1 Peter 1

Mien Bible (Thai Script) © Thailand Bible Society, 2007

Jump to: Chapter 2 →

1เยีย, ปีเต, โหฒว เยซู กีตู่ เญย กง-โฒ่. เยีย เฟี้ย เฝียน ปุน ทิน-ฮู่ง กิ๊น ต้าย เญย เมี่ยน, ต้ง หฒุ เปย๋า เยียม หฑาน ปอนทัด แซ้ง, กาลาเทีย, คับปาโดเซีย, เอเซีย เหธา บิทีเนีย แซ้ง เญย เมี่ยน.

2หฒั่ง เตี๋ย ทิน-ฮู่ง เอย นิ่น เญย หฒะเอ๋ย จา-ด่าง กิ๊น เม่ย บัว ต้าย. นิ่น เญย สีง ลี่ง ปุน เม่ย บัว โหฒว ธีง-เหฑ่ง เมี่ยน เหว่ย ปุน เม่ย บัว หมวัง เยซู กีตู่ หย่า ตุ๊ เยซู เญย ฑย้าม หฑาว เหฑ่ง เม่ย บัว. โท้ ทิน-ฮู่ง เหธย เอน เหธย แป้ง ออน ธั้มๆ เญย ปุน เม่ย บัว.

3บัว อ๋อย หฒุ เธง บัว เญย เฒี้ยว เยซู กีตู่ เญย เตีย, ทิน-ฮู่ง. นิ่น หฒะเก้ง! ค้อ-เลี่ยน ไห่ บัว. เยซู กีตู่ ไต่ มี่ง, ทิน-ฮู่ง แอ๋ง ปุน นั่ง ต้าย, ปุน บัว เขา นิ่น แอ๋ง เซียง-ยู์ง เจี๋ย, ฯฒฯ ตุ๊ เหยียด ลิ์ว ม่าย ลั่ม ฮนั้ม ต๋อง.

4ฮนั้ง หน่าย บัว ฯฒฯ ไฮ่ เสี่ยว ไม้ ไฮ่ เหมียด, ไม้ ไฮ่ ฮู้, ไม้ ไฮ่ หฒิด เญย ป่วน, ต้ง ทิน-ฮู่ง เหว่ย นิ่น เญย เมี่ยน เซียว เจี๊ยน วั้ว ทิน-ต้อง เญย ป่วน.

5เหว่ย เม่ย บัว เสียน, เม่ย บัว ตุ๊ ทิน-ฮู่ง เญย ชะ เปว เจี๊ยน, ฒั้ว เถา เซ้ด เมว์ย เญย ฮนอย ทิน-ฮู่ง หลิ่ว เล์ย เหฒียง เญย เหฌียว เอน ธ้วด ต้าย.

6เหว่ย น้าย เม่ย บัว อ๋อย หฒุ ออน-เหลาะ ไม้ กุ๊น อี้ หฒั่น หฒุ เสย, เสี่ยว ธั้ม-หญู่ง โค้ว หน่าน, เฑ่า หธาม ป๊า.

7น้าย เต๋ย สี่ เซ เหว่ย ปุน ธีง เม่ย บัว เฒียนๆ เญย เสียน. เสียน ฟิม เซ เก้า จ๋าย เจี๋ย เจียม. ไม้ กุ๊น เจียม ไฮ่ หฒิด หธ่อ อ๋อย หฒุ หล่ง โต์ว สิน. ฮนั้ง หน่าย, อ๋อย หฒุ เสย หมั่ง เม่ย บัว เญย เสียน ฟิม. เถา เยซู กีตู่ แอ๋ง ต้าย วั้ว หฒั่น, ทิน-ฮู่ง ฯฒฯ เธง เม่ย บัว, ท่าย เม่ย บัว, ปุน เม่ย บัว ตุ๊ ฌัง-หล่าง.

