Deuteronomy 23

Ilokano (Ti Baro a Naimbag a Damag Biblia) 1996

← Chapter 22 Jump to: Chapter 24 →

1Intuloy ni Moises, “Saan a maibilang kadagiti tattao ti Apo ti siasinoman a lalaki a nakapon wenno naputed ti mabagbagina.

2“Saan a maibilang kadagiti tattao ti Apo ti maysa a bastardo wenno dagiti kaputotanna, uray iti maikasangapulo a kaputotan.

3“Saan a maibilang kadagiti tattao ti Apo ti maysa nga Ammonita wenno Moabita—wenno ti siasinoman a kaputotanda uray iti maikasangapulo a kaputotan.

4Didakay inikkan iti kanen ken danum idi magnakayo iti dagada kalpasan ti iruruaryo idiay Egipto. Tinangdananda ketdi ni Balaam nga anak ni Beor a taga-Peor iti probinsia ti Mesopotamia tapno ilunodnakayo.

5Ngem saan nga impangag ti Apo a Diosyo ni Balaam. Pinagbalinna ketdi a bendision daydi lunod gapu ta inay-ayatnakayo ti Apo.

6Bayat ti panagtalinaedyo a maysa a pagilian, dikay agaramid iti aniaman a mangted iti pagimbagan wenno pagrang-ayanda.

7“Diyo laisen dagiti Edomita, ta kabagianyo ida. Diyo met laisen dagiti Egipcio, ta nagnaedkayo idi iti dagada.

8Mabalin a maibilang kadagiti tattao ti Apo dagiti annakda manipud iti maikatlo a kaputotan.”

9“Iti tiempo ti gubat, saankayo nga agaramid iti uneg ti kampo ti aniaman a mamagbalin kadakayo a narugit iti imatang ti linteg.

10No agbalin a narugit ti maysa a lalaki gapu ta agruar iti kissit bayat ti panagtagtagainepna iti rabii, masapul nga agyan nga agmalmalem iti ruar ti kampo.

11Masapul nga agdigos iti mumalemen ket inton lumnek ti init, sumrek met laeng iti kampo.

12“Masapul nga adda disso iti ruar ti kampo a mabalinyo a pagkasilyasan.

13Kas paset ti aruatenyo, mangitugotkayo iti pagkaliyo iti abut no umiblengkayo; kalpasanna, gaburanyo met laeng ti rugityo.

14Pagtalinaedenyo a nadalus ti kampoyo gapu ta adda ti Apo a Diosyo iti kampoyo a mangsalaknib kadakayo ken mangparmek kadagiti kabusoryo. Dikay agaramid iti aniaman a naalas a panggapuan ti Apo a mangbaybay-a kadakayo.

15“No agkamang kadakayo ti maysa a tagabu, diyo pagsublien iti apona.

16Bay-anyo nga agnaed iti uray sadino a lugar kadagiti iliyo a pilienna. Saanyo nga idadanes.

17“Maiparit iti maysa nga Israelita, lalaki man wenno babai, nga agbalin a balangkantis iti templo.

18Diyo ipan iti templo ti Apo a Diosyo ti matgedan ti maysa a balangkantis tapno idatonyo a pangtungpal iti kariyo. Kagura ti Apo dagiti balangkantis ti templo.

19“No agpautangkayo iti kuarta, taraon wenno uray ania iti padayo nga Israelita, diyo paanakan.

20Mabalinyo a paanakan ti ipautangyo iti ganggannaet, ngem diyo paanakan ti ipautangyo iti padayo nga Israelita. Tungpalenyo daytoy a bilin tapno bendisionannakayto ti Apo a Diosyo iti amin nga aramidyo iti daga a sakupenyo.

21“No agkarikayo iti Apo a Diosyo, diyo itantan a tungpalen, ta awan duadua a singirennakayo ket agbasolkayo.

22Saankayo a makabasol no dikay agkari iti Apo,

23ngem no agkarikayo iti agtaud iti nakemyo, masapul a tungpalenyo.

24“No magnakayo iti kaubasan ti maysa a tao, mabalinyo ti mangan kadagiti ubas iti kaykayatyo. Ngem dikay mangibasket iti yawidyo.

25No magnakayo iti katrigoanna, mabalinyo a kanen ti amin a mapurosyo ngem dikay agani iti trigo.”

← Chapter 22 Jump to: Chapter 24 →