pagballigiennakayo ti Apo a Diosyo, ket agalakayo kadagiti balud ti gubat,

11nalabit nga adda makakita iti napintas a babai a pagduyosan ti riknana ket kayatna nga asawaen.

12Isangpetna iti balayna, pakalboanna, pagikukoenna

13ken pasuktanna ti pagan-anayna. Masapul nga agyan iti balayna ket makabulan a dung-awanna dagiti nagannak kenkuana; kalpasanna, mabalinnan nga asawaen.

14No dinanton kayat ti babai, masapul a wayawayaanna. Gapu ta pinilitna a kinaidda, dina mabalin nga ilako a kas tagabu.

15“Kas pangarigan adda lalaki a dua ti assawa. Ngem kadagitoy a dua, kaykayatna ti maysa. Ita, agpadada nga aganak iti lalaki, ngem ti anak ti asawa a dina kaykayat ti immuna a naipasngay.

16Inton ikeddeng ti lalaki a bingayenna ti sanikuana kadagiti annakna, dina idumduma ti anak ti magusgustoanna nga asawa babaen iti pannangtedna kenkuana iti bingay koma ti inauna nga anak.

17Masapul a doble ti bingay ti inauna uray no saan nga anak ti idumdumana nga asawa. Masapul a bigbigenna ti inauna nga anakna ket itedna ti bingayna kas ituyang ti linteg.

18“No nasukir ti maysa nga anak, ket dina italtalek ti panangdisiplina dagiti nagannak kenkuana,

19masapul nga idatag dagiti nagannak kadagiti panglakayen ti ili tapno mausig.

20Kastoy ti ibagada kadagiti panglakayen: ‘Nasubeg daytoy nga anakmi. Kanayonnakami a supringen ket dinakami dengdenggen. Mammartek ken gastador.’

21Kalpasanna, masapul a batoen dagiti tattao agingga a matay ket iti kasta, maikkat daytoy a kinadakes. Maammoanto daytoy ti amin nga umili ti Israel ket agbutengdanto.

22“No ibitinyo iti adigi ti bangkay ti maysa a tao a pinatayyo a kas dusa ti krimen nga inaramidna,

23masapul nga ikaliyo met laeng ti bangkay iti dayta nga aldaw. Diyo pagpatpatnagen a nakabitin gapu ta ti bangkay a sibibitin, yegna ti lunod ti Dios iti daga. No diyo ikali a dagus, matulawan ti daga nga ited kadakayo ti Apo a Diosyo.

← Chapter 20 Jump to: Chapter 22 →