8ไม้ กุ๊น เม่ย บัว ไม้ แก้ง ปวัด เจี๋ย นิ่น, เม่ย บัว ฮนั้ม นิ่น. ไม้ กุ๊น เม่ย บัว อี้ หฒั่น หมั่ง ไม้ ปวัด นิ่น, เม่ย บัว หย่า เสียน นิ่น ฯฒฯ หฒะเก้ง! ม่าย ออน-เหลาะ อ๊ะ, ฒู้ง ไม้ ม่าย หว่า ก๊อง,

9เหว่ย หฒุ เม่ย บัว เญย ลี่ง ว่วน ตุ๊ เหฌียว. น้าย เซ เหว่ย เม่ย บัว เญย เสียน ฟิม.

10โต่ว หว่า เมี่ยน ก๊อง เถา ทิน-ฮู่ง อ๋อย ปุน เม่ย บัว เญย เอน. นิ่น บัว หลงๆ เญย ฒ่า หมั่ง หย่า ฒิ่ม ล์อ น้าย เหฌียว เอน.

11น้าย เต๋ย เมี่ยน ม่าย กีตู่ เญย สีง ลี่ง เยียม นิ่น บัว กะญั์ว จา-ด่าง ก๊อง กีตู่ อ๋อย หฒุ เสี่ยว โค้ว, มป่า ฆะฮ้า อ๋อย ตุ๊ เญย ฌัง-หล่าง. นิ่น บัว ชะ ฒ่า หมั่ง น้าย เต๋ย สี่ เถา หาย หฒั่น ธ้วด หย่า อ๋อย ฮนั้ง หาย นอ ธ้วด.

12ทิน-ฮู่ง ปุน น้าย เต๋ย โต่ว หว่า เมี่ยน ฮิ้ว ตุ๊ นิ่น บัว โหฒว เญย กง เซ ไม้ เฒ์ย เหว่ย เถง นิ่น บัว กั้น, เซ เหว่ย เถง เม่ย บัว. นิ่น บัว โต่ว ต้าย ก๊อง เญย สี่ เม่ย บัว อี้ หฒั่น ไฮ์ เมี่ยน ฒุ่น คู้ เฝียน บั๋ว เม่ย บัว. น้าย เต๋ย ฒุ่น คู้ เฝียน เญย เมี่ยน หย่า เขา เยียม ทิน-ต้อง พ้าย ต้าย เญย สีง ลี่ง ฒุ่น. เลี่ยม ฟิน-เมี่ยน หย่า อ๋อย ฮิ้ว น้าย เต๋ย สี่.

13เหว่ย น้าย อ๋อย หฒุ หลิ่ว เล์ย เหฒียง เฮญี้ยว, กุ๊น เจี๊ยน กั้น, หย่า หล่ง เหฑ่ง เฮญี้ยว ฮนั้ม เยซู กีตู่ แอ๋ง ต้าย วั้ว หฒั่น นิ่น อ๋อย เหธย ปุน เม่ย บัว เญย เอน.

14เม่ย บัว โหฒว หมวัง ทิน-ฮู่ง เญย หว่า เญย น่าม โญ์ว. ไม้ ตู๋ง เอย เจี๊ยน เม่ย บัว เญย เฮญี้ยว หั่น โหฒว, ฮนั้ง ฒิ่น ด่าง เม่ย บัว ไม้ แก้ง ฮิ้ว เญย เฒี่ยง โห่ โหฒว เญย นอ.

15เห่ว เม่ย บัว ต้าย วั้ว เต้า เซ ธีง-เหฑ่ง เญย. เยียม เม่ย บัว โหฒว เญย หญู่งๆ สี่ เม่ย บัว หย่า อ๋อย หฒุ ฮนั้ง นิ่น นอ, ธีง-เหฑ่ง.

16เหว่ย หฒุ กีง-โซว ก๊อง, “เม่ย บัว อ๋อย หฒุ ธีง-เหฑ่ง เหว่ย หฒุ เยีย เซ ธีง-เหฑ่ง เญย.”

