Deuteronomy 25

Ilokano (Ti Baro a Naimbag a Damag Biblia) 1996

← Chapter 24 Jump to: Chapter 26 →

1“Kas pangarigan adda dua nga Israelita a dumatag iti pangukoman tapno mausig ti ririda ken masentensiaan ti nakabasol,

2pagpaklebento ti ukom ti nakabasol sana pasaplit. No ania ti dakes nga inaramidna, isu met ti bilang ti pannakasaplitna.

3Mabalin a masaplit iti mamin-uppat a pulo. Ngem saan a nasursurok ngem uppat a pulo tapno saan a maibabain dayta a tao kadagiti kailianna.

4“Diyo busalan ti agir-irik a baka.

5“No agkabbalay ti agkabsat a lallaki ket matay ti naasawaan kadakuada nga awan anakna, saan a makiasawa ti biuda iti sabali; rebbengna a ti kabsat ti natay ti mangasawa kenkuana.

6Maibilang nga anak ti natay ti inauna a lalaki nga ipasngayna tapno saan a mapukaw ti naganna iti Israel.

7Ngem no madi ti kabsatna a mangasawa iti biuda, dumatag ti babai kadagiti panglakayen iti pangukoman ket kunana, ‘Madi ti kabsat daydi asawak a mangtungpal iti annongna a kas kabsat ti natay nga asawak. Dina kayat a taginayonen ti nagan ti kabsatna iti Israel.’

8“Paayaban ngarud dagiti panglakayen ti lalaki tapno kasaoda. No dina latta kayat nga asawaen ti biuda,

9umasideg ti babai kenkuana iti sango dagiti panglakayen ket uksotenna ti sandalias ti lalaki sana tupraan ti rupana. Kunananto, ‘Kastoy ti mapasamak iti lalaki a madi a mangtaginayon iti familia ti kabsatna.’

10Iti Israel, maawaganto ti familiana iti ‘ti familia ti lalaki a nauksot ti sandaliasna.’

11“No agap-apa ti dua a lallaki, ket tulongan ti asawa ti maysa kadakuada ti asawana babaen iti panangguyodna iti mabagbagi ti karangranget ti asawana,

12masapul a maputed ti ima ti babai. Saanyo a kaasian.

13“Dikay agsaur no usarenyo ti timbangan ken pagsukatan.

15Usarenyo ti husto a timbangan ken pagsukatan tapno napaut ti panagbiagyo iti daga nga ited kadakayo ti Apo a Diosyo.

16Kagura ti Apo a Diosyo ti agsuitik.

17“Laglagipenyo ti inaramid kadakayo dagiti Amalekita idi aggapukay idiay Egipto.

18Dida nagbuteng iti Dios, isut' gapuna a liniputandakayo a dinarup idi nabannog ken napaksuyankayo; pinatayda pay amin a nakapsut a sumarsaruno.

19Ngarud, inton maiteden ti Apo a Diosyo ti daga nga itedna kadakayo ken natalgedkayon sadiay, masapul a papatayenyo dagiti amin nga Amalekita tapno awanton ti makalaglagip kadakuada. Laglagipenyo daytoy.”

← Chapter 24 Jump to: Chapter 26 →