17เม่ย บัว เต๋า เก๋า เญย เฒี่ยง โห่ เม่ย บัว เห่ว ทิน-ฮู่ง โหฒว “อา เตีย อ่า.” นิ่น ไม้ หมั่ง หาย เต้า เญย เฮมียน. นิ่น หฒิว เก๊าะ-เมี่ยน โหฒว เญย สี่ เซี้ยม. เหว่ย น้าย เม่ย บัว เยียม เสย หฒั่ง อ๋อย หฒุ กั้ม เหฑีย นิ่น, ท่าย นิ่น.

18เม่ย บัว ฮิ้ว ตุ๊ ทิน-ฮู่ง หฒัวะ เม่ย บัว เยียม อง-ถาย, ต่อย เจี๋ย ต่อย, ไม้ ลั่ม หล่ง เญย เจ๊า ธ้วด ต้าย. นิ่น ไม้ เฒ์ย หล่ง ไฮ่ หฒิด เญย กะน้าย ฮนั้ง เจียม ไฟ ญ่าน.

19นิ่น หล่ง กีตู่ จ๋าย ไห่ เญย ฑย้าม หฒัวะ เม่ย บัว. กีตู่ เซ ฮนั้ง ไม้ หว่าย ฝัง หย่า ไม้ ม่าย ต๋อง เฆ่ม เญย ปะกี ยู่ง ตอน นอ.

20ทิน-ฮู่ง ไม้ แก้ง เหฒย ลู่ง เหฒย เดา วั้ว หฒั่น นิ่น กิ๊น กีตู่ ต้าย. แอ๋ง เถา น้าย เต๋ย ฆะฮ้า ลาย เญย ฮนอย-เหญียะ กีตู่ ธ้วด ต้าย เหว่ย เถง เม่ย บัว.

21เม่ย บัว เขา กีตู่ เสียน ทิน-ฮู่ง, ต้ง กีตู่ ไต่ มี่ง ปุน นิ่น แอ๋ง นั่ง ต้าย ตุ๊ ฌัง-หล่าง วั้ว เต้า. ฮนั้ง หน่าย, เม่ย บัว เญย เสียน ฟิม เหธา ม่าย ลั่ม ฮนั้ม เญย เซ เยียม ทิน-ฮู่ง.

22เม่ย บัว เอย เจี๊ยน เฒียน เล์ย โหฒว ฯฒฯ ปุน เม่ย บัว เญย เฮญี้ยว ธีง-เหฑ่ง ต้าย หย่า หฒะเก้ง ฮนั้ม เสียน เยซู เญย ก๋อ-โย์ว. ฮนั้ง หน่าย เม่ย บัว อ๋อย หฒุ หล่ง เหฑ่ง เฮญี้ยว ล่าน ฮนั้ม ล่าน.

23เม่ย บัว เซ กั้น เซียง-ยู์ง เจี๋ย, ไม้ เฒ์ย เยียม ไฮ่ ไต่ เญย ป๊วน ยู์ง, เซ เยียม ไม้ ไฮ่ ไต่ เญย ป๊วน ยู์ง. เหว่ย หฒุ เม่ย บัว เขา ทิน-ฮู่ง เหยียด ลิ์ว เฒี่ยง เจี๊ยน เญย โต์ กั้น เซียง-ยู์ง เจี๋ย.

24ฮนั้ง กีง-โซว ก๊อง นอ, “เหยียด ฒู้ง ป้าม เมี่ยน เซ ฮนั้ง เมี้ย นอ, นิ่น บัว เญย ฌัง-หล่าง หย่า ฮนั้ง เมี้ย เญย เปี้ยง. เมี้ย ฆาย มี่ง, เปี้ยง หย่า โปย้.

25มป่า เฒี้ยว เญย โต์ เหยียด ลิ์ว เยียม.” น้าย โต์ เซ ฒุ่น ปุน เม่ย บัว หมวัง เญย คู้ เฝียน.

Jump to: Chapter 2